“‘Nna ke tseba gabotse menagano yeo ke e naganago ka lena,’ o re’alo Jehofa, a ‘e lego menagano ya khutšo, e sego ya bošula, gore ke le nee bokamoso le kholofelo.’”—Jeremia 29:11, Phetolelo ya Lefase le Lefsa.

 “‘Gobane megopolo ye ke le gopolago ka yona, ke a e tseba. O re‘alo Morena. Ke megopolo ya molao, ga se ya bošula; ke ya gore ke le nee tše di tlago, tše le di holofetšego.’”—Jeremia 29:11, Beibele ya Sepedi.

 Jehofa Modimo o ile a tshepiša bahlanka ba gagwe gore o be a tlo ba direla dilo tše dibotse nakong e tlago. Le ge mantšu a a lego temaneng ye a be a ngwaletšwe bahlanka ba gagwe ba kgale, le rena lehono a sa re ama. Jehofa ke “Modimo yo a neago kholofelo.” (Baroma 15:13) Ke ka baka leo a ilego a dira gore go ngwalwe ditshepišo tše dintši ka Beibeleng tša go swana le yeo go bolelwago ka yona temaneng ye gore “re be le kholofelo” ya dilo tšeo a tlago go re direla nakong e tlago.—Baroma 15:4.

 Mantšu a a lego temaneng ye e be e le a mangwe a mantšu ao moporofeta Jeremia a ilego a a ngwalela Baisiraele bao ba bego ba išitšwe bothopša Babilona. b (Jeremia 29:1) Modimo o ile a botša Baisiraele bao ba bego ba le bothopša gore ba be ba tlo dula moo nako e telele. Ka gona ba be ba swanetše gore ba age dintlo, ba bjale dirapa e bile ba be le bana. (Jeremia 29:4-9) Eupša Modimo o ile a oketša ka gore: “Ge nywaga e masomešupa e fedile le le Babilona, ke tla le šetša gomme ka phethagatša lentšu la ka le lebotse go lena ka go le bušetša [Jerusalema].” (Jeremia 29:10) Ka gona Modimo o ile a kgonthišetša batho ba gagwe gore o be a ka se ba lebale le gore o be a tla phethagatša tshepišo ya gagwe ya gore o be a tla ba bušetša Jerusalema.—Jeremia 31:16, 17.

 Modimo o ile a dira seo a bego a se tshepišitše Baisiraele. O ile a bolela e sa le pele gore Korese yoo e bego e le Kgoši ya Peresia o be a tlo fediša Babilona, gomme go ile gwa direga sona seo. (Jesaya 45:1, 2; Jeremia 51:30-32) Ka morago ga moo, Korese o ile a dumelela Bajuda gore ba boele ga gabo bona. Ka morago ga mengwaga e 70 ba le bothopša, ba ile ba boela Jerusalema.—2 Dikoronika 36:20-23; Esera 3:1.

 Ka ge Modimo a ile a dira seo a bego a se tshepišitše Baisiraele go Jeremia 29:11, le lehono bahlanka ba gagwe ba na le kholofelo ya gore Modimo o tlo ba direla dilo tšeo a ba tshepišitšego tšona. E nngwe ya ditshepišo tše ke gore ge go tla be go buša Mmušo wa Modimo woo kgoši ya wona e lego Kriste Jesu, go tla ba le khutšo lefaseng ka moka.—Psalme 37:10, 11, 29; Jesaya 55:11; Mateo 6:10.

 Maaka: Modimo o tla fa batho bao ba mo hlankelago mahumo.

 Nnete: Lentšu “mahumo” leo le tšwelelago ka Dibeibeleng tše dingwe go Jeremia 29:11 le fetoletšwe go tšwa lentšung la Seheberu leo le bolelago gore “khutšo, go se babje le go ipshina ka bophelo.” Go ya ka ditemana tšeo di sepedišanago le temana ye, Modimo o be a sa tshepiša Baisiraele bao ba bego ba le bothopša gore o be a tla ba fa mahumo, eupša o be a ba tshepišitše gore o be a tla dira gore ba be le khutšo le go ipshina ka bophelo. Le gona o be a ba tshepišitše gore setšhaba sa bona se tla dula se le gona le gore ka letšatši le lengwe ba be ba tla boela Jerusalema.—Jeremia 29:4-10.