BAFSA BA A BOTŠIŠA
Ke ka Baka la Eng o Swanetše go ya Holong ya Mmušo ya Dihlatse tša Jehofa?
Gabedi ka beke, Dihlatse tša Jehofa di swara diboka tša tšona mafelong a tšona a borapedi ao a bitšwago Diholo tša Mmušo. Ke’ng seo se diregago ge di le moo, gona wena o ka holega bjang ge o ka ya?
Ke’ng seo se diregago Holong ya Mmušo?
Holo ya Mmušo ke lefelo la borapedi leo Dihlatse tša Jehofa di ithutago Beibele go lona. Dilo tšeo di rutwago moo di ka go thuša:
go ithuta nnete ka Modimo.
go kwešiša gore ke ka baka la eng go direga dilo tše mpe mo lefaseng.
go ba motho yo mokaone.
go ba le bagwera ba nnete.
Na o be o tseba gore mafelo a borapedi a Dihlatse tša Jehofa a bitšwa Diholo tša Mmušo ka gore mafelong ao, go bolelwa kudu ka Mmušo wa Modimo?—Mateo 6:9, 10; 24:14; Luka 4:43.
Ke ka baka la’ng o swanetše go ya Holong ya Mmušo?
Seo o tlago go ithuta sona moo, se ka go thuša. Ge Dihlatse tša Jehofa di le Diholong tša tšona tša Mmušo di bolela ka melao ya Beibele, yeo e tlago go go thuša gore o ‘hwetše bohlale.’ (Diema 4:5) Se se bolela gore Beibele e ka go thuša gore o dire diphetho tše dibotse mo bophelong. E ka go thuša le gore o hwetše dikarabo tša dipotšišo tše bohlokwa tša go swana le tše di rego:
Dihlogo tše di latelago, ke tše dingwe tša tšeo re bolelago ka tšona dibokeng tša rena tša mafelobeke:
Ke ka Baka la’ng o Swanetše go Hlahlwa ke Beibele?
O ka Hwetša Kae Thušo Dinakong tša Mathata?
Ke’ng Seo Mmušo wa Modimo o re Direlago Sona Gona Bjale?
Brenda o re: “Morutwana yo mongwe yoo ke bego ke tsena le yena ka klaseng o ile a tla go se sengwe sa diboka tša rena. O ile a dula le lapa la gešo, gomme ra badišana le yena dipuku tšeo re bego re di swere. Ka morago ga gore a tle dibokeng tšeo, o ile a mpotša gore o ile a kgahlwa ke gore batho bao ba bego ba le moo le bona ba be ba tšea karolo ka go nea dikarabo. O ile a bolela le gore kerekeng ya bona, ga ba na dilo tšeo ba di dirišago gore ba ithute Beibele go swana le rena.”
Na o be o tseba? Ge o ka tla Holong ya Mmušo, o tlo tsena mahala, e bile o ka se ntšhe koleke.
O tlo thabela segwera. Beibele e re lebaka leo le dirago gore Bakriste ba bokane gotee ke gore ba ‘kgothatšane.’ (Baheberu 10:24, 25) Lefaseng le, leo batho ba sa ratanego, go a lapološa go ba gare ga batho bao ba ratago Modimo le batho ba bangwe.
Elisa o re: “Ka dinako tše dingwe dilo tšeo di diregago sekolong di mphetša matla e bile di a nnyamiša. Mara ka mehla ge ke le Holong ya Mmušo, ke ba le batho bao ba ntirago gore ke ikwe ke le kaone. Ge ke boela gae, ke ikwa ke thabile e bile ke na le matla a go thoma letšatši le le latelago.”
Na o be o tseba? Go na le diphuthego tše di fetago tše 120 000 tša Dihlatse tša Jehofa lefaseng ka moka, gomme Dihlatse tša Jehofa di bokana gotee mafelong ao a fetago a 60 000. Ka ge palo ya batho bao ba tlago dibokeng e oketšega, ngwaga o mongwe le o mongwe go agwa Diholo tša Mmušo tšeo e ka bago tše 1 500. a
a Gore o hwetše diboka tša kgauswi le moo o lego gona, eya go jw.org/nso, o ye go “Diboka tša Phuthego tša Dihlatse tša Jehofa,” gomme o kgotle mo go rego, “Hwetša Lefelo la Kgauswi le mo o Lego Gona.”
You May Also Like
SEO DITHAKA TŠA GAGO DI SE BOLELAGO
Beibele e ka Nthuša Bjang?
Karabo ya yona e ka go thuša gore o be le bophelo bjo bo thabišago.
DIPOTŠIŠO TŠA BEIBELE DI A ARABJA
Na go a Hlokagala Gore Motho e be Setho sa Bodumedi bjo Itšego?
Na go a kgonega gore motho a rapele Modimo ntle le go tsena kereke e itšego?
