“Ke rolela ditho tša mokgatlo wa lena kefa ka kganyogo ya tšona le lerato la tšona la go hlankela mmušo wa Modimo. Maiteko a lena a go rata go thuša Dihlatsegotee le setšhaba ka meneelo a tloga a lebogwa le go tšeelwa godimo kudu.”

Mantšu a a boletšwe lengwalong leo le tšwago go Kasim Reed, e lego meyara wa toropo ya Atlanta, Georgia kua U.S.A. Lengwalong le, go be go amogelwa Dihlatse tša Jehofa dikopanong tše tharo tše dikgolo tšeo di bego di tla swarelwa moo.

Ka mo go swanago, Lekgotlatoropo la Atlanta le dirile tsebišo ya go amogela baeng bao ba tlago dikopanong tše. Lekgotla le le boletše gore: “Go na le Dihlatse tša Jehofa tše ka bago dimilione tše seswai lefaseng ka bophara, tšeo di tšwago . . . Malemeng le ditšong tše makgolokgolo, eupša . . . le kopane ka morero o swanago . . . [Le] nyaka go godiša Jehofa, e lego Modimo wa ka Beibeleng le Mmopi wa dilo tšohle.”

Dikopano tše tharo tše dikgolo di be di swaretšwe moo ka July le August 2014, tše pedi tša dikopano tše di be di swere lenaneo ka Seisemane e nngwe ka Sepanishi. Baeng ba be ba etšwa dinageng tše ka bago tše 28, gomme lenaneo la Seisemane le be le fetolelwa sammaletee ka Serussia le Sejapane e le go hola baeng bao ba bolelago maleme a. Batho bao ba bilego gona dikopanong tše tše tharo e bile ba 95 689.

Ka 2014, Dihlatse tša Jehofa di be di swere dikopano tše dikgolo tša ditšhabatšhaba tše 24 dinageng tše senyane, go akaretša le mafelo a 16 a fapanego kua United States.