Jeremia 17:1-27
17 “Sebe sa batho ba Juda se ngwadilwe ka pene ya tšhipi.
Se ngwadilwe ka ntlha ya taamane dipelong tša bona,Le manakeng a dialetare tša bona,
2 Mola barwa ba bona ba dutše ba nagana ka dialetare tša bona le dikota tša bona tše kgethwa*Tšeo di lego kgauswi le mehlare e megolo, mebotong e phagamego,
3 Le dithabeng tšeo di lego nageng.
Ke tla dira gore batho ba tšee dilo tša lena, e lego mahumo a lena ka moka,Ba tšee le dilo tšeo di lego mafelong a phagamego ao le rapelago go ona, ka baka la sebe seo le se dirilego ditikologong tša lena ka moka.
4 Le tla ikgethela go tlogela bohwa bja lena bjo ke le neilego bjona.
E bile ke tla dira gore le hlankele manaba a lena nageng yeo le sa e tsebego,Ka gobane le dirile gore ke tuke bogale go swana le mollo
Woo o tlago go dula o tuka.”
5 Jehofa o re:
“Go rogakilwe motho yo a tshepilego batho,Yo a ithekgilego ka matla a motho,Le yoo pelo ya gagwe e sa nyakego go kwa Jehofa.
6 O tla swana le mohlare wo o emego o nnoši leganateng.
A ka se bone ge dilo tše dibotse di etla,Eupša o tla dula mafelong ao a omilego lešokeng,A dula nageng ya letswai yeo go se nago motho yo a ka dulago go yona.
7 Go tla šegofatšwa motho yo a tshepilego Jehofa,E lego yena yo a botilego Jehofa.
8 O tla swana le mohlare wo o bjetšwego kgauswi le meetse,Woo medu ya wona e fihlago nokaneng.
A ka se bone phišo ge e etla,Eupša matlakala a gagwe e tla dula e le a matala.
Ngwageng wa komelelo a ka se tshwenyege,E bile a ka se tlogele go enywa.
9 Pelo e boradia kudu go feta selo le ge e le sefe e bile e kotsi.
Ke mang yo a ka e kwešišago?
10 Ke nna Jehofa ke fetlekago pelo,Ke hlahloba dilo tšeo motho a di naganago ka garegare,*Gore ke putse motho yo mongwe le yo mongwe go ya ka tsela yeo a itshwarago ka yona,Le go ya le ka dilo tšeo a di dirilego.
11 Motho yo a nyakago mahumo ka go se tshepege,O tla swana le nonyana yeo e bitšwago kgwale, yeo e kgoboketšago mae ao e sa kago ya a beela.
O tla tlogela mahumo ao a se a tšwa a tšofala,Gomme mafelelong o tla bontšha gore ke setlaela.”
12 Go tloga mathomong setulo sa bogoši sa Modimo se ile sa godišwa,Gomme sona ke sekgethwa sa rena.
13 Wena Jehofa, yoo Isiraele e go tshepilego,Batho ka moka bao ba go tlogelago ba tla hlabja ke dihlong.
Bao ba go hlanogelago maina a bona a tla ngwalwa mobung,Ka gobane ba tlogetše Jehofa, e lego yena yoo meetse a bophelo a tšwago go yena.
14 Nkalafe hle Jehofa, gomme ke tla fola.
Mphološe, gomme ke tla phologa,Ka gobane ke wena yo ke go tumišago.
15 Bonang! Go na le bao ba rego go nna:
“Goreng seo Jehofa a se boletšego se se sa tšwa se phethagala?
Anke se phethagale hle!”
16 Eupša ge e le nna ga se ka tlogela go go šala morago ke le modiši,E bile ga se ka ka ka fela pelo ya gore letšatši la masetlapelo le tle.
Wena o tseba gabotse dilo ka moka tšeo molomo wa ka o di boletšego,Ka moka di diregile pele ga mahlo a gago.
17 O se ke wa ntšhoša hle.
Ge masetlapelo a etla ke tšhabela go wena.
18 Anke bao ba ntlaišago ba hlabje ke dihlong,Eupša o se ke wa dira gore nna ke hlabje ke dihlong.
Dira gore ba tšhoge,Eupša nna ke se ke ka tšhoga selo.
Ba tlišetše letšatši la masetlapelo gomme le ba wele,O ba pšhatlaganye le go ba fedišetša sa ruri.
19 Jehofa o mpoditše gore: “Sepela, o eme keiting ya batho yeo dikgoši tša Juda di tsenago le go tšwa ka yona, o eme le dikeiting ka moka tša Jerusalema.
20 O re go bona: ‘Ekwang seo Jehofa a se bolelago, lena dikgoši tša Juda le batho ka moka ba Juda, gotee le batho ka moka bao ba dulago Jerusalema, bao ba tsenago ka dikeiti tše.
21 Jehofa o re: “Itlhokomeleng, gomme ka letšatši la Sabatha le se ke la rwala morwalo le ge e le ofe, goba la tsena le wona dikeiting tša Jerusalema.
22 Le se ke la ntšha morwalo le ge e le ofe dintlong tša lena ka letšatši la Sabatha, e bile le se ke la dira mošomo le ge e le ofe. Dulang le dira gore letšatši la Sabatha e be le lekgethwa, feela bjalo ka ge ke laetše borakgolokhukhu ba lena.
23 Eupša ga se ba ka ba theetša goba go hlwaya tsebe, e bile ba ile ba thatafiša dihlogo tša bona, gomme ba gana go kwa goba go amogela tayo.”’
24 Jehofa o re: “Eupša ge e ba le ka nkwa, gomme la se tsene le morwalo dikeiting tša motse wo ka letšatši la Sabatha, la dula le dira gore letšatši la Sabatha e be le lekgethwa ka go se dire mošomo le ge e le ofe,
25 gona dikgoši le dikgošana tšeo di dulago setulong sa bogoši sa Dafida, le tšona di tla tsena dikeiting tša motse wo di nametše dikariki le dipere. Di tla be di na le dintona tša tšona, banna ba Juda le batho bao ba dulago Jerusalema, gomme batho ba tla dula motseng woo go ya go ile.
26 Batho ba tla tla ba etšwa metseng ya Juda, mafelong ao a lego kgauswi le Jerusalema, nageng ya Benjamini, nageng ya meboto, tikologong ya dithaba le Negebe. Ba tla tla ba swere dibego tše di feletšego tša go fišwa, dihlabelo, dibego tša mabele, dinkgišabose le dihlabelo tša go leboga ntlong ya Jehofa.
27 “‘“Eupša ge e ba le ka se nkwe ka go se dire gore letšatši la Sabatha e dule e le le lekgethwa, le ka go rwala merwalo la tsena le yona dikeiting tša Jerusalema ka letšatši la Sabatha, gona ke tla tšhuma dikeiti tša Jerusalema, ka tšhuma le meago ka moka yeo e šireletšegilego ya Jerusalema, gomme mollo woo o ka se time.”’”
Mengwalo ya tlase
^ Bona Tlhaloso ya Mantšu.
^ Goba, “tsela yeo motho a ikwago ka yona ka garegare.”
