Pono e Fošagetšego: Modimo o thomile Sabatha ge a be a khutša ka letšatši la bošupa.

 Therešo: Beibele e re: “Me ‘tšatši la xo šupa Modimo ó le šexofaditše a le dira le lekxêthwa, ka xobane ka lôna ó khutšitše à feditše modirô wa xaxwe ka moka wa thlôlô wo a o dirilexo.” (Genesi 2:3, Beibele ya Sepedi) Temana ye ga e bolele ka molao woo Modimo a bego a o neile batho, eupša e re botša seo Modimo a se dirilego ka letšatši la bošupa la tlholo. Beibele ga e bolele ka motho le ge e le ofe yoo a kilego a boloka Sabatha ya go khutša pele ga mehla ya Moshe.

 Pono e Fošagetšego: Baisiraele ba be ba dutše ba le ka tlase ga molao wa Sabatha le pele ba amogela Molao wa Moshe.

 Therešo: Moshe o boditše Baisiraele gore: “Jehofa Modimo wa rena o dirile kgwerano le rena kua Horebe,” lefelo leo le lego tikologong ya Thaba ya Sinai. Kgwerano ye e be e akaretša molao wa Sabatha. (Doiteronomio 5:15) Tsela yeo Baisiraele ba bego ba dira Sabatha ka yona e be e bontšha gore ke selo se sefsa go bona. Ge e ba Baisiraele ba be ba dutše ba le ka tlase ga molao wa Sabatha ge ba be ba sa le Egipita, Sabatha e be e tla ba gopotša bjang ka go phološwa ga bona Egipita go etša ge Modimo a itše e tla ba gopotša? (Doiteronomio 5:15) Ke ka baka la’ng ba ile ba botšwa gore ba se tope manna ka letšatši la bošupa? (Ekisodo 16:25-30) Le gona ke ka baka la’ng ba be ba sa tsebe gore ba swaragane bjang le molato wa pele wa motho yoo a ilego a tshela molao wa Sabatha?—Numeri 15:32-36.

 Pono e Fošagetšego: Sabatha ke kgwerano e sa felego ka gona go sa letetšwe gore e bolokwe.

 Therešo: Dibeibele tše dingwe ga di bolele ka Sabatha e le “kxwêranô e sa felexo.” (Ekisodo 31:16, Beibele ya Sepedi) Lega go le bjalo, lentšu la Seheberu leo le fetoletšwego e le “felego” le ka bolela gape gore “go ya go ile.” Ka mohlala, Beibele e diriša mantšu a swanago ge e hlalosa boperisita bja Baisiraele, bjo Modimo a bo fedišitšego mo e ka bago mengwaga e 2 000 e fetilego.—Ekisodo 40:15; Baheberu 7:11, 12.

 Pono e Fošagetšego: Bakriste ba swanetše go boloka Sabatha, go etša ge Jesu a ile a e boloka.

 Therešo: Jesu o bolokile Sabatha ka baka la gore e be e le Mojuda, o be a tlangwa ke Molao wa Moshe go tloga ge a belegwa. (Bagalatia 4:4) Ka morago ga lehu la Jesu, kgwerano ye ya Molao—go akaretša le Sabatha—e ile ya se sa šoma.—Bakolose 2:13, 14.

 Pono e Fošagetšego: Moapostola Paulo o ile a boloka Sabatha ka ge e be e le Mokriste.

 Therešo: Paulo o ile a tsena ka sinagogeng ka Sabatha, eupša o be a sa ye go keteka Sabatha le Bajuda. (Ditiro 13:14; 17:1-3; 18:4) Go ena le moo, a latela motlwae wa nakong yeo, o ile a bolela ditaba tše dibotse disinagogeng, go etša ge seboledi sa moeng se ka laletšwa go tlo nea polelo bathong bao ba bokanego bakeng sa borapedi. (Ditiro 13:15, 32) Paulo o be a bolela ka molaetša wa Mmušo “letšatši le lengwe le le lengwe,” e sego feela ka Sabatha.—Ditiro 17:17.

 Pono e Fošagetšego: Sabatha ya Bakriste e ka Sontaga.

 Therešo: Ga gona moo Beibele e neago taelo ya gore Bakriste ba swanetše go beela Sontaga ka thoko, e lego letšatši la pele la beke bakeng sa go Khutša goba borapedi. Go Bakriste ba pele, Sontaga e be e swana le matšatši a mangwe ka moka. The International Standard Bible Encyclopedia e re: “Sontaga se thomile go tšewa e le letšatši la Sabatha go thoma lekgolong la bone la nywaga, nakong ya ge [mmušiši wa Moroma wa moheitene] Constantine a ntšha taelo ya gore mešomo e mengwe ga se ya swanelwa go dirwa ka Sontaga.” a

 Ka gona go thweng ka ditemana tšeo di bontšhago e ka Sontaga ke letšatši leo le kgethegilego? Beibele e re moapostola Paulo o ile a ja le badumedi gotee le yena “letšatšing la pele la beke,” e lego Sontaga, ka gona se se a kwagala, ka ge Paulo a be a sepela letšatšing le le latelago. (Ditiro 20:7) Ka mo go swanago, diphuthego tše dingwe di be di boditšwe go beela meneelo ka thoko “letšatšing la pele la beke e nngwe le e nngwe,” e lego Sontaga, bakeng sa mošomo wa tlhakodišo, eupša se e be e le tšhišinyo ya kamoo ba ka dirišago tšhelete gabotse. Meneelo e be e bewa magaeng, e sego lefelong la diboka.—1 Bakorinthe 16:1, 2.