Batho go dikologa lefase ba hlasetšwe ke phišo e šoro kudu le maemo a mangwe a kotsi a tša leratadima ao a tlišwago ke yona. Ela hloko dipego tše di latelago:

•   “Lefase le sa tšwa go fiša wa go tologa kgweding ye ya June, go feta mengwageng e 174 e fetilego mola batho ba thomago go rekhota dithempheretšha.”—Ba Taolo ya tša Mawatle le tša Leratadima ka Nageng, Lefapha la tša Kgwebo la United States, 13 July 2023.

•   “Italia, Sepania, Fora, Jeremane le Poland ka moka di lebane le phišo e kotsi kudu gomme go letetšwe gore dihlakahlakeng tša Sicily le Sardinia dithempheretšha di tla hlatlogela go 48°C. Tše e ka ba dithempheretšha tša godimo kudu tšeo di kilego tša rekhotwa Yuropa.”—Mokgatlo wa Yuropa wa go Lekola Sebakabaka, 13 July 2023.

•   “Ge phišo polaneteng ya rena e dutše e oketšega, re letetše gore go be le dipula tša matlorotloro tšeo di boaboago tšeo di tlago go baka mafula a magolo.”—Stefan Uhlenbrook, molaodi wa tša meetse le mahlwa Mokgatlong wa Lefase wa tša Leratadima, 17 July 2023.

 Na go oketšega ga dipego tše bjalo tša maemo a mpefalago a leratadima go a go hlobaetša? Ekwa gore Beibele e reng ka taba ye e bohlokwahlokwa.

 Ee. Phišo e šoro yeo e aparetšago lefase ka moka le maemo a mangwe a mpefalago a leratadima di dumelelana le ditiragalo tšeo Beibele e di boletšego e sa le pele gore di tla direga nakong ya rena. Ka mohlala, Jesu o porofetile gore re tla bona “dilo tše di boifišago,” goba “dimaka tše di šiišago, le dipšhešamare tše dikgolo.” (Luka 21:11; Beibele ya Taba ye Botse) Phišo yeo e oketšegago lefaseng ka moka e dira gore ba bantši ba tšhoge gore batho ba tlo senya lefase.

 Aowa. Modimo o bopile lefase gore re dule go lona ka mo go sa felego, a ka se dumelele batho ba le senya. (Psalme 115:16; Mmoledi 1:4) Ge e le gabotse, o holofetša “go senya bao ba senyago lefase.”—Kutollo 11:18.

 Beibele e ruta gore Modimo o tlo šireletša lefase dikotsing tša tlhago e bile o na le matla a go dira bjalo.

•   “[Modimo] o homotša ledimo, gore maphoto a lewatle a kokobele.” (Psalme 107:29) Modimo o na le matla a go laola tlhago e bile o tlo lokiša mathata ao a dirago gore batho ba tlaišwe ke maemo a mabe a leratadima.

•   “O hlokomela lefase, o le dira gore le tšweletše ka boati.” (Psalme 65:9) Lefase le tlo šegofatšwa ke Modimo gore e be paradeise.

 Gore o ithute ka mo go oketšegilego ka tshepišo ya ka Beibeleng ya gore lefase le tlo boela sekeng, bona sehlogo seo se rego “Who Will Save the Earth?”