Puku ya Pele ya Dikgoši 8:1-66
8 Ka nako yeo Solomone a kgoboketša banna ba bagolo ba Isiraele, dihlogo ka moka tša meloko ya bona, e lego baetapele ba malapa a borakgolokhukhu ba bona ba Baisiraele. Ba tšea Areka ya kgwerano ya Jehofa Motseng wa Dafida, ke gore Tsione, ba e iša Jerusalema go Kgoši Solomone.
2 Banna ka moka ba Isiraele ba kgobokana pele ga Kgoši Solomone nakong ya monyanya wa kgwedi ya Ethanima, e lego kgwedi ya bošupa.
3 Ka gona banna ba bagolo ka moka ba Isiraele ba tla gomme baperisita ba rwala Areka.
4 Ba tliša areka ya Jehofa, tente ya kopano le dibjana ka moka tše kgethwa tšeo di bego di le ka tenteng. Tšona di tlišitšwe ke baperisita le Balefi.
5 Kgoši Solomone o be a le pele ga Areka a na le setšhaba ka moka sa Isiraele seo se bego se laetšwe gore se tle se kopane le yena. Go ile gwa dirwa dihlabelo ka dikgomo le dinku tše dintšhi tšeo di bego di sa balege.
6 Ke moka baperisita ba tliša areka ya kgwerano ya Jehofa lefelong la yona, ka phapošing ya ka garegare ya ntlo, e lego ka Sekgethwakgethweng. Ba e bea ka fase ga maphego a bakerubi.
7 Maphego a bakerubi a be a phurolletšwe ka godimo ga lefelo leo go bego go dutše Areka, moo ba bego ba šireleditše Areka le dikota tša yona.
8 Dikota tša yona e be e le tše ditelele kudu, moo dintlhana tša tšona di bego di bonagala ge o le ka Sekgethweng seo se bego se le ka pele ga phapoši ya ka garegare, eupša di be di sa bonagale ge o le ka ntle. Di sa dutše di le bjalo go fihla le lehono.
9 Go be go se na selo ka Arekeng ge e se diphaphathi tše pedi tša maswika tšeo Moshe a bego a di beile kamoo ge a be a le Horebe, ge Jehofa a be a dira kgwerano le setšhaba sa Isiraele ge se be se etšwa nageng ya Egepeta.
10 Ge baperisita ba etšwa lefelong le lekgethwa, leru la khupetša ntlo ya Jehofa ka ntle le ka gare.
11 Baperisita ba be ba sa kgone go ema moo gore ba dire mešomo ya bona ka baka la leru ka gobane letago la Jehofa le be le khupeditše ntlo ya Jehofa.
12 Ka yona nako yeo Solomone a re: “Jehofa o itše o tla dula leswiswing le lesoleso.
13 Ke go agetše ntlo ya maemo a godimo, e lego lefelo leo o tlago go dula go lona go ya go ile.”
14 Ke moka kgoši ya retologa ya thoma go šegofatša setšhaba ka moka sa Isiraele mola setšhaba ka moka sa Isiraele se be se eme.
15 Ya re: “A go retwe Jehofa Modimo wa Isiraele, yena yoo ka molomo wa gagwe a tshepišitšego tate, e lego Dafida gomme a phetha seo a se tshepišitšego,* a re:
16 ‘Go tloga letšatšing leo ke ntšhitšego setšhaba sa ka sa Isiraele Egepeta, melokong ka moka ya Isiraele ga se ka kgetha motse woo go wona go ka agelwago ntlo yeo e tlago go dira gore leina la ka le retwe. Eupša ke kgethile Dafida gore a buše setšhaba sa ka sa Isiraele.’
17 Dafida tate o be a ratile ka pelo ya gagwe ka moka go aga ntlo yeo e tlago go dira gore leina la Jehofa Modimo wa Isiraele le retwe.
18 Eupša Jehofa a re go Dafida tate: ‘O be o ratile ka pelo ya gago ka moka go agela leina la ka ntlo. Ruri ke mo gobotse gore o be o kganyoga go dira bjalo.
19 Lega go le bjalo wena o ka se age ntlo yeo, eupša e tla agwa ke morwa wa gago yoo o tlago go mmelegelwa.’*
20 Jehofa o phethile tshepišo yeo a e dirilego ka gobane ke hlatlame Dafida tate gomme ka dula setulong sa bogoši sa Isiraele go etša ge Jehofa a be a tshepišitše. Le gona ke agetše Jehofa Modimo wa Isiraele ntlo yeo e tlago go dira gore leina la gagwe le retwe,
21 gomme ka dira gore go be le lefelo leo go dulago Areka yeo e swerego kgwerano yeo Jehofa a e dirilego le borakgolokhukhu ba rena ge a be a ba ntšha nageng ya Egepeta.”
