NENGABE umbelethi, inga-kghani uyabazi ubujamo okukhulunywa ngabo emitjhweni esekuthomeni? Nakungenzeka uqalene nobujamo obufanako, inga-kghani uyazibuza bona ungabanikela njani abantwabakho isiyalo? Inga-kghani kumbi ukunikela abantwabakho isiyalo?

IBhayibheli nelihlathulula ibizo elithi “isiyalo” ayilihlathululi njengokujezisa. Ibizweli kuhlekuhle litjho ukunikela iseluleko, ukufundisa, nokulungisa. Alihlobani nokubetha okubuhlungu.—IzAga 4:1, 2.

Isiyalo esinikelwa mbelethi singafaniswa netoni. Usotoni uthoma ngokulungisa kuhle ihlabathi, ayithele ngamanzi begodu athelele neentjalo, azivikele bona zingadliwa ziinunwana namkha likhula. Njengombana iintjalo zikhula, usotoni ngezinye iinkhathi kungatlhogeka azithene kancani ukwenzela bona zikhule ngendlela efaneleko. Usotoni lo, uyalemuka bona nakasebenzisa ngokutjhejisisa iindlela ezihlukahlukeneko, kuzomsiza akhulise iintjalo ezihle. Ngokufanako, ababelethi batlhogomela abantwababo ngeendlela ezinengi. Kodwana ngezinye iinkhathi kutlhogeka bazinikele isiyalo—lokhu kufana nokuthena okwenziwa eentjalweni, kokhunye kungatlhogeka zilungise umukghwa omumbi zisuka nje begodu lokho zikwenzela bona abantwana bakhule ngendlela efaneleko. Nokho, ukuthenokhu kufuze kwenziwe ngokutjhejisisa ngombana nakungasinjalo isitjalo singathikaziseka unomphela namkha singakhuli kuhle. Ngokufanako, umbelethi kufuze anikele isiyalo ngethando.

UJehova uZimu weBhayibheli, ubekela ababelethi isibonelo esihle khulu endabeni le. Isiyalo asinikela abakhulekeli bakhe bephasini abalalelako siyasebenza begodu siyathandeka sibenza ‘bakuthande ukusolwa.’ (IzAga 12:1) ‘Babambelela ekuyalweni’ begodu ‘abalisi.’ (IzAga 4:13) Ungakhona ukusiza abantwabakho bona bamukele isiyalo ngokulingisa iindlela eentathu eziphumelelako zesiyalo esivela kuZimu: (1) sinethando, (2) siyacabangela, begodu (3) siyathembeka.

Ithando likhuthaza bona samukele isiyalo esivela kuZimu. IBhayibheli lithi: “[UJehova] uyamkhalima amthandako, njengobaba endodanenakhe ayithandako.” (IzAga 3:12) Ukungezelela kilokho, uJehova ‘unomusa nesirhawu, ubuthaka ekusilingekeni.’ (Eksodusi 34:6) Lokhu kutjengisa kuhle bona uJehova akasinguZimu omumbi namkha otlhorisa abantu. Begodu akasebenzisi amezwi anelunya, anebandlululo, namkha atshime abantu, okuzizinto ezingalimaza ‘njengamezwi ahlaba njengesabula.’—IzAga 12:18.

Kuliqiniso, akusilula ngababelethi bona balingise isibonelo sakaZimu sokuzibamba. Ngezinye iinkhathi uzokuphelelwa kukghodlhelela, kodwana hlangana neenkhathi ezibudisezo, khumbula bona isiyalo osinikela ukwate khulu, siyagandelela, siyeqisa begodu asizuzisi. Ukungezelela kilokho, ukubetha umntwana ngebanga lokobana ukwatile namkha udinekile lokho akusikunikela isiyalo. Kutjho bona ubhalelwe kuzibamba.

Ngakelinye ihlangothi, nawunikela isiyalo ngethando nokuzibamba, uzokuthabela ukubona imiphumela emihle. Cabanga ngoGeorge noNicole, ababelethi ababili abadzubhulwe ngaphezulu, ucabange nendlela abalungise ngayo indaba.

“Kwathi lokha uJordan nakafikako, mina nomkami besisilingeke khulu, kodwana sazibamba samlalela njengombana asihlathululela ibanga lokobana kubayini afike lada. Njengombana bekulada khulu, saqunta bona indaba le sicoce ngayo ekuseni. Sathandaza ngemva kwalokho sayokulala. Ngelanga elilandelako, besisebujamweni obuhle bokucoca ngendaba le ngaphandle kokulawulwa mazizo begodu sakhona nokuthinta ihliziyo yendodanethu. UJordan wazimisela ukusebenzisa isiyalo esamnikela sona begodu wamukela nesigwebo sokuziphatha kwakhe. Indlela esenza ngayo yasithabisa khulu ngombana sabona bona ukurhabela ukulungisa indaba sikwatile akukalungi. Ukuthoma ngokulalela, lokho kwenza izinto zabangcono.”—UGeorge.

