Ekisodo 32:1-35
32 Ge setšhaba se bona gore Moshe o tšea nako e telele go theoga thabeng, sa kgobokanela Arone gomme sa re go yena: “Re direle modimo yo a tlago go re eta pele, ka gobane Moshe yo wa lena yoo a bego a re etile pele go re ntšha Egepeta ga re tsebe gore go diragetše eng ka yena.”
2 Ke moka Arone a re go sona: “Rolang mangina a gauta ao basadi ba lena, barwa ba lena le barwedi ba lena ba a rwelego gomme le a tlišeng mo go nna.”
3 Ka gona setšhaba ka moka sa rola mangina a gauta sa a tliša go Arone.
4 Ke moka a tšea gauta yeo go sona, a e bopa ka foromo a dira modimo wa seswantšho wa namane. Baisiraele ba re: “Yo ke Modimo wa rena, yo a re ntšhitšego nageng ya Egepeta.”
5 Ge Arone a bona seo se bego se direga, a aga aletare pele ga namane yeo ya gauta. Ke moka Arone a goeletša a re: “Gosasa re tlo direla Jehofa monyanya.”
6 Ka gona, letšatšing leo le latelago batho ka moka mo setšhabeng ba tsoga e sa le mesong gomme ba neela dibego tša go fišwa le dihlabelo tša go dira khutšo le Modimo. Ka morago ga moo ba dula ba ja ba ba ba nwa gomme ba ipshina.
7 Bjale Jehofa a re go Moshe: “Sepela o theogele go batho ba geno bao o ba etilego pele wa ba ntšha nageng ya Egepeta, ka gobane ba dirile sebe se segolo.
8 Ba tlogetše go phela ka melao ya ka kapelapela. Ba itiretše modimo wa seswantšho wa namane, ba o khunamela le go o direla dihlabelo gomme ba re: ‘Yo ke Modimo wa rena yo a re ntšhitšego Egepeta.’”
9 Jehofa a tšwela pele a re go Moshe: “Ke bone gore batho ba setšhaba se ba na le dihlogo tše thata.
10 Ba nkgalefišitše kudu, bjale ntlogele ke ba fediše, gomme wena ke go dire setšhaba se segolo.”
11 Moshe a kgopela Jehofa Modimo wa gagwe gore a se sa galefa* gomme a re go yena: “Ao hle Jehofa, ke ka baka la’ng o galefela batho ba gago bao o ba ntšhitšego Egepeta o diriša matla a gago a magolo?
12 O se ke wa dira gore Baegepeta ba re: ‘Modimo wa bona o ba ntšhitše mo Egepeta ka gobane o be a naganne go ba dira selo se sebe ka go ba bolaela dithabeng a be a ba fediše mo nageng.’ O se sa galefa gomme o se sa ba fediša.
13 Gopola bahlanka ba gago e lego Aborahama, Isaka le Isiraele, bao o ba enetšego ka wena wa re: ‘Ke tla dira gore le be le bana ba bantšhi go swana le dinaledi tša magodimong, ka ba ka dira gore naga ka moka yeo ke e kgethilego e be ya bona, gomme ba tla dula go yona go ya go ile.’”
14 Jehofa o ile a fetoša monagano, gomme a se fediše batho ba gagwe bjalo ka ge a be a boletše gore o tlo ba fediša.
15 Ka morago ga moo Moshe a retologa gomme a theoga thabeng a swere maswika a mabedi a diphaphathi ao a ngwadilwego melao ya Modimo. Maswika ao a be a ngwadilwe ka pele le ka morago.
16 Modimo ke yena a bego a dirile maswika ao gomme a ngwala melao ya gagwe go ona.
17 Ge Joshua a ekwa batho ba hlabile mašata kua ditenteng, a re go Moshe: “Go kwagala eka batho ba a lwa.”
18 Eupša Moshe a re:
“Ga go kwagale e le koša ya batho bao ba fentšego ntweng,E bile ga go kwagale e le koša ya batho bao ba llago ka ge ba fentšwe,Eupša ke kwa e le koša yeo ke sego ka e tlwaela.”
