Le ge Dihlatse tša Jehofa di tsebja kudu ka modiro wa tšona wa go etela batho ka ntlo le ntlo bakeng sa go bolela ka molaetša wa Beibele, ga bjale di bonwa di ema kgauswi le diteroli tše kgahlišago tša go bontšha dipuku le dipukwana mafelong ao go fetago batho ba bantši.

Gona bjale, mohuta wo wa go bolela ka Beibele o dirišwa kudu. Ka November 2011, sehlopha sa Dihlatse toropong ya New York City se ile sa thoma go boledišana le batho ka molaetša wa Beibele di diriša ditafola le diteroli tša go bontšha dipuku le dipukwana. Go diriša mokgwa wo go ile gwa ba le mafelelo a mabotse ka ge o ile wa thoma go phatlalala le ditoropong tše dingwe.

Go tloga ka March 2015, diteroli tše 165 390 di be di šetše di abetšwe diphuthego tša Dihlatse tša Jehofa lefaseng ka moka. Go šetše go hweditšwe dilo tše ntši tša go dira modiro wo tše bjalo ka ditafola, diteroli le mafelo ao go bewago dipuku, dipukwana le dibidio.

Modiro wa rena wa go ya ka ntlo le ntlo e sa dutše e le mokgwa o mogolo wa go phatlalatša therešo ya Beibele woo Dihlatse di tsebjago ka wona. Lega go le bjalo, mokgwa wa go diriša diteroli tša go bontšha dipuku le dipukwana o atlega kudu. Ela hloko mehlala e latelago.

Nageng Peru, monna yo a bitšwago Raul o ile a batamela Dihlatse tšeo di bego di le kgauswi le teroli ya dipuku le dipukwana gomme a re: “Le be le le kae nako ye ka moka? Ke be ke nyakana le Dihlatse ka mengwaga e meraro! Ge ke bona teroli ya lena, ke ile ka leboga Modimo.”

Le ge lefelo leo a bego a dula go lona le be le etelwa ke Dihlatse tša Jehofa gantši, Raul o be a dula a se gona ka gae gare ga beke le mafelo bekeng. O ile a hlalosa gore o kile a ithuta Beibele le Dihlatse e bile o nyaka go thoma go ithuta gape. Dihlatse tšeo di ile tša dira ditokišetšo tša gore a boele a ithute.

Banyalani ba bafsa ba ile ba ema pele ga teroli nageng ya Bulgaria ke moka ba itšeela puku ya Sephiri sa Lethabo la Lapa. Beke e latelago banyalani ba ba ile ba boa ba tšea dipuku tše dingwe tše pedi e lego: Puku ya ka ya Ditaba tša Beibele le Ithute go Morutiši yo Mogolo. Hlatse yeo e bego e eme teroling e ile ya ba botšiša gore ba na le bana ba bakae. Ba ile ba araba ka gore: “Ga re na le ka o tee, eupša mohla re e ba le bona, re nagana go ba ruta ka Modimo. Dipuku tše e tloga e le seo re se nyakago.”

Nageng ya Ukraine Monna yo a aperego diaparo tša mašole o ile a batamela Hlatse yeo e bego e eme kgauswi le teroli, ke moka a re: “Basetsana, mpotšeng gore Haramagedone e tla tla neng.” Monna yo o be a tšere karolo dikgarurung tšeo di sa tšwago go ba gona nageng ya Ukraine. Maemo a lefase a be a mo kgodišitše gore Haramagedone e tla tla e se kgale, gomme o be a dutše a ipotšiša lebaka leo ka lona Modimo a sa tšeego kgato ka pela. Dihlatse tše di ile tša mo hlalosetša ka mangwalo a Beibele gore Modimo o na le mabaka a kwagalago a go se tsene ditaba tša batho ka bogare gona bjale le gore e se kgale o tla fediša batho ba kgopo. Monna yo o ile a dumela go tšea dimakasine tša Morokami le Phafoga! gotee le puku ya Is There a Creator Who Cares About You?

Nageng ya Macedonia, lesogana le lengwe le ile la botša Hlatse yeo e bego e eme kgauswi le teroli gore le be le tlwaelane le dimakasine tša Dihlatse eupša ga bjale le ka thabela go ba le puku ya Ke Eng Seo ge e le Gabotse Beibele e se Rutago? le ile la bolela gore ge le tloga mo le tla leba thwii bokgobapukung go thoma go e bala.

Ka morago ga diiri tše pedi, lesogana le le ile la boa le šetše le feditše go bala matlakala a mathomo a 79 a puku ye. Lesogana le le ile la bolela gore “Puku ye ruri e fetola maphelo! Ke lemogile gore dilo tše dintši tšeo ke bego ke di dumela di fošagetše. Dilo ka moka tšeo puku ye e di hlalosago ke a di kwešiša. E tloga e fetotše seo ke bego ke se kwešiša bophelong!”