Joshua 1:1-18
1 Ka morago ga lehu la Moshe mohlanka wa Jehofa, Jehofa o ile a botša Joshua* morwa wa Nuni, yo e bego e le mothuši wa Moshe a re:
2 “Moshe mohlanka wa ka o hlokofetše, bjale itokišetše go tshela Noka ya Jorodane, wena le batho ba ka moka gomme le ye nageng yeo ke ba fago yona, yeo ke e fago Baisiraele.
3 Ke tla le fa lefelo le lengwe le le lengwe leo le tsenago go lona, go etša ge ke ile ka tshepiša Moshe.
4 Naga yeo ke le fago yona e tloga lešokeng go fihla Libanoni le go fihla Nokeng e kgolo ya Eforate le go ya ka bodikela bja Lewatle le Legolo,* go akaretša le naga ka moka ya Bahethe.
5 Ga go yo a tlago go go fenya bophelo bja gago ka moka. Ke tla ba le wena go etša ge ke bile le Moshe. Nka se go lahle e bile nka se go tlogele.
6 Eba le sebete gomme o tie matla, ka gobane ke wena o tlago go etelela batho ba pele gore ba dule nageng yeo ke e enetšego borakgolokhukhu ba bona gore ke tla ba fa yona.
7 “Eba le sebete gomme o tie matla, o kgonthišetše gore o latela melao ka moka yeo Moshe mohlanka wa ka a go laetšego gore o e latele. O se ke wa tshela melao ye e le gore o dule o le bohlale kae le kae mo o yago gona.
8 O se ke wa tlogela go bolela ka puku ye ya molao, e bile o e bale o be o naganišiše* ka yona bošego le mosegare e le gore o latele dilo ka moka tšeo di ngwadilwego go yona. Ke moo o tlago go atlega gomme wa dira dilo ka bohlale.
9 Ke go laetše gore o be le sebete gomme o tie matla. O se ke wa boifa goba wa tšhoga, ka gobane Jehofa Modimo wa gago o na le wena gohle moo o yago gona.”
10 Ke moka Joshua a laela baetapele ba setšhaba, a re:
11 “Eyang dikampeng ke moka le laele setšhaba le re: ‘Itokišetšeng mefago ya dijo, ka gobane ka morago ga matšatši a mararo go tloga lehono le tlo tshela Noka ya Jorodane gore le tsene nageng yeo Jehofa Modimo wa lena a le neago yona gore e be ya lena.’”
12 Ke moka Joshua a botša Barubeni le Bagada gotee le seripa sa moloko wa Manase, a re:
13 “Gopolang seo Moshe mohlanka wa Jehofa a le laetšego sona ge a be a re: ‘Jehofa Modimo wa lena o le file naga ye gore le dule go yona ka khutšo.
14 Basadi ba lena le bana ba lena ba tla dula nageng yeo Moshe a le neilego yona ka mošono wa Noka ya Jorodane, gotee le diruiwa tša lena. Eupša lena ka moka bao le lego bahlabani ba matla le swanetše go tshela pele ga banababo lena ka moka le itokišeditše ntwa. Le swanetše go thuša banababo lena
15 go fihlela ge Jehofa Modimo wa lena a ba neile naga ya bona gomme ba dutše ka khutšo go swana le ge Jehofa a ile a dira bjalo go lena. Ke moka le boele nageng ya lena gomme le dule gona, e lego naga yeo Moshe mohlanka wa Jehofa a le filego yona ka thoko ya bohlabela bja Noka ya Jorodane.’”
16 Ke moka ba araba Joshua ba re: “Re tla dira dilo ka moka tšeo o re laetšego tšona, e bile re tla ya gohle mo o re romago gona.
17 Go swana le ge re ile ra kwa dilo ka moka tšeo Moshe a bego a re botša tšona, le wena re tla go kwa. Eka Jehofa Modimo wa gago a ka ba le wena go etša ge a ile a ba le Moshe.
18 Motho yo mongwe le yo mongwe yo a ganetšago dilo tšeo o di bolelago, e bile a sa kwe ditaelo ka moka tšeo o mo fago tšona o tla bolawa. Wena eba le sebete gomme o tie matla.”
Mengwalo ya tlase
^ Goba, “Jehoshua,” yeo e rago gore “Jehofa ke phološo.”
^ Ke gore, Mediterranean.
^ Goba, “o e bale ka lentšu la tlasana.”