22 Ke moka Solomone a ema pele ga aletare ya Jehofa ka pele ga setšhaba ka moka sa Isiraele, a emišetša matsogo a gagwe godimo,
23 a re: “Wena Jehofa Modimo wa Isiraele, ga go na Modimo yo a swanago le wena godimo magodimong goba fase lefaseng. O boloka kgwerano e bile o bontšha bahlanka ba gago bao ba go hlankelago ka dipelo tša bona ka moka gore o a ba rata.*
24 O phethile* seo o bego o se tshepišitše Dafida tate, yoo e lego mohlanka wa gago. O mo tshepišitše ka molomo wa gago gomme lehono o phethile seo o mo tshepišitšego sona.
25 Bjale wena Jehofa Modimo wa Isiraele, phetha se o se tshepišitšego Dafida tate, yena mohlanka wa gago ge o be o re: ‘Ge feela barwa ba gago ba ka phela ka tsela yeo ke nyakago gore ba phele ka yona, go swana le ge wena o dirile, molokong wa gago go ka se hlokwe monna yo a ka dulago setulong sa bogoši sa Isiraele.’
26 Bjale wena Modimo wa Isiraele, hle anke o phethagatše seo o se tshepišitšego Dafida tate mohlanka wa gago.
27 “Eupša na wena Modimo ruri o ka dula lefaseng? Bona! Gaešita le legodimo, lona legodimo la magodimo ga le kgone go go lekana. Bjale ntlo ye ke go agetšego yona e tla go lekana bjang!
28 Hle Jehofa Modimo wa ka, theetša thapelo ya ka le kgopelo ya ka ya gore o nkgaugele, nna mohlanka wa gago. O theetše le sello sa ge ke go llela gore o nthuše gotee le thapelo yeo nna mohlanka wa gago ke e rapelago pele ga gago lehono.
29 Anke mahlo a gago a dule a lebeletše ntlo ye bošego le mosegare, e lego lefelo leo o boletšego ka lona wa re: ‘Leina la ka le tla ba moo,’ gore o theetše thapelo yeo nna mohlanka wa gago ke e rapelago ke lebeletše lefelong le.
30 Anke o theetše ge nna mohlanka wa gago ke kgopela gore o nkgaugele, o be o theetše kgopelo ya setšhaba sa Isiraele ge se rapela se lebeletše lefelong le. Anke o kwe o le lefelong leo o dulago go lona magodimong. O re kwe o be o re lebalele.
31 “Ge motho a ka senyetša wa gabo gomme a gapeletšwa go dira keno* ke moka a re a le ka tlase ga keno yeo a tla pele ga aletare ya gago ka ntlong ye,
32 gona anke wena o kwe o le magodimong, gomme o ahlole bahlanka ba gago ka go bolela gore yo mobe o na le molato gomme o mo dire gore a ikarabele ka dilo tšeo a di dirilego, le ka go bolela gore wa go loka ga a na molato gomme o mo putse ka baka la dilo tša go loka tšeo a di dirilego.
33 “Ge setšhaba sa gago sa Isiraele se ka fenywa ke manaba a sona ka ge se dulela go go direla sebe, eupša sa boela go wena, sa reta leina la gago, gomme sa rapela sa go kgopela gore o se gaugele se le ka ntlong ye,
34 gona anke o se kwe o le magodimong gomme o se lebalele sebe sa sona ke moka o se bušetše nageng yeo o e filego borakgolokhukhu ba sona.
35 “Ge magodimo a ka tswalelwa gomme pula ya se ne ka ge setšhaba se dulela go go direla sebe, gomme sa rapela se lebeletše lefelong le, sa reta leina la gago sa ba sa itsholela sebe sa sona ka ge o ile wa se kokobetša,
36 gona anke o kwe o le magodimong gomme o lebalele bahlanka ba gago sebe sa bona, sona setšhaba sa Isiraele, ka gobane o se ruta tsela e botse yeo se swanetšego go sepela go yona gomme wa neša pula nageng yeo o e filego setšhaba sa gago e le bohwa.
