Jehofa o rata go ruta batho ba gagwe. Ka baka la seo, mokgatlo wa gagwe o hlomile dikolo tše mmalwa tšeo di tlwaetšago barutwana go dira dikabelo tša bona. Se sengwe sa dikolo tšeo ke Sekolo sa Baebangedi ba Mmušo. Mengwageng ya morago bjale, Mokgatlo wa Modimo ga o kaonefatše feela thuto eupša o kaonefatša le meago yeo dikolo tšeo di swarelwago gona. Morero o mogolo wa go dira seo ke go nolofaletša bahlahli go ruta le gore barutwana ba holege. Meneelo ya lena e re thuša bjang go fihlelela morero wo?

 Ka mengwaga e mentšhi, dikolo tša pušo ya Modimo di be di swarelwa Diholong tša Mmušo le Diholong tša Kopano. Ka gona ke ka baka la eng re ile ra aga le go mpshafatša meago e mengwe yeo e dirišetšwago dikolo tša pušo ya Modimo feela? Ela hloko mabaka a mararo a a latelago.

 Go na le tlhokagalo e kgolo. Christopher Mavor, Mothuši wa Komiti ya Tirelo ya Sehlopha se Bušago o re “Diofisi tša makala di re boditše gore go hlokega bana babo rena le dikgaetšedi ba oketšegilego go thuša tšhemong”. “Ka mohlala, ka 2019 lekala la Brazil le begile gore go be go nyakega dialoga tša sekolo sa Baebangedi ba Mmušo tše e ka bago tše 7600 go thuša tšhemong ya lekala la bona.” Lekala la United States le bega gore go na le tlhokagalo e kgolo ya babulamadibogo ba swanelegago bao ba ka tlwaetšago ba bangwe go nea bohlatse bjo bo kgethegilego bja phatlalatša ditoropong tše dikgolo, go nea bohlatse boemakepeng le go nea bohlatse kgolegong. Le gona go na le tlhokagalo ya bana babo rena bao ba ka thušago Lefapheng la LDC le Dikomiting tša go Hloma Kwano le Dipetlele. Dialoga tša Sekolo sa Baebangedi ba Mmušo di ka thuša go dira dilo tšeo.

 Barutwana ba oketšegilego. Makaleng a mantšhi ba hweditše dikgopelo go tšwa go barutwana go feta palo yeo ba ka e amogelago. Ka mohlala ka ngwaga o tee feela, lekaleng la Brazil ba hweditše dikgopelo tše e ka bago tše 2500 tša Sekolo sa Baebangedi ba Mmušo. Eupša ka ge go be go se na mafelo a lekanego go ka lekana palo yeo, lekala le ile la kgona go amogela feela barutwana ba 950.

 Mafelo a bodulo ao a swanelegago. Ge barutwana ba swarela sekolo Holong ya Mmušo goba Holong ya Kopano, gantšhi ba dula magaeng a bana babo rena le dikgaetšedi a kgauswi le mo sekolo se swarelwago gona. Tokišetšo yeo e šoma gabotse ge e ba go lokišeditšwe gore go be le diklase tše di sego kae ngwaga o mongwe le o mongwe. Eupša ge e ba go swanetše go ba le diklase tše dintšhi, go ka ba thata gore bagoeledi ba moo ba amogele barutwana ka magaeng a bona ka dikgwedi tše dintšhi. Ka baka leo, go lokišeditšwe meago yeo e lego kgauswi le diklase tša barutwana le yeo e hlametšwego go hola barutwana ka moka.

 Moago wo o nago le klase e tee le mafelo a mangwe a tirelo ao barutwana le bahlahli ba a hlokago, a ka bitša dimilione tše mmalwa go ithekgile ka lefelo le dilo tše dingwe.

 Gantšhi dikolo di ba lefelong leo le homotšego ka ntle ga toropo, eupša kgauswi le mo go nago le dinamelwa tša batho bohle. Lefelo le kgethwa mo go nago le bagoeledi ba bantšhi bao ba ka kgonago go thuša go hlokomela moago wa sekolo.

 Meago e na le bokgobapuku, mafelo a go ithuta, dikhomphutha, diprinthara le dilo tše dingwe. Gantšhi go ba le lefelo la go jela mo barutwana le bahlahli ba ka kgonago go ja mmogo. Go na le lefelo leo ba ka itšhidullago go lona le leo ba ka iketlago.

 Diklase di rulagantšwe gabotse. Troy yo a šomago go Lefapha la Lefase ka Bophara la Bohlami le la go Aga kua Warwick, New York o re “Re kgopetše ba Lefapha la Dikolo tša Pušo ya Modimo gore ba re thuše go hlama diklase tšeo di tla dirago gore go be bonolo gore barutwana ba ithutele go tšona”. “Ba ile ba re hlalosetša gore diklase di swanetše go ba tše kaakang, tsela yeo di swanetšego go ba ka yona le gore go šomišwe mabone, tša medumo le dibidio tša mohuta ofe.” Ngwanabo rena wa mohlahli Sekolong sa Baebangedi ba Mmušo kua Hungary, ge a bolela ka di dirišwa tša medumo o re: “Mathomong re be re se na di godiša modumo, ka gona re be re swanetše go dula re gopotša barutwana gore ba bolelele godimo. Eupša ga bjalo ga re sa na le bothata bjoo, ka gore tafola ya morutwana o mongwe le o mongwe e na le segodiša modumo”

 Na diphetogo tše di kgomile bahlahli le barutwana bjang? Angela yo a ilego Sekolong sa Baebangedi ba Mmušo kua Palm Coast, Florida, U.S.A. o re “Ke lefelo leo le nago le khutšo kudu. “Dilo ka moka di rulagantšwe gabotse go akaretša le diklase le dikamora tša rena gore re kgone go bala le go ithuta ntle le ditšhitišo.” Csaba mohlahli wa kua Hungary, o thabela go ja mmogo le barutwana. O re ka dinako tšeo, “barutwana ba lokologa go bolela le rena le go re botša ka diphihlelo tša bona. Se se re thuša go tseba barutwana gakaone. Ka baka la seo, re kgona go ba nea thuto yeo e sepedišanago le dinyakwa tša bona.”

 Barutwana le bahlahli, ba bona go kaonefatšwa ga meago ya dikolo tše e le tšhegofatšo yeo e tšwago go ‘Mohlahli wa rena yo Mogolo,’ Jehofa. (Jesaya 30:20, 21) Kgaetšedi yo a tšwago Philippines yo a ilego Sekolong sa Baebangedi ba Mmušo moagong wo o kaonefaditšwego o re: “Ge re le moo sekolong ga re ikwe feela re le barutwana eupša re ikwa bjalo ka baeng ba kgethegilego ba Jehofa. O nyaka gore re thabele go ithuta Lentšu la gagwe kamoo go tseneletšego.”

 Meago ya dikolo tše e a agwa, ya kaonefatšwa le go hlokomelwa ka baka la meneelo ya lena, yeo gantšhi e neelwago go donate.mr1310.com. Re tloga re leboga kudu go rata ga lena go nea.