Na o bona eka go thatafa go eya pele go kgethologanya seo e lego nnete le seo e lego maaka? Batho gona bjale ba dumela dilo go ithekgile ka maikwelo a bona le seo ba se dumelago go e na le go dumela seo e lego nnete. Lefaseng ka moka lehono, batho ba bantši ga ba dumele gore selo seo se bitšwago nnete se gona.

 Seo ga se thome lehono. Mengwageng e ka bago e 2 000 e fetilego, Mmuši wa Moroma Pontio Pilato o ile a botšiša Jesu, e le ge a mo gegea gore: “Therešo ke eng?” (Johane 18:38) Le ge Pilato a se a emela gore Jesu a mo arabe, potšišo ya gagwe e be e le bohlokwa. Beibele e na le karabo e kgotsofatšago ya potšišo ye, gomme e ka go thuša go kgethologanya seo e lego nnete le seo e lego maaka le ge batho ba bantšhi taba ye e ba gakantšha.

Na nnete ge e le gabotse e gona?

 Ee. Beibele e diriša lentšu “therešo” ge e bolela ka dilo tšeo e lego nnete le tšeo di lokilego. E bolela gore Jehofa a Modimo ke Mothopo wa therešo, ke ka baka leo e rego ke “Modimo wa therešo.” (Psalme 31:5) Beibele e swere therešo yeo e tšwago go Modimo, gomme e swantšha therešo yeo le seetša ka ge e ka kgona go re hlahla kgakanegong yeo e tletšego mo lefaseng lehono.—Psalme 43:3; Johane 17:17.

O ka hwetša bjang nnete?

 Modimo ga a nyake gore re no dumela nnete yeo e lego ka Beibeleng. Go e na le moo o nyaka gore re e hlahlobe re diriša matla a rena a tlhaologanyo go e na le go ithekga ka maikwelo a rena. (Baroma 12:1) O nyaka gore re mo tsebe e bile re mo rate ka ‘monagano wa rena ka moka’ gomme o re kgothaletša gore re kgonthišetše ka borena gore seo re ithutago sona ka Beibeleng ke therešo.—Mateo 22:37, 38; Ditiro 17:11.

Maaka a tšwa kae?

 Beibele e bolela gore maaka a thomile ke lenaba la Modimo e lego Sathane Diabolo yoo Beibele e mmitšago “tatago maaka.” (Johane 8:44) O boditše batho ba mathomo maaka ka Modimo. (Genesi 3:1-6, 13, 17-19; 5:5) Ga e sa le go tloga ka nako yeo, Sathane o tšwetše pele a gaša maaka le go uta therešo ka Modimo.—Kutollo 12:9.

Ke ka ba ka la eng go bolela maaka go tlwaelegile lehono?

 Nakong ye re phelago go yona yeo Beibele e e bitšago ‘mehla ya bofelo,’ Sathane o timetša batho le go feta. Batho ba tlwaetše go botša ba bangwe maaka e le gore ba ba timetše le gore ba ikhole ka bona. (2 Timotheo 3:1, 13) Lehono madumedi a mantšhi a ruta maaka. Beibele e boletše e sa le pele ka batho ba mehleng ya rena gore “ba tla ba gare ga barutiši ka go dumelelana le dikganyogo tša bona gore ba kweše ditsebe tša bona bose,” gomme ba tla kgetha go “kgaotša go theetša therešo.”—2 Timotheo 4:3, 4.

Ke ka baka la eng nnete e le bohlokwa?

 Go nyakega nnete e le gore batho ba tshepane. Ge go tshepana go se gona, bogwera le tirišano setšhabeng di a senyega. Beibele e bolela gore Modimo o nyaka borapedi bja rena bo theilwe therešong. E re: “Bao ba rapelago [Modimo] ba swanetše go mo rapela ka moya le ka therešo.” (Johane 4:24) E le gore o kgone go tseba kamoo therešo yeo e lego ka Beibeleng e ka go thušago go bona bodumedi bja maaka le gore o ka tšwa bjang go bjona, bala dihlogwana tšeo di lego ka fase ga sehlogo seo se rego “Maaka ao a Dirago Gore go Bonagale Eka Modimo ga a Ratege.”

Ke ka baka la eng Modimo a nyaka ke tseba nnete?

 Modimo o nyaka gore o tle o phele go ya go ile, eupša gore seo se kgonege o swanetše go ithuta nnete ka yena. (1 Timotheo 2:4) Ge e ba o ithuta ka dilo tšeo Modimo a rego di lokile le tšeo di sa lokago gomme wa di diriša bophelong bja gago, e tlo ba mogwera wa gago wa kgauswi. (Psalme 15:1, 2) Modimo o ile a romela Jesu lefaseng e le gore a kgone go thuša batho go tseba nnete. Modimo o nyaka gore re theetše seo Jesu a se rutago.—Mateo 17:5; Johane 18:37.

Na Modimo o tlo fediša maaka?

 Ee. Modimo ga a rate ge batho ba ikhola ka batho ba bangwe ka go ba botša maaka. O tshepiša gore o tlo fediša batho bao ba ikemišeditšego go tšwela pele ba bolela maaka. (Psalme 5:6) Ge Modimo a dira bjalo o tla be a phethagatša le tshepišo ya gagwe yeo e rego: “Molomo wo o bolelago therešo o tla ba gona ka mo go sa felego.”—Diema 12:19.