Banefilimi e be e le Bomang?
Karabo ya Beibele
Banefilimi e be e le batho ba ba telele, e le dinatla e bile ba le bogale. E be e le bana ba barongwa ba babe bao ba ilego ba robala le basadi ba mo lefaseng mehleng ya Noa. a
Beibele e re “barwa ba Modimo wa therešo ba [ile ba] lemoga gore barwedi ba batho e be e le ba babotse.” (Genesi 6:2) Ge e le gabotse ‘barwa bao ba Modimo’ e be e le dibopiwa tša moya tšeo di ilego tša hlanogela Modimo ge di be di ‘tlogela bodulo bja tšona bjo bo swanetšego’ legodimong. Di ile tša ikapeša mebele ya batho gomme tša ‘itšeela basadi bohle bao di ikgethelago bona.’—Juda 6; Genesi 6:2.
Bana ba ba barongwa le batho ba be ba sa swane le bana ba bangwe. (Genesi 6:4) Banefilimi e be e le dinatla tša go tlaiša batho, e le bagale bao ba ilego ba tlatša lefase ka bošoro. (Genesi 6:13) Beibele e ba hlalosa ka gore ke “bagale, banna ba go tuma bao ba phetšego mehleng ya bogologolo.” (Genesi 6:4) Lehono batho ba dira bošoro e bile ba tšhošetša batho ba bangwe go swana le Banefilimi.—Genesi 6:5; Numeri 13:33. b
Maaka ao a bolelwago ka Banefilimi
Maaka: Banefilimi ba sa le gona lehono.
Therešo: Jehofa o ile a fediša Banefilimi bao ka meetsefula. Ba ile ba fedišwa le batho ka moka bao ba bego ba dira dilo tše mpe. Eupša Jehofa o ile a kgahlwa ke Noa le ba lapa la gagwe, gomme ke bona feela bao ba ilego ba se fedišwe nakong yeo.—Genesi 6:9; 7:12, 13, 23; 2 Petro 2:5.
Maaka: Botatago Banefilimi e be e le batho.
Therešo: Botatago bona ba bitšwa “barwa ba Modimo wa therešo.” (Genesi 6:2) Beibele e diriša polelwana yona ye go hlalosa barongwa. (Jobo 1:6; 2:1; 38:7) Barongwa ba be ba na le matla a go iphetoša batho. (Genesi 19:1-5; Joshua 5:13-15) Moapostola Petro o boletše ka “meoya yeo e bego e le kgolegong, yeo e kilego ya se kwe ge Modimo a be a letile ka go se fele pelo mehleng ya Noa.” (1 Petro 3:19, 20) Mongwadi yo mongwe wa Beibele e lego Juda o ile a hlalosa boemo bjo bo swanago ka gore barongwa ba bangwe ga se “ba boloka boemo bja bona bja pele, eupša ba tlogetše bodulo bja bona bjo bo swanetšego.”—Juda 6.
Maaka: Banefilimi e be e le barongwa bao ba welego legodimong.
Therešo: Ditemana tšeo di lego pele ga Genesi 6:4 di bontšha gore Banefilimi e be e se barongwa, eupša e be e le bana ba basadi bao ba ilego ba robala le barongwa bao ba bego ba ikapešitše mebele ya batho. Ka morago ga gore barongwa bao ‘ba itšeele basadi bohle bao ba ikgethelago bona,’ Jehofa o ile a re ka morago ga mengwaga e 120 o be a tla fediša batho bao ba bego ba sa mo hlankele. (Genesi 6:1-3) Beibele e oketša ka gore “mehleng yeo,” barongwa bao ba bego ba ikapešitše mebele ya batho ba ile “ba robala le barwedi ba batho” gomme ba belega ‘bagale bao ba phetšego mehleng ya bogologolo,’ e lego Banefilimi.—Genesi 6:4.
a Lentšu la Seheberu leo le pedifaditšwego ka gore “Banefilimi” le ka ba le era gore “Bao ba Wišago ba Bangwe.” Puku ya go hlalosa mantšu a ka Beibeleng yeo e bitšwago Wilson’s Old Testament Word Studies e re lentšu le le šupa go bao “ba welago batho ka bošoro le ka go ba amoga dilo [hlothola], gomme ba dira gore ba we.”
b Go bonagala Baisiraele bao go bolelwago ka bona go Numeri 13:33, ba ile ba bona batho bao leemo la bona le ilego la ba gopotša ka dilo tšeo ba bego ba di kwele ka Banefilimi bao e bego e le kgale ba hwile.—Genesi 7:21-23.
You May Also Like
MOROKAMI
“Noa o be a Sepela le Modimo wa Therešo”
Re ka ithuta’ng go Noa, mosadi wa gagwe le ba lapa la bona?
MABAPI LE RENA
Kgopela Thuto ya Mahala ya Beibele
Ithute Beibele, goba o ithute ka mo go oketšegilego ka Dihlatse tša Jehofa.