Go Bafilipi 1:1-30
-
Ditumedišo (1, 2)
-
Thapelo ya Paulo ya go leboga Modimo (3-11)
-
Ditaba tše dibotse di a phatlalala le ge go na le mathata (12-20)
-
Ge ke phela ke phelela Kriste gomme ge e ba ke hlokofala ke a holega (21-26)
-
Le itshware ka tsela yeo batho bao ba bolelago ditaba tše dibotse ka Kriste ba swanetšego go itshwara ka yona (27-30)
1 Nna Paulo le Timotheo, bahlanka ba Kriste Jesu, re dumediša bakgethwa ka moka bao ba lego boteeng le Kriste Jesu ba phuthegong ya Filipi, gotee le balebeledi le bahlanka ba bodiredi, re re:
2 Eka Modimo tatago rena le Morena wa rena Jesu Kriste ba ka le bontšha botho bjo bogolo ba le nea le khutšo.
3 Ka mehla ke leboga Modimo wa ka
4 ge ke bolela ka lena ka moka dithapelong* tša ka. Ke le rapelela ke thabile,
5 ka baka la tema yeo le e kgathilego go phatlalatšeng ditaba tše dibotse go tloga letšatšing la pele la ge le di amogela go fihla mo nakong ye.
6 Gobane ke kgodišegile gore Modimo yo a thomilego modiro o mobotse go lena o tla o dira go fihlela a o fetša letšatšing la Kriste Jesu.
7 Ka ge ke le rata kudu, ke mo gobotse gore ke nagane ka lena ka tsela ye, ka ge le ile la nthekga ge ke be ke tlemilwe ka diketane teronkong le ge ke be ke lwela ditaba tše dibotse ka molao. Ka baka leo nna le lena re hotšwe ke botho bjo bogolo bja Modimo.
8 Gobane Modimo o a tseba gore ke le hlologetše kudu e bile ke le rata kudu go swana le kamoo Kriste Jesu a le ratago ka gona.
9 Seo ke tšwelago pele ke se rapelela ke gore, tsebo e nepagetšego le temogo e feletšego ya thato ya Modimo di le thuše gore lerato la lena le gole kudu.
10 Ke rapelela le gore le lemoge dilo tšeo di lego bohlokwa kudu, e le gore le se be le molato gomme le se kgopiše ba bangwe go fihlela letšatšing la Kriste,
11 le gore le tšwele pele le dira mediro e mebotse le thušwa ke Jesu Kriste, e le gore batho ba tsebe gore Modimo ke yo mogolo gakaakang gomme ba mo tumiše.
12 Bjale banabešo, ke nyaka gore le tsebe gore dilo tšeo di ntiragaletšego di thušitše gore batho ba bantšhi ba tsebe ditaba tše dibotse,
13 e le gore bahlapetši ba kgoši ya Roma le batho ka moka ba tsebe gore ke golegilwe ka baka la Kriste.
14 Bjale bontšhi bja banababo rena bao ba hlankelago Morena ba kgothaditšwe ke go golegwa ga ka e bile ba bontšha sebete ka go bolela ka lentšu la Modimo ba sa tšhabe selo.
15 Ke nnete gore ba bangwe ba bolela ditaba tše dibotse ka Kriste ka baka la ge ba njela mona e bile ba phadišana le nna, mola ba bangwe ba di bolela ka maikemišetšo a mabotse.
16 Ba ba bolela ka Kriste ka gobane ba mo rata, ka ge ba tseba gore Modimo o nkgethile gore ke lwele ditaba tše dibotse,
17 mola ba bangwe ba dira se ka ge ba nyaka go ikhola, e sego ka maikemišetšo a mabotse, ka gobane ba nyaka go mpakela mathata ge ke le mo teronkong.
18 Mafelelo a seo e bile afe? Go sa šetšwe gore ba dirile seo ka maikemišetšo a mabotse goba a mabe, Kriste yena o ile a tsebatšwa go batho ka mekgwa yohle, gomme se se dira gore ke thabe. E bile ge e le gabotse ke tlo tšwela pele ke thabile,
19 ka gobane ke a tseba gore se se tla dira gore ke feleletše ke phološitšwe ka baka la ge le nthapelela le ka baka la moya o mokgethwa woo ke o neilwego ke Jesu Kriste.
20 Ke kgodišegile e bile ke holofela gore nka se hlabje ke dihlong ka tsela le ge e le efe, eupša ke tla bolela ke sa tšhabe selo gomme ke* tla tumiša Kriste bjalo ka peleng, go sa šetšwe gore ke a phela goba ke a hlokofala.
21 Gobane ge ke phela ke phelela Kriste gomme ge e ba ke hlokofala ke a holega.
22 Eupša ge e ba ke tšwela pele ke phela mmeleng wo wa nama ke tla kgona go direla Kriste ka mo go oketšegilego, eupša nka se bolele gore ke kgetha eng.
23 Ga ke tsebe gore ke kgethe eng gare ga dilo tše tše pedi, ka gobane ke nyaka go ya go Kriste,* gobane se ruri se kaone kudu.
24 Lega go le bjalo, seo se tlago go le hola kudu ke gore ke tšwele pele ke phela mo lefaseng.
25 Ka baka leo ke kgodišegile gore ke tla tšwela pele ke phela gore le oketše tirelo ya lena go Modimo gomme le thabišwe ke tumelo ya lena,
26 e le gore ge ke boela go lena le thabe kudu ka ge le le balatedi ba Kriste Jesu.
27 Le itshware ka tsela yeo batho bao ba bolelago ditaba tše dibotse ka Kriste ba swanetšego go itshwara ka yona, e le gore ge e ba ke etla go le bona goba ke sa tle, ke kwe gore le sa tiile tumelong e bile le na le monagano o tee, le gona le šoma gotee gore le dule le na le tumelo go ditaba tše dibotse,
28 e bile batho bao ba le ganetšago ga ba le tšhoše le ganyenyane. Bjo ke bohlatse bjo bo tšwago go Modimo bja gore ba tlo fedišwa eupša lena la phološwa.
29 Gobane ga se la fiwa feela tokelo ya gore le dumele go Kriste eupša le filwe le ya gore le tlaišege ka baka la gagwe.
30 Gobane le lwa ntwa yeo le bonego ke elwa, yeo ga bjale le kwago gore ke sa dutše ke elwa.
Mengwalo ya tlase
^ Ka Segerika lentšu leo le dirišitšwego mo le šupa go thapelo yeo e tseneletšego e tšwago pelong goba topo.
^ Phetolelo ya lentšu ka lentšu e re, “ka mmele wa ka.”
^ Phetolelo ya lentšu ka lentšu e re, “ke kganyoga go lokollwa gomme ke be le Kriste.”
