Puku ya Pele ya Samuele 20:1-42
-
Jonathane o tshepagalela Dafida (1-42)
20 Ka morago ga moo Dafida a tšhaba kua Nayothe ya Rama, ke moka a tla go Jonathane a re go yena: “Ke dirile’ng? Molato wa ka ke’ng le gona ke sebe sefe seo ke se dirilego pele ga tatago ka ge e le mo a nyaka go mpolaya?”
2 Jonathane a re go yena: “Seo se ka se kgonege! O ka se hwe. Tate a ka se dire selo se segolo goba se senyenyane gomme a se mpotše. Le gona tate a ka nkutela bjang taba yeo? Seo se ka se direge.”
3 Dafida a buša a ena a re: “Tatago o tseba gabotse gore wena o a nthata, ka gona o tla re: ‘O se botše Jonathane taba ye ka ge ke boifa gore o tla kwa bohloko.’ Eupša ge e le gabotse ke ikana ka Jehofa yo a phelago le ka wena o phelago gore ke kgauswi kudu le go hwa!”
4 Jonathane a re go Dafida: “Ke tla go direla selo se sengwe le se sengwe seo o se nyakago.”
5 Dafida a re go Jonathane: “Gosasa ke monyanya wa kgwedi e mpsha* gomme ke be ke swanetše go dula le kgoši gore re je. E re ke tšhabe gore ke yo ikuta nageng go fihlela mantšiboeng a letšatši la boraro.
6 Ge tatago a ka botšiša ka nna, wena o re: ‘Dafida o nkgopetše ka pelo ka moka gore a se be gona mo, e le gore a kitimele Betlelehema motseng wa gabo, ka gobane ngwaga le ngwaga lapa la gabo le dira sehlabelo.’
7 Ge e ba a ka re: ‘Ga go na bothata!’ gona nna mohlanka wa gago ga se ka swanela go boifa selo. Eupša ge e ba a ka galefa, o tsebe gore o ikemišeditše go nkweša bohloko.
8 Mpontšhe botho* nna mohlanka wa gago, ka gobane wena o dirile kgwerano le nna mohlanka wa gago pele ga Jehofa. Eupša ge e ba ke le molato, gona mpolaye. O tla ba o sa nkišetša’ng go tatago?”
9 Ge a re’alo Jonathane a re: “O se ke wa ba wa nagana ka taba yeo! Ge nkabe ke tsebile gore tate o ikemišeditše go go kweša bohloko, na ke be nka se go botše?”
10 Ke moka Dafida a re go Jonathane: “Ke mang yo a ka mpotšago ge e ba tatago a nkwatetše?”
11 Jonathane a re go Dafida: “A re ye nageng.” Ke moka bobedi bja bona ba ya nageng.
12 Jonathane a re go Dafida: “Anke Jehofa Modimo wa Isiraele e be yena hlatse ya gore ke tla botšiša tate ka yona nako ye gosasa goba ka letšatši la boraro. Ge e ba a kwana le tša gago, gona ke tla go romela molaetša.
13 Eupša ge e ba tate a nyaka go go kweša bohloko, gona anke Jehofa a otle nna Jonathane a be a oketše kotlo yeo, ge e ba nka se go botše seo e le gore o tšhabele lefelong leo le šireletšegilego. Anke Jehofa a be le wena go swana le ge a ile a ba le tate.
14 Na o ka se mpontšhe botho* bjo bo swanago le bja Jehofa, go sa šetšwe gore ke a phela goba ke a hwa?
15 Le gona, o se ke wa kgaotša go bontšha ba lapa la gešo botho* le ge Jehofa a ka fediša manaba a gago ka moka.”
16 Ke moka Jonathane a dira kgwerano le ba lapa la Dafida, a re: “Jehofa o tla dira gore manaba a Dafida a ikarabele.”
17 Jonathane a kgopela Dafida gore a tiišetše keno ya segwera sa bona, ka gobane o be a rata Dafida go etša ge a ithata.
18 Jonathane a re go yena: “Gosasa ke monyanya wa kgwedi e mpsha. Tate o tla botšiša ka wena ka gobane setulo sa gago se tla be se se na motho.
19 Tate o tla botšiša ka wena gape ka letšatši la boraro, le gona o boele moo o bego o ikutile gona gomme o dule kgauswi le leswika le.
20 Nna ke tla thuntšha mesebe e meraro ka lehlakoreng letee la leswika gomme ka e thuntšha tše e kego ke be ke thuntšha selo se sengwe.
21 Ge ke roma mohlanka ke tla re: ‘Sepela o yo tšea mesebe yela.’ Ge e ba nkare go yena: ‘Mesebe e moo kgauswi le wena, e tšee,’ gona wena o tle, ka gobane ke ikana ka Jehofa yo a phelago gore seo se tla be se bolela gore dilo di tla ba di sepela gabotse le gore ga go na kotsi.
22 Eupša ge e ba nkare go mohlanka: ‘Mesebe ke yela kua pele ga gago,’ gona o tšhabe ka gobane Jehofa o nyaka gore o tšhabe.
