Mogato 4

Hlalosang Melao ya ka Gae ka mo go Kwagalago Gomme le e Diriše Gatee-tee

Ke ka baka la’ng le swanetše go gata mogato wo? Ronald Simons e lego setsebi sa tša leago kua Yunibesithing ya Georgia o re: “Taba ke gore bana ba atlega kudu ge e ba melao le tayo e le e tiilego. Ka ntle le melao, bana e ba baithati, gomme ba dira gore yo mongwe le yo mongwe yo a lego kgaufsi le bona a se thabe.” Lentšu la Modimo ka mo go kwagalago le re: “Mo-hlokiša-ngwana-kxati ó mo hloile.”—Diema 13:24.

Tlhohlo: Go hlalosa mellwane e kwagalago yeo e beetšwego boitshwaro bja bana le go e diriša go nyaka nako, boiteko le kgotlelelo. Le gona bana ba na le kganyogo ya tlhago ya go nyaka go leka go tia ga mellwane yeo. Mike le Sonia, bao ba godišago bana ba babedi, ba hlalosa tlhohlo ye gabotse. Ba re: “Bana ke batho ba banyenyane bao ba nago le megopolo ya bona le dikganyogo le tshekamelo ya go dira sebe.” Batswadi ba ba rata barwedi ba bona kudu. Eupša ba dumela gore: “Ka dinako tše dingwe, bana ba ka ba le manganga le go ba baithati.”

Tharollo: Ekišang tsela yeo Jehofa a ilego a dirišana le setšhaba sa Isiraele ka yona. Tsela e nngwe yeo a bontšhitšego gore o rata batho ba gagwe ka yona ke ka go hlalosa gabotse melao yeo a bego a letetše gore ba e hlomphe. (Ekisodo 20:2-17) O ile a bolela ditla-morago tša go se kwe melao yeo.—Ekisodo 22:1-9.

Ka gona, ngwalang lelokelelo la melao ya ka gae goba melao yeo le naganago gore bana ba lena ba ka e kwa. Batswadi ba bangwe ba šišinya gore lelokelelo leo le be le melao e sego kae, mo gongwe e ka ba e mehlano goba go feta. Ga go thata go diriša melao ya ka gae yeo e kgethilwego gabotse e bile go bonolo go e gopola. Kgaufsi le melao yeo, ngwalang ditla-morago tša go e tshela. Kgonthišetšang gore dikotlo tšeo ke tše di kwagalago le gore le ikemišeditše go di phethagatša. Boeletšang melao yeo ka mehla e le gore bohle—go akaretša mma le tate—ba tsebe seo se letetšwego go bona.

Ge e ba melao e tshetšwe, phethagatšang ditla-morago tša yona ka pela gomme le dire bjalo le sa galefa, le tiile gomme le sa kgaotše. Hlokomela: Ge e ba o befetšwe, leta go se nene go fihlela moya wa gago o theogile, pele o ka phetha tayo le ge e le efe. (Diema 29:22) Lega go le bjalo, o se ke wa dika-dika. O se ke wa rerišana le bana. Ge o dira bjalo, ngwana wa gago o tla nagana gore melao ga e tšewe e le ya kgonthe. Se ke se se swanago le seo Beibele e se bolelago ge e re: “Pelo tša bana ba batho di tlala xo dira bobe, ka xe xô diêxa kôtlô ye e ahloletšwexo disenyi.”—Mmoledi 8:11.

Ke bjang gape le ka dirišago matla a lena a taolo ka tsela yeo e holago bana ba lena?

[Mantšu a ipiletšago a tsopotšwego go letlakala 6]

“Fela anke Ee ya lena e be Ee Aowa ya lena, e be Aowa.” —Mateo 5:37