19 Gateetee ge Moshe a batamela ditenteng gomme a bona namane yela ya gauta le kamoo batho ba bego ba bina ka gona a galefa kudu, ke moka a lahla maswika ao a bego a a swere a a pšhatlaganya kgauswi le thaba.
20 O ile a tšea namane yeo ba bego ba e dirile a e fiša ka mollo, a e šila go fihlela e eba lerole ke moka a gašetša lerole leo ka meetseng gomme a laela Baisiraele gore ba nwe meetse ao.
21 Ka morago ga moo Moshe a re go Arone: “E le gore batho ba ba go gokeditše bjang gore o feleletše o ba dirišitše sebe se sekaakaa?”
22 Ke moka Arone a re: “Theoša maswafo hle mong wa ka, wena o tseba gabotse gore batho ba ba rata go dira dilo tše mpe.
23 Bona ba rile go nna: ‘Re direle modimo yo a tlago go re eta pele ka gobane Moshe yo wa lena, yena yoo a re etilego pele a re ntšha nageng ya Egepeta, ga re tsebe gore go diragetše eng ka yena.’
24 Ke ile ka re go bona: ‘Mang le mang yo a nago le gauta a a e role a mphe yona.’ Ke moka nna ka e lahlela ka mollong gomme gwa tšwelela namane ye.”
25 Moshe a bona gore Arone o tlogetše batho gore ba se sa laolega, gomme seo sa dira gore manaba a bona a ba nyatše.
26 Ke moka Moshe a ema kgorong ya ditenteng gomme a re: “Yo a emago le Jehofa a a tle mo go nna!” Balefi ka moka ba ya go yena gomme ba mo kgobokanela.
27 Ke moka a re go bona: “Jehofa Modimo wa Isiraele o rile: ‘Yo mongwe le yo mongwe wa lena a tšee tšhoša ya gagwe, le feteng ditenteng le tšame le tsena kgorong e nngwe le e nngwe, gomme yo mongwe le yo mongwe a bolaye ngwanabo, moagišane wa gagwe le mogwera wa gagwe.’”
28 Balefi ba dira kamoo Moshe a ba laetšego ka gona gomme letšatšing leo go ile gwa bolawa banna ba ka bago 3 000 (dikete tše tharo).
29 Moshe a re go bona: “Lehono imatlafatšeng gore le tle le hlankeleng Jehofa. Lehono Modimo o tla le šegofatša ka gobane le lwele le barwa ba lena le bana babo lena.”
30 Ya re ka letšatši le le latelago Moshe a bolela le setšhaba a re: “Lena le dirile sebe se segolo, bjale ke tla rotogela thabeng gomme ka kgopela Jehofa gore a le lebalele.”
31 Ka gona Moshe a boela go Jehofa gomme a re go yena: “Setšhaba se se dirile sebe segolo kudu! Se dirile modimo wa gauta!
32 Eupša se swarele sebe sa sona hle. Ge e ba go se bjalo gona o phumole leina la ka ka pukung ya gago.”
33 Eupša Jehofa a re go Moshe: “Mang le mang yo a ntiretšego sebe ke tla phumola leina la gagwe ka pukung ya ka.
34 Bjale sepela, o etelele setšhaba se pele o se iše mo ke itšego o se iše gona. Tseba gore morongwa wa ka o tla go eta pele gomme letšatšing leo ke tlago go lekola setšhaba ke tla se otlela sebe sa sona.”
35 Ka gona Jehofa a otla setšhaba seo ka ge se be se dirile namane, e lego namane yeo se kgopetšego Arone gore a e dire.
Mengwalo ya tlase
^ Phetolelo ya lentšu ka lentšu e re, “a nolofatše sefahlego sa gagwe.”