23 Ge e le tshepišo yeo nna le wena re e dirilego, anke Jehofa e be hlatse ya rena go ya go ile.”
24 Ke moka Dafida a ikuta nageng. Ge monyanya wa kgwedi e mpsha o thoma, kgoši e ile ya dula setulong sa yona gore e je.
25 Kgoši e be e dutše setulong sa yona bjalo ka mehleng, seo se bego se le lebotong, e lebane le Jonathane gomme Abenere a dutše kgauswi le Saulo, eupša mo Dafida a bego a dula gona go be go se na motho.
26 Saulo ga se a bolela selo letšatšing leo, ka gobane o be a ipotša gore: “Go na le selo seo se dirilego gore a se ke a hlweka, o swanetše go ba a se a hlweka.”
27 Letšatšing la bobedi,* setulo sa Dafida se be se sa dutše se se na motho. Ke moka Saulo a botšiša Jonathane a re: “Ke ka baka la’ng morwa wa Jese a se a tla dijong maabane le lehono?”
28 Jonathane a araba a re: “Dafida o nkgopetše ka pelo ka moka gore o nyaka go ya Betlelehema.
29 O itše: ‘Ke kgopela o ntumelele ke sepele, ka gobane re na le sehlabelo sa lapa kua motseng, gomme ngwanešo o nkgopetše gore ke tle. Ge e ba o ntumelela, hle e re ke ye ke yo bona bana bešo.’ Ke ka baka leo a sego gona tafoleng ya kgoši.”
30 Saulo a galefela Jonathane kudu gomme a re go yena: “Wena morwa wa mosadi wa lerabele, na o nagana gore ga ke tsebe gore o kgetha go ema le morwa wa Jese gore o itlhabiše dihlong le go hlabiša mmago dihlong?*
31 Ge feela morwa wa Jese a sa phela, wena o ka se be kgoši e bile mmušo wa gago o ka se tie. Ka gona romela motho a yo mo tšea a mo tliše go nna ka gobane o swanetše go hwa.”
32 Eupša Jonathane a re go Saulo tatagwe: “Ke ka baka la’ng a swanetše go bolawa? O dirile’ng?”
33 Ge a re’alo, Saulo a mo foša ka lerumo gore a mmolaye, ke moka Jonathane a tseba gore tatagwe o ikemišeditše go bolaya Dafida.
34 Gateetee Jonathane a emelela tafoleng a galefile kudu, a se je dijo letšatšing la ka morago ga monyanya wa kgwedi e mpsha, ka gobane o be a kwele bohloko ka baka la Dafida, le gore tatagwe o be a gobošitše Dafida.
35 Mesong e latelago, Jonathane a ya nageng moo a bego a kwane le Dafida gore ba tlo kopana gona. O be a na le mohlanka wa gagwe yoo e bego e sa le yo moswa.
36 Ke moka a re go mohlanka wa gagwe: “Ke kgopela o kitime o yo tšea mesebe yeo ke e thuntšhago.” Mohlanka yoo a kitima gomme Jonathane yena a thuntšhetša mosebe kua pele ga mohlanka.
37 Ge mohlanka a fihla moo Jonathane a thuntšheditšego mosebe gona, Jonathane a mo goeletša a re: “Na mosebe ga o kua pele ga gago?”
38 Jonathane a goeletša mohlanka gape a re: “Phakiša! Dira ka pela! O se ke wa ema!” Mohlanka wa Jonathane a tšama a topela mesebe ke moka a boela go mong wa gagwe.
39 Mohlanka yena o be a sa kwešiše gore go direga eng. Ke Jonathane le Dafida feela bao ba bego ba kwešiša gore go direga eng.
40 Ke moka Jonathane a nea mohlanka wa gagwe dibetša tša gagwe, a re go yena: “Di tšee o di iše motseng.”
41 Ge mohlanka wa Jonathane a sepetše, Dafida yena a tšwelela lefelong la kgauswi leo a bego a ikutile go lona leo le bego le le ka borwa. A wela fase ka sefahlego gomme a khunama pele ga Jonathane gararo. Ke moka ba khisana* gomme ba lla, eupša Dafida a lla kudu.
42 Jonathane a re go Dafida: “Sepela ka khutšo ka ge re enne ka leina la Jehofa, ra re: ‘Anke Jehofa e be hlatse magareng ga ka le wena le magareng ga ka le bana ba ka le bana ba gago go ya go ile.’”
Dafida a emelela a sepela gomme Jonathane a boela motseng.
Mengwalo ya tlase
^ Bona Tlhaloso ya Mantšu.
^ Goba, “lerato le le botegago.”
^ Goba, “lerato le le botegago.”
^ Goba, “lerato le le botegago.”
^ Phetolelo ya lentšu ka lentšu e re, “Letšatšing la ka morago ga monyanya wa kgwedi e mpsha.”
^ Phetolelo ya lentšu ka lentšu e re, “go hlabiša bofeela bja mmago dihlong.”
^ Goba, “atlana.”