“Ngakwata khulu ngemva kokubona umntazanami alinyazwe mnakwabo omncani. Kunokobana ngilungise indaba ngokurhaba, ngambawa bona aye ngekamarweni lakhe ngombana bengikwate kwamanikelela ngingakghoni nokucabanga. Kuthe lokha igwebu naliqeda ukubohla, ngamhlathululela ngokuzwakalako bona ukulwa akufuneki begodu ngamtjengisa nendlela alimaze udadwabo ngayo. Ukusebenzisa indlela le kwasiza khulu. Wabawa udadwabo bona amlibalele, bewamanga.”— UNicole.

Isiyalo esinikelwa kuhle, nanyana sibandakanya ukubetha kanengi vane sikhambisana nethando.

UJehova ngaso soke isikhathi isiyalo sakhe usisebenzisa “ngezinga elifaneleko.” (Joromiya 30:11; 46:28, NW) Ucabangela boke ubujamo, ngitjho nezinto ezingabonakala zingatjho litho ngezinye iinkhathi. Ababelethi bangasilingisa njani isibonelwesi? Uyamkhumbula uStephen ekukhulunywe ngaye ekuthomeni kwesihlokwesi, uyahlathulula: “Ngitjho nanyana kwasiphatha kumbi lokho okwenziwa nguNatalie begodu singavumelani nokuphika indaba yedzilamnwana leya, sacabangela izinga lakhe lokukhula nendlela acabanga ngayo.”

URobert indoda yakaNicole, naye wacabangela boke ubujamo. Abantwabakhe nabathoma ukungaziphathi kuhle, bekazibuza qobe ukuthi: ‘Kghani into le iyathoma ukwenzeka namkha sekuyinto ehlala yenzeka? Inga-kghani umntwana udiniwe namkha uyagula? Indlela enza ngayo ilitshwayo lomunye umraro?’

Ababelethi abacabangelako bayatjheja bona abantwababo abacabangi njengabantu abakhulu. UmKrestu umpostoli uPowula walitjheja iqiniso lelo lokha nakathi: “Nangisesemntwana bengikhuluma njengomntwana, ngicabanga njengomntwana.” (1 Korinte 13:11) URobert yena wathi: “Mina into engisiza ngicabangele begodu ngingarhabi ukuthatha amagadango vane ngizikhumbuze ngalokho egade ngithanda ukukwenza lokha nangisesemsanyana.”

Kuqakathekile bona ube nombono ulingeneko kilokho okulindele ebantwaneni bakho, kodwana ngesikhathi esifanako, ungavumeli imikghwa emimbi namkha izenzo ezingakalungi. Nawucabangela amakghono womntwanakho, ukuba nesono kwakhe, nezinye izinto, ngalokho uzokuqiniseka bona isiyalo usinikela ngezinga elilingeneko begodu nangendlela ehle.

Umtlolo kaMalaki 3:6, uthi: “Mina [Jehova] angiphenduki.” Iinceku zakaZimu zithembela eqinisweneli begodu zizizwa zivikelekile ekufumaneni ilwazeli. Abantwana nabo batlhoga ivikeleko lesiyalo esithembekileko. Nangabe imithetho oyibekako iyatjhuguluka kuya ngokuthi uzizwa njani, nabantwabakho lokho kuzobarara begodu bangasazi bona khuyini okufuze bayenze.

Uyakhumbula bona uJesu wathi: ‘Kwaphela yithi, ‘Iye, iye’ namkha, ‘Awa, awa.’ Amezwi la ayasebenza nebabelethini. (Matewu 5:37) Ababelethi kufuze bacabangisise ngaphambi kokobana banikele isiyalo. Nangabe ngaphambilini batjela umntwana bona uzokufumana isijeziso nangabe akasilaleli isiyalo, umbelethi kufuze adzimelele kilokho akutjhoko.

Ukukhulumisana okuhle hlangana kwababelethi kuqakathekile bona isiyalo singatjhentjhatjhentjhi. URobert uyahlathulula: “Nangabe abantwabethu bangenza ngivumele into umkami angakabatjeli bona bayenze begodu kufumaneke bonyana mina bengingakwazi lokho, ebujamweni obunjalo vane ngitjhentjhe isiqunto sami ngisenze sivumelane nesomkami.” Nangabe ababelethi abavumelani nebalungisa ubujamo obuthileko, kungabangcono bakhulume ngokungavumelani kwabo endaweni esitheleko begodu bafikelele isiqunto sinye.

Nangabe nilingisa isiyalo sakaJehova esinethando, esicabangelako nesithembekileko, qinisekani bona imizamwenu izokuzuzisa abantwabenu. Neninikela abantwabenu isinqophiso sethando kuzobasiza bakhule kuhle, bakwazi ukuzitjheja kuhle, begodu balinganisele nasele babadala. IBhayibheli lithi: “Nawukhulisa umntwana ngendlela azakukhamba ngayo, nasele akhulile, angeze aphambuka kiyo.”—IzAga 22:6.