37 “Ge nageng go ka wa tlala goba gwa ba le leuba la bolwetši, goba ge dibjalo di ka thoma go omelela, goba tša senywa ke phišo e kgolo goba ditšie tše dintšhi goba ge e ba manaba a bona a ka ba tswalelela go o mongwe wa metse yeo e lego nageng yeo goba ge ba ka welwa ke mohuta le ge e le ofe wa kotlo goba wa bolwetši,
38 gona thapelo le ge e le efe goba kgopelo le ge e le efe ya go gaugelwa yeo e ka dirwago ke motho le ge e le ofe goba setšhaba sa gago ka moka sa Isiraele (ka gobane motho yo mongwe le yo mongwe o tseba bohloko bjo bo lego pelong ya gagwe) ge ba rapela ba emišeditše diatla tša bona godimo ba lebeletše ntlong ye,
39 gona anke o kwe o le magodimong moo o dulago gona, o ba lebalele o be o ba thuše. Ke moka o putse yo mongwe le yo mongwe go ya ka dilo ka moka tšeo a di dirilego, ka gobane o tseba dipelo tša bona (ke wena feela o tlogago o tseba pelo ya motho yo mongwe le yo mongwe),
40 e le gore ba go boife bophelo bja bona ka moka ge ba phela nageng yeo o e neilego borakgolokhukhu ba rena.
41 “Le gona, ge motho yo a tšwago nageng e nngwe, yoo e sego wa setšhaba sa gago sa Isiraele le yoo a tšwago nageng ya kgole gomme a tlile ka baka la ge a kwele ka leina la gago
42 (ka gobane ba tla kwa ka leina la gago le legolo le seatla sa gago se matla gotee le kamoo o ilego wa otlolla seatla sa gago go re o thuše), gomme a tla a go rapela a lebeletše ntlong ye,
43 gona anke o theetše o le magodimong moo o dulago gona gomme o dire dilo ka moka tšeo motho yoo a tšwago nageng e nngwe a go kgopelago tšona, e le gore batho ba lefaseng ka moka ba tsebe leina la gago gomme ba go boife go etša ge setšhaba sa gago sa Isiraele se go boifa. A tsebe le gore leina la gago le be le dutše le bitšwa mo ntlong ye yeo ke e agilego.
44 “Ge setšhaba sa gago se ka ya go lwa le manaba a sona ka tsela yeo o se laetšego ka yona, gomme sa rapela wena Jehofa se lebeletše motse woo o o kgethilego le ntlo ye ke e agetšego leina la gago,
45 gona anke o kwe thapelo ya sona o be o kwe ge se go lopa o le magodimong gomme o se ahlolele.
46 “Ge se ka go direla sebe (ka gobane ga go na motho yo a sa dirego sebe), gomme wena wa se galefela, wa se tlogela gore manaba a sona a se fenye, ke moka bao ba se thopilego ba se iša bothopša nageng ya manaba a sona, e ka ba ya kgole goba ya kgauswi,
47 gomme sa re ge se le nageng yeo se thopetšwego go yona sa fetoša monagano wa sona, sa boela go wena gomme sa go kgopela gore o se gaugele, se le nageng yeo se thopetšwego go yona, sa re: ‘Re dirile sebe, re fošitše e bile re dirile dilo tše mpe,’
48 ke moka sa boela go wena ka dipelo tša sona ka moka le ka moya wa sona ka moka se le nageng ya manaba a sona ao a se thopilego, gomme sa rapela se lebeletše nageng yeo o e filego borakgolokhukhu ba sona le motseng woo o o kgethilego gotee le ntlong yeo ke e agetšego leina la gago,
49 gona anke o kwe thapelo ya sona le kgopelo ya sona ya gore o se gaugele o le magodimong moo o dulago gona gomme o se ahlolele,
50 o be o lebalele setšhaba sa gago seo se go diretšego sebe, o se lebalele le diphošo tšeo se go diretšego tšona. Dira gore bao ba se thopilego ba se kwele bohloko gomme bona ba tla se kwela bohloko
51 (ka gobane ke setšhaba sa gago le bohwa bja gago, sona seo o se ntšhitšego Egepeta tše e kego o be o se ntšha ka gare ga sebešo seo se tološago ditšhipi).
52 Eka o ka nkwa nna mohlanka wa gago ge ke go kgopela gore o nkgaugele, o kwe le kgopelo ya setšhaba sa Isiraele nako le nako ge se go rapela se go kgopela gore o se gaugele.
53 Ka gobane wena Mmuši Morena Jehofa o se kgethile gare ga merafo ka moka ya lefaseng gore e be bohwa bja gago, go etša ge o boletše o diriša Moshe mohlanka wa gago ge o be o ntšha borakgolokhukhu ba rena Egepeta.”
