Eminyakeni ema-30 edlulileko, abantu abanengi bebabona ngasuthi ubuhlobo beenarha ezihlukahlukeneko buzinzile begodu buyathuthuka. Kodwana okwenzeke mva nje kutjengisa ukuthi lokho akusiliqiniso.

•   “Abantu batshwenyekile ukuthi ipi yeGaza izokuthinta nezinye iinarha njengombana i-Israel ne-Hezbollah zithoma ukulwa emkhawulweni we-Lebanon.”—Ngokwe-Reuters, kaJanabari 6, 2024.

•   “Iinqhema ezilawulwa yi-Iran zisahlela eendaweni ezihlukahlukeneko begodu i-Iran ithome ukwenza iinkhali ze-nuclear godu. Ukungezelela kilokho, i-Russia ne-China zisekela i-Iran. Lokhu kuthusa iinarha ezisetjingalanga.”—Ngokwe-The New York Times, kaJanabari 7, 2024.

•   “Ukusahlela kwe-Russia kuragela phambili kwenza umonakalo omkhulu e-Ukraine.”—Ngokwe-UN News, kaJanabari 11, 2024.

•   “Ukukhula komnotho we-China namandla wepi, ukwanda kokuzikhakhazisa ngokobutjhaba kwe-Taiwan nokungazwani kwe-China ne-U.S kubangela ubujamo obungenza kube nepi lula.”—Ngokwe-The Japan Times, kaJanabari 9, 2024.

 Inga-kghani iBhayibheli kukhona elikutjhoko ngokungazinzi kobujamo bephasi esibubonako namhlanjesi? Kghani kuzokubangela ipi yephasi?

 IBhayibheli akhenge libikezele ngokunqophileko ngananyana ngiyiphi ipi esiyibona namhlanjesi. Kunalokho labikezela ngezipi ezingalawulekiko ezijayelekileko esikhathini sethu eziqeda, “ukuthula ephasini.”—IsAmbulo 6:4.

 Incwadi kaDanyela yabikezela ukuthi “esikhathini sokuphela,” imibuso yephasi ephikisanako “izokusunduzana,” namkha ibange ukubusa. Ukubangokho kuzokuhlanganisa ukutjengisa amandla amakhulu wezepi begodu kusebenzise ‘amagugu,’ namkha imali enengi.—Danyela 11:40, 42, 43.

 IBhayibheli litjengisa ukuthi ubujamo bephasi buzokuba bumbi khulu ngaphambi kobana bubengcono. UJesu wabikezela ukuthi “kuzokuba nesizi elikhulu elingakhenge khelibe khona soloko kwathoma iphasi” (Matewu 24:21) ‘Isizi elikhulwelo’ lizokubangela ipi ebizwa ngokuthi yi-Arimagedoni, ehlathululwa ngokuthi ‘yipi yelanga elikhulu lakaZimu uMninimandla Woke.’—IsAmbulo 16:14, 16.

 Nanyana kunjalo, i-Arimagedoni izokusindisa abantu abalungileko, ingasi ukubatjhabalalisa. Ngepi leyo, uZimu uzokuqeda ababusi babantu ababangele izipi ezinengi ezitjhabalalisako. Bona ufumane ukuthi i-Arimagedoni izokuletha njani ukuthula okungapheliko, funda iinhloko ezilandelako:

•   “Iyini Impi Ye-Armagedoni?”

•   “I-Arimagedoni Iza Neendaba Ezimnandi!”