Dihlatse tša Jehofa di sa tšwa go fetša mošomo wo o tšerego mengwaga e tshela wa go oketša meago ya tšona ya Watchtower Farms kua Wallkill, New York. Mengwageng e mebedi ya mafelelo, mošomo o ile wa ba o montši kudu moo go ilego gwa nyakega diphapoši tše di oketšegilego bakeng sa baithaopi ba bangwe. Ka baka leo, mokgatlo o ile wa hiriša dintlo tša kgauswi le moo tše 25.

Beng ba dintlo ba be ba ikwa bjang ka go hirišetša Dihlatse tša Jehofa dintlo tša bona?

• Mong wa ntlo e nngwe o ngwadile gore: “Re ipshinne kudu ka batho bao ba bego ba hirišitše ntlong ya rena. Ka ge nna le monna wa ka re sa dule kgole le ntlo yeo, ka mehla re be re bona gore batho bao ba na le tirišano le lerato.”

• Yo mongwe wa bao ba bego ba hiriša dintlo tša bona, yoo le yena a bego a sa dule kgole le moo, o ngwadile ka batho bao ba bego ba hirišitše ntlo ya gagwe gore: “Re be re swarane gabotse kudu. Ka jarateng ya rena [re] na le lefelo le lebotse la go rutha, ka gona re be re fela re ba bitša gomme ba etla. Ge ba be ba tlile ba be ba itshwara gabotse e bile ba re naganela. Re thabetše go ba le bona, le gona re tlo ba gopola kudu.” O okeditše ka gore: “Re ipshinne go ipshina.”

• Yo mongwe wa bao ba bego ba hiriša dintlo tša bona o boletše gore: “Go be go le bose go dula kgauswi le batho bao ba bego ba hirišitše ntlo ya rena, e be e no ba baagišani go rena.”

Beng ba dintlo ba ile ba ikwa bjang ka dintlo tša bona ka morago ga gore bahiri ba tloge?

• “Ba be ba tliša tšhelete ya rente ka nako, [le gona] ba be ba hlokometše ntlo ya rena gabotse. Re ile ra e hwetša e kgahliša kudu.”

• Yo mongwe wa bao ba bego ba hiriša dintlo tša bona yoo re mo tsopotšego pejana, o okeditše ka gore o be a se a letela gore Dihlatse tša Jehofa di hlwekiše ntlo ya gagwe “kudu gakaaka.” O itše: “Re a leboga, re leboga le mokgatlo wa lena ka tsela yeo le bego le hlokomela ntlo ya rena.”

• Mosadi yo mongwe o re: “Ga se ra nyaka tšhelete yeo e patelwago bakeng sa dilo tšeo di ka senyegago, ka gobane re a tseba gore le batho ba go botega. Bahiri ba tlogetše dintlo tša rena di phadima.”

• Ka morago ga gore Dihlatse tša Jehofa di lokiše ntlo ya mohiriši yo mongwe mola le mola, o ile a botšiša gore: “Nka dira’ng gore batho ba lena e tle e be bašomi ba ka? Ge le holofeditše gore le tlo dira mošomo ka nako e itšego, ka mehla le tla ka nako yona yeo. Ga ke kgone go dira gore batho bao ke ba kgopelago go ntirela mešomo e itšego ba tle ka nako.”

• Pele bahiri ba ka sepela, mong wa ntlo e nngwe o ile a ngwalela Dihlatse tša Jehofa gore ge di ka tšwela pele di dula ka ntlong ya gagwe, o tla di fokoletša tšhelete ya rente.

• Yo mongwe o itše: “Ge mokgatlo wa Dihlatse tša Jehofa o ka boa, re ka o hirišetša dintlo tša rena di tloga fase.”