Batho ba bantši ba lebelela sefapano e le leswao le le tlwaelegilego la Bokriste. Lega go le bjalo, Beibele ga e hlalose selo seo se dirišitšwego lehung la Jesu, ka baka leo ga go motho yo a ka tsebago sebopego sa sona ka go lebanya. Go dutše go le bjalo, Beibele e nea bohlatse bja gore Jesu ga se a hwela sefapanong, eupša o hwetše koteng.

 Gantši Beibele e diriša lentšu la Segerika e lego stau·rosʹ ge e bolela ka selo seo Jesu a hwetšego go sona. (Mateo 27:40; Johane 19:17) Gaešita le ge bafetoledi ba ile ba diriša lentšu “sefapano,” diithuti tše dintši di dumela gore ge e le gabotse le šupa go “kota.” a Go ya ka A Critical Lexicon and Concordance to the English and Greek New Testament, lentšu stau·rosʹ “ga le šupe go dikota tše pedi tšeo di fapantšwego.”

 Beibele gape e diriša lentšu la Segerika e lego xyʹlon e le lehlalosetšagotee la lentšu stau·rosʹ. (Ditiro 5:30; 1 Petro 2:24) Lentšu le le šupa go “lepolanka,” “legong,” “kota” goba “mohlare.” b Ke ka baka leo The Companion Bible e phethago ka gore: “Ga go lentšu leo ka go Testamente e Mpsha ya Segerika le šupago go dikota tše pedi tšeo di fapantšwego.”

Na Modimo o dumela gore re diriše sefapano ge re rapela?

 Go sa šetšwe gore Jesu o hwetše godimo ga eng, ditherešo tše di latelago le ditemana tša Beibele di bontšha gore ga se ra swanela go diriša sefapano ge re rapela.

1.   Modimo o gana borapedi bjo bo dirišago diswantšho, go akaretša le sefapano. Modimo o laetše Baisiraele gore ba se diriše “seswantšho se se betlilwego sa sebopego le ge e le sefe” ge ba rapela, Bakriste ka mo go swanago ba kgothaletšwa gore ba ‘tšhabe borapedi bja medimo ya diswantšho.’—Doiteronomio 4:15-19; 1 Bakorinthe 10:14.

2.   Bakriste ba lekgolong la pele la nywaga ga se ba diriša sefapano ge ba rapela. c Dithuto le mokgwa wa baapostola o beela Bakriste mohlala woo ba swanetšego go o latela.—2 Bathesalonika 2:15.

3.   Go dirišwa ga sefapano borapeding go thomile boheiteneng. d Nywaga e makgolo ka morago ga lehu la Jesu, ge dikereke di be di aroga dithutong tša gagwe, ditho tše difsa tša kereke “di ile tša dumelelwa kudu go dula di na le maswao a tšona a boheitene,” go akaretša le sefapano. (The Expanded Vine’s Expository Dictionary of New Testament Words) Lega go le bjalo, Beibele ga e dumele gore ge motho a fetoga Mokriste o swanetše go tšwela pele a diriša maswao a boheitene.—2 Bakorinthe 6:17.