Diema 6:1-35
6 Morwa wa ka, ge e ba o ithweša molato wa sekoloto sa wa geno,Ge e ba o dirile tumelelano le motho yo o sa mo tsebego,
2 Ge e ba o tsene mathateng ka baka la seo o se tshepišitšego,Goba o tantšwe ke dilo tšeo o di boletšego,
3 Morwa wa ka, ka ge o laolwa ke wa geno,Dira se gore o itokolle:
Eya go yena o ikokobetše gomme kapelapela o mo kgopele gore a go kwele bohloko.
4 O se ke wa robala,Goba wa ponya mahlo go fihlela o dira se.
5 Itokolle go swana le kgama* yeo e tantšwegoLe go swana le nonyana yeo e swerwego ke morei wa dinonyana.
6 Wena sebodu, eya o bone gore ditšhoši di phela bjang,Lebelela seo di se dirago gomme o be bohlale.
7 Le ge di se na molaodi, moetapele goba mmuši,
8 Di kgoboketša dijo tša tšona selemo,Gomme tša ikgobelela dijo tša tšona nakong ya puno.
9 Wena sebodu, o tla robala go fihla neng?
O tla tsoga neng borokong?
10 Ge o ka dulela go otsela, wa robalaWa phutha matsogo ganyenyane gore o khutše,
11 E se kgale o tla ba o diila, gwa ba bjalo ka ge eka lehodu le go hlasetše,E bile gwa ba bjalo ka ge eka monna yo a itlhamilego o go utsweditše dilo tša gago ka moka.
12 Motho yo mobe le wa go se re selo o tšama a bolela maaka,
13 O ponyaponyetša motho leihlo, a thala ka leoto le go šupašupa ka menwana.
14 Ka ge a na le pelo e mpe,O dula a loga maanomabe le go thoma dingangišano.
15 Ke ka baka leo a tlago go welwa ke mathata kapelapela,O tla robega gateetee gomme a ka se fole.
16 Go na le dilo tše tshela tšeo Jehofa a di hloilego,Eupša ke tše šupa tšeo di mo šišimišago:
17 Ke go ikgantšha, go bolela maaka, go bolaya batho bao ba se nago molato,
18 Go loga maano a mabe, go kitimela go dira dilo tše mpe,
19 Go dula o eba hlatse ya maakaLe motho yo mongwe le yo mongwe yoo a dulago a lweša bana ba motho.
20 Wena morwa wa ka, latela ditaelo tša tatago,Gomme o se ke wa lahla molao woo mmago a go rutilego wona.
21 Dula o di bolokile pelong ya gago,O di tlemelele molaleng.
22 Di tla go hlahla ge o sepela,Di tla go šireletša ge o robala,Gomme ge o tsoga di tla go ruta gore o be bohlale.
23 Ka gobane taelo ke lebone,Molao ke seetša,Gomme tayo le kgalemelo ke tsela ya bophelo.
24 Di tla go šireletša go mosadi yo mobe,Le go mantšu ao a goketšago a mosadi yo a hlokago boitshwaro.*
25 Pelo ya gago e se ke ya kgahlwa ke botsana bja gagwe,E bile o se ke wa mo dumelela a go goketša ka mahlo a gagwe.
26 Ka gobane mogweba-ka-mmele a ka dira gore monna a diile moo a ka šalago a na le borotho feela.Eupša mosadi wa monna yo mongwe a ka dira gore o lahlegelwe ke bophelo bja gago.
27 Na motho a ka kgobelela magala sefegeng* sa gagwe gomme diaparo tša gagwe tša se swe?
28 Goba na motho a ka sepela magaleng a go fiša gomme a se swe?
29 Go bjalo le ka monna yo a robalago le mosadi wa monna yo mongwe.Yo mongwe le yo mongwe yo a kgwathago mosadi yoo o tla otlwa.
30 Batho ga ba hloye lehoduLeo le utswago ka gobane le swerwe ke tlala.
31 Eupša ge le ka hwetšwa, le tla lefišwa gašupa dilo tšeo le di utswitšego,Le tla swanelwa ke go ntšha dilo ka moka tša bohlokwa tšeo di lego ntlong ya lona.
32 Yo mongwe le yo mongwe yo a robalago le mosadi wa monna yo mongwe ke setlaela,Yo a dirago bjalo o itshenyetša bophelo.
33 Yena o tla ikweša bohloko le go nyatšwa ke bathoGomme dilo tša go leša dihlong tšeo a di dirilego di ka se lebalwe.
34 Ka gobane lehufa le dira gore monna a galefeGomme ge a itefeletša a ka se kwele motho bohloko.
35 A ka se amogele selo, le ge o ka mo fa tšhelete o tlo e gana.A ka se nyake go dira khutšo le ge o ka mo fa mpho ya go tura.
