•   “China e bega gore ngwageng wo e bile le ‘phišo e kgolo kudu’ le gore se e bile selemo sa boraro seo se hlokilego dipula o šoro go ya ka dipego tša bona.”—The Guardian, September 7, 2022.

•   “Dikarolo tše dingwe tša Afrika di bile le komelelo mengwageng ye e mehlano e latelana.”—UN News, August 26, 2022.

•   “Go na le kgonagalo ya gore karolo yeo e fetago seripagare sa Yuropa e be le komelelo e šoro kudu go feta dikomelelo tšeo e kilego ya ba le tšona mengwageng e 500 e fetilego.”—BBC News, August 23, 2022.

 Ditsebi tše dintši di bolela gore dikomelelo tše bjalo di tlo tšwela pele di le gona e bile di mpefala le go feta. Na re ka ba le kholofelo ya bokamoso bjo bobotse? Beibele e re’ng?

 Mabapi le mehla ya rena, Beibele e ile ya bolela e sa le pele gore:

•   “Go tla ba le . . . tlhaelelo ya dijo lefelong le lengwe ka morago ga le lengwe.”—Luka 21:11.

 Gantši komelelo e dira gore go be le tlhaelelo ya dijo. Tlhaelelo ye ya dijo e baka tlaišego le lehu, gomme dilo tše ka moka di phethagatša boporofeta bja Beibele.—Kutollo 6:6, 8.

 Beibele e bolela lebaka leo ka lona komelelo e mpefalago le go feta. E re:

•   “Ga go matleng a motho yo a sepelago gore a laole dikgato tša gagwe.”—Jeremia 10:23.

 Se se bolela gore batho ba ka se kgone go ‘laola dikgato tša bona,’ goba go ipuša ka katlego. Diphetho tšeo di sego bohlale tšeo ba di dirago, gantši di feleletša ka gore mafelong a mantši go be le komelelo le go hlokega ga meetse.

•   Borasaense ba bantši ba dumela gore dilo tšeo batho ba di dirago di bakile go hlatloga ga dithemphereitšha, gomme seo se feleletša ka go oketšega ga komelelo lefaseng ka moka.

•   Dilo tšeo batho ba di dirago ka baka la megabaru le go se naganele bokamoso di baka tshenyego ya dithokgwa, tšhilafalo le go se dirišwe gabotse ga dilo tša tlhago gomme se se dira gore go be le tlhaelelo ya meetse.

 Lega go le bjalo, Beibele e re nea kholofelo.

 Beibele e tshepiša gore Modimo o tlo rarolla bothata bjo bja tlhaelelo ya meetse. O tlo dira seo bjang?

1.  1. Modimo o tlo “senya bao ba senyago lefase.” (Kutollo 11:18) O tlo tloša bao ba bakago tlhaelelo ya meetse e lego batho ba kgopo, bao ba nago le megabaru e bile ba senya naga.—2 Timotheo 3:1, 2.

2.  2. “Naga e omišitšwego ke phišo e tla be e fetogile e etša mogobe wa mahlaka.” (Jesaya 35:1, 6, 7) Modimo o tlo dirolla tshenyo yeo e bakwago ke dikomelelo gomme a fetoša lefase le paradeise yeo e elelago meetse a mantši.

3.  3. “O hlokomela lefase, o le dira gore le tšweletše ka boati; O le humiša kudu.” (Psalme 65:9) Ka tšhegofatšo ya Modimo lefase le tlo tlala wa go falala ka dijo tše di agago le meetse ao a hlwekilego.