Sebe seo se ka se lebalelwego ke ditiro tšeo di sepedišanago le mokgwa woo o dirago gore motho yo a dirilego sebe a se tsoge a lebaletšwe ke Modimo. Mokgwa woo o ka hlolwa ke eng?

 Modimo o lebalela batho bao ba itsholago dibeng tša bona, ba latela melao ya gagwe maphelong a bona ke moka ba bontšha tumelo go Jesu Kriste. (Ditiro 3:​19, 20) Lega go le bjalo, motho a ka tlwaela go dira sebe moo e lego gore a ka se tsoge a tlogetše mokgwa wa gagwe. Beibele e hlalosa motho yo bjalo gore o na le “pelo e kgopo” yeo e “[thatafaditšwego] ke matla a forago a sebe.” (Baheberu 3:​12, 13) Go no swana le letsopa leo le ilego la bešwa ka obeneng le leo le ka se tsogego la fetošwa ka tsela e itšego, pelo ya motho yoo e sekametše go ganetša Modimo, e ka se fetoge. (Jesaya 45:9) Go ka se be le lebaka la gore motho yo bjalo a lebalelwe, ka gona o dirile sebe seo se ka se lebalelwego.​—Baheberu 10:26, 27.

 Baetapele ba bangwe ba bodumedi ba Bajuda mehleng ya Jesu ba ile ba dira sebe seo se ka se lebalelwego. Ba be ba tseba gore Jesu o be a thušwa ke moya o mokgethwa wa Modimo ge a be a dira mehlolo, lega go le bjalo, ba ile ba bolela gampe gore matla ao a bego a a diriša a tšwa go Sathane Diabolo.​—Mareka 3:22, 28-30.

Mehlala ya dibe tšeo di ka lebalelwago

•  Go ba morogaki o sa tsebe. Moapostola Paulo o kile a ba morogaki, eupša ka morago o ile a re: “Ke gaugetšwe, gobane ke dirile ka go se tsebe le ka go hloka tumelo.”​—1 Timotheo 1:13.

•  Bohlotlolo. Beibele e bolela ka batho ba bangwe bao ba kilego ba dira bohlotlolo eupša ka morago ba itshola gomme Modimo a ba lebalela.​—1 Bakorinthe 6:9-11.

“Na ke dirile sebe seo se ka se lebalelwego?”

 Ge e ba o tloga o hloile sebe seo o se dirilego nakong e fetilego gomme o nyaka go fetoga, gona ga se wa dira sebe seo se ka se lebalelwego. Modimo a ka lebalela motho le ge a dira sebe setee gantši ge feela motho yoo pelo ya gagwe e itshola.​—Diema 24:16.

 Batho ba bangwe ba ka nagana gore ba ka ba ba dirile sebe seo se ka se lebalelwego ka gobane ba tshwenywa ke maikwelo a go ba molato. Lega go le bjalo, Beibele e re ruta gore ga se ka mehla moo re ka tshepago maikwelo a rena. (Jeremia 17:9) Modimo ga se a re dumelela gore re ahlole batho ba bangwe—le ge e ka ba go ikahlola. (Baroma 14:​4, 12) A ka re lebalela le ge dipelo tša rena di re ahlola.​—1 Johane 3:​19, 20.

Na Judase Isikariote o dirile sebe seo se ka se lebalelwego?

 Ee. Megabaru ya gagwe e ile ya mo dira gore a utswe tšhelete yeo e bego e neetšwe gore e phethe modiro o mokgethwa. E bile o ile a itira okare o be a tshwenyegile ka badiidi mola maikemišetšo a gagwe e be e le gore go tlišwe tšhelete e ntši gore a e utswe. (Johane 12:​4-8) Ge pelo ya Judase e be e šetše e tlwaetše go dira sebe, o ile a eka Jesu ka ditsekana tše 30 tša silifera. Jesu o be a tseba gore Judase a ka se tsoge a itsholela seo a se dirilego, le gona o ile a mmitša “morwa wa tshenyego.” (Johane 17:12) Se se be se bolela gore ge Judase a be a ehwa, o ile a hwela sa ruri, a ka se tsošwe.​—Mareka 14:21.

 Judase ga se a ka a bontšha gore o itshola e le ka nnete gore o dirile sebe. O ile a se ipobole go Modimo, eupša a ipobola go baetapele ba bodumedi bao a bego a dirišana le bona.​—Mateo 27:3-5; 2 Bakorinthe 7:​10.