54 Ge Solomone a se na go fetša go rapela Jehofa le go mo kgopela gore a mo gaugele, a ema pele ga aletare ya Jehofa, moo a bego a khuname a emišeditše diatla tša gagwe magodimong,
55 o ile a ema a šegofatša setšhaba ka moka sa Isiraele a bolelela godimo, a re:
56 “A go retwe Jehofa, yena yoo a filego setšhaba sa gagwe sa Isiraele lefelo leo se ka phelago go lona ka khutšo go etša ge a se tshepišitše. Ga go na tshepišo le e tee yeo e sa kago ya phethagala go dilo ka moka tše dibotse tšeo a di tshepišitšego a diriša Moshe mohlanka wa gagwe.
57 Anke Jehofa Modimo wa rena a be le rena, go etša ge a bile le borakgolokhukhu ba rena. Anke a se ke a re tlogela goba a re lahla.
58 Anke a dire gore dipelo tša rena di ineele go yena e le gore re sepele ditseleng tša gagwe ka moka gomme re phele ka go dumelelana le ditaelo tša gagwe, melao ya gagwe le dikahlolo tša gagwe tšeo a laetšego borakgolokhukhu ba rena gore ba di latele.
59 Anke Jehofa Modimo wa rena a dule a gopola mantšu a bošego le mosegare, ona a go kgopela go gaugelwa ke Jehofa e le gore a ahlolele nna mohlanka wa gagwe le go ahlolela setšhaba sa Isiraele letšatši le lengwe le le lengwe,
60 e le gore batho ka moka ba lefaseng ba tsebe gore Jehofa ke Modimo wa nnete. Ga go na yo mongwe.
61 Ka gona, anke le hlankeleng Jehofa ka dipelo tša lena ka moka, gomme le phele ka go dumelelana le melao ya gagwe go etša ge le dira bjalo lehono le.”
62 Bjale kgoši le setšhaba ka moka sa Isiraele seo se bego se na le yona ba dira sehlabelo se segolo pele ga Jehofa.
63 Solomone a direla Jehofa dihlabelo tša mohlakanelwa.* A di dira ka dikgomo tše 22 000 (dikete tše masomepedi-pedi) le dinku tše 120 000 (dikete tše lekgolo-masomepedi). Ka gona kgoši le Baisiraele ka moka ba neela ntlo ya Jehofa.
64 Letšatšing leo kgoši e ile ya swanelwa ke go kgethagatša bogare bja lapa leo le lego pele ga ntlo ya Jehofa, ka gobane gona moo e be e swanetše go dira dihlabelo tša go fišwa, dibego tša mabele le dikarolwana tša makhura tša dihlabelo tša go dira khutšo le Modimo ka gobane aletare ya koporo yeo e bego e le pele ga tempele ya Jehofa e be e le e nyenyane kudu go ka rwala dihlabelo tša go fišwa, dibego tša mabele le dikarolwana tša makhura tša dihlabelo tša go dira khutšo le Modimo.
65 Ka nako yeo, Solomone a keteka monyanya le Baisiraele ka moka. E be e le ba bantšhi gomme ba tlile ba etšwa Lebohamathi go fihla Moeding wa Egepeta. Ba o keteka pele ga Jehofa Modimo wa rena ka matšatši a šupago, le ka a mangwe a šupago. Ka moka ga ona ya ba matšatši a 14.
66 Letšatšing la go latela, kgoši ya laela setšhaba gore se boele magaeng a sona gomme setšhaba sa e šegofatša ke moka sa ya magaeng a sona se thabile e bile dipelo tša sona e le tše tšhweu ka baka la dilo ka moka tše dibotse tšeo Jehofa a di diretšego Dafida mohlanka wa gagwe le setšhaba sa gagwe sa Isiraele.
Mengwalo ya tlase
^ Phetolelo ya lentšu ka lentšu e re, “a phetha ka seatla sa gagwe.”
^ Phetolelo ya lentšu ka lentšu e re, “morwa yoo a tlago go tšwa mathekeng a gago.”
^ Goba, “o bontšha bahlanka ba gago lerato le le botegago .”
^ Phetolelo ya lentšu ka lentšu e re, “O phethile ka seatla sa gago.”
^ Ke gore, “Keno yeo kotlo ya gona e lego thogako ge e ba motho a ka ena ka maaka goba a tshela keno yeo.”
^ Goba, “dihlabelo tša go dira khutšo le Modimo.”
