Jesaya 32:1-20
32 Kgoši e tla buša ka go loka,Gomme dikgošana tšona di tla buša ka toka.
2 Yo mongwe le yo mongwe o tla swana le lefelo la go tšhabela phefo,Le lefelo la go tšhabela ledimo.O tla swana le dinokana nageng yeo e se nago meetse,Le moriti wa leswika le legolo nageng yeo e omilego.
3 Mahlo a bao ba bonago a ka se sa tswalelwa,Gomme ditsebe tša bao ba kwago di tla theetša gabotse.
4 Bao ba welago dilo godimo, ba tla naganišiša gore ba hwetše tsebo,Bao ba kgamakgametšago, ba tla bolela ka go thelela le ka tsela e kwagalago.
5 Lešilo le ka se sa bitšwa motho yo a ratago go fa,Le gona motho wa go hloka mekgwa, a ka se bitšwe mohlomphegi.
6 Ka gobane lešilo le tla bolela dilo tša bošilo,Gomme pelo ya lona e tla rera go dira dilo tše di gobatšago,E le gore le hlanogele Modimo gomme le bolele dilo tšeo e sego nnete ka Jehofa,Le gore le se ke la nea yo a swerwego ke tlala dijo,Le gore le se ke la nea yo a nyorilwego seo a ka se nwago.
7 Motho yo a se nago mekgwa o dira dilo tše mpe,O kgothaletša ba bangwe go itshwara ka tsela e lešago dihlong,O diriša maaka go senya motho yo a hlakago,Gaešita le ge motho yo a diilago a bolela nnete.
8 Eupša yo a ratago go fa, o dula a ikemišeditše go fana,E bile o dula a nyaka go fana.
9 “Lena basadi bao ba iketlilego, emang le theetšeng lentšu la ka!
Lena barwedi bao ba sa tshwenyegego ka selo, theetšang gabotse seo ke se bolelago!
10 Ka moragonyana ga ngwaga, lena bao le sa šetšego selo le tlo ferekana,Ka gobane go tla be go se na dienywa tšeo di kgobokeditšwego ge nako ya go buna diterebe e fela.
11 Thothomelang, lena basadi bao ba iketlilego!
Ferekanang, lena ba go se šetše!
Apolang le šale le hlobotše,Gomme mathekeng a lena le apare diaparo tšeo di bontšhago gore le nyamile.
12 Ipetheng dihuba gomme le llelengSeo se diragaletšego mašemo le mašemo a diterebe ao a enywago.
13 Ka gobane nageng ya batho ba ka go tla mela meetlwa le mehlašana ya meetlwa,E tla mela le dintlong tšeo e kilego ya ba tša lethabo,E lego motseng wa lethabo le legolo.
14 Moago wo o šireletšegilego o tlogetšwe,Motse wa lešata ga o sa na batho.
Ofele le moago o motelele wo baleti ba letago go wona* di fetogile marope go ya go ile,Ke moo ditonki tša naga di thabago gona,Le moo mehlape e fulago gona,
15 Go fihlela ge Modimo a tšhollela moya wa gagwe godimo ga rena,Gomme lešoka le fetoga serapa sa dienywa,Ke moka serapa sa dienywa se e ba bjalo ka sethokgwa.
16 Ke gona go tla bago le toka,Lešokeng le serapeng sa dienywa.
17 Toka ya nnete e tla tliša khutšo,Le gona e tla dira gore batho ba iketle, e bile go be le tšhireletšego ya sa ruri.
18 Batho ba ka ba tla dula lefelong la khutšo le leo le šireletšegilego,Gomme ba tla iketla ka go dula moo.
19 Eupša sefako se tla hlohlora sethokgwa,Gomme motse wa fedišwa ka mo go feletšego.
20 Go thaba lena bao le bjalago peu kae le kae moo go nago le meetse,Lena bao le tlogelago poo le tonki di itshepelela le sa di diše.”
Mengwalo ya tlase
^ Goba, “serokamo.”
