Psalme 146:1-10
146 Tumišang Jah!*
Anke ke tumiše Jehofa ka pelo ka moka.
2 Ke tla tumiša Jehofa bophelo bja ka ka moka.
Ke tla opelela Modimo wa ka dikoša tša go mo tumiša ge ke sa dutše ke phela.
3 Le se ke la tshepa baetapele ba lefase le,Goba la tshepa batho le ge e le bafe ka gobane ba ka se kgone go le phološa.
4 Ge motho a ehwa,* o boela mmung.Letšatšing leo menagano ya gagwe ka moka e a fela.
5 Go thaba yo a thušwago ke Modimo wa Jakobo,Yo a tshepilego Jehofa Modimo wa gagwe,
6 Yena yo a dirilego legodimo le lefase,Lewatle le dilo ka moka tšeo di lego go tšona,Yoo a dulago a botega,
7 Yena yoo a dirago gore batho bao ba radiilwego ba swarwe ka toka,Yo a fago batho bao ba swerwego ke tlala dijo.
Jehofa o lokolla batho bao ba lego tronkong.
8 Jehofa o bula mahlo a batho bao ba sa bonego.Jehofa o matlafatša bao ba imetšwego ke mathata.Jehofa o rata baloki.
9 Jehofa o šireletša batho bao ba tšwago dinageng tše dingwe.O thekga bana bao ba hlokago botatago bona le bahlologadi.O dira gore maano a batho ba babe a se atlege.
10 Jehofa e tla ba Kgoši go ya go ile.Wena Tsione, Modimo wa gago e tla ba Kgoši go tloga molokong o mongwe go ya go o mongwe.
Tumišang Jah!*
Mengwalo ya tlase
^ Goba, “Haleluya.” “Jah” ke tsela e kopana ya go bitša leina Jehofa.
^ Phetolelo ya lentšu ka lentšu e re, “Ge moya wa gagwe o e tšwa.”
^ Goba, “Haleluya.” “Jah” ke tsela e kopana ya go bitša leina Jehofa.
