Go be go dutše go na le Dihlatse tša Jehofa nageng ya Ukraine mengwageng e lekgolo e fetilego. Di ile tša ngwadišwa semolao ka di-28 tša February, 1991, gateetee ka morago ga gore Ukraine e be naga yeo e ikemetšego ditabeng tša dipolotiki.

Nakong ya pušo ya Manazi le Soviet, Dihlatse di ile tša tlaišwa kudu nageng ye. Ka di-8 tša April, 1951, balaodi ba Soviet ba ile ba golega Dihlatse tše fetago 6 100 tša ka bodikela bja Ukraine gomme ba di iša Siberia. Maemo a ile a kaonefala ganyenyane ka June 1965, ka morago ga gore Kgorokgolo ya Tsheko ya Ukraine e ntšhe kahlolo ya gore dipuku tša Dihlatse tša Jehofa ke tša bodumedi gomme ga di tswalane felo le go ba kgahlanong le mmušo wa Soviet. Balaodi ba mmušo ba ile ba se sa golega batho bao ba bego ba bala dipuku tša Dihlatse eupša ba tšwela pele go golega Dihlatse ge di bolela ka ditumelo tša tšona. Ka September 1965, go lebalela ga mmušo melato go ile gwa dira gore Dihlatse tšeo di bego di išitšwe Siberia ka 1951 di lokollwe, eupša bontši bja Dihlatse tšeo di lokolotšwego di ile tša se dumelelwe go boela gagabo tšona. Dihlatse di ile tša tšwela pele di tlaišwa o šoro go fihla mathomong a bo-1980.

Lehono, Dihlatse tša Jehofa di thabela tokologo ya go bokana gotee bakeng sa borapedi le go dira mediro ya tšona phatlalatša di sa thibelwe ke balaodi ba mmušo. Lega go le bjalo, Dihlatse di sa dutše di tlaišwa ka baka la go hloiwa ga bodumedi bja tšona. Balaodi ba mmušo ga ba dire selo go šireletša Dihlatse gore di se hlaselwe le go thibela gore mafelo a tšona a borapedi a se senywe, e bile ga di golege bao ba dirago ditiro tšeo. Go se tšee kgato ga balaodi ba mmušo go dirile gore batho bao ba hlaselago Dihlatse ba tšwele pele ka go dira ditiro tše ka bolokologi, gomme ka ge ga bjale go na le dikgaruru dikarolong tša ka bohlabela bja naga ye, se le sona se bakile gore Dihlatse di hlaselwe le go feta.