Mehlala ya Malapa ao a Atlegilego​—Karolo ya bobedi

Ka ge go boletšwe sehlogong sa “Mehlala ya Malapa ao a Atlegilego—Karolo 1,” melao ya motheo ya Beibele e ka nea malapa thekgo dinakong tše thata. * Jehofa Modimo o holofetša bao ba phelago ka ditekanyetšo tša gagwe gore: “Ke tlo Xo lemôša ka Xo ruta tsela ye O tl’o xo e swara, ka Xo eletša mahlô a-ka à Xo ukametše.”—Psalme 32:8.

Go lebeletšana le mathata a tša ditšhelete. Ditaba tša tša ditšhelete gantši ke modu wa dingangišano tše tseneletšego lenyalong. Eupša melao ya motheo ya Beibele e ka thuša malapa go ba le pono e nepagetšego ka ditaba tša tša ditšhelete. Jesu o itše: “Tlogelang go belaelela meoya ya lena ge e le ka seo le tlago go se ja goba seo le tlago go se nwa, goba go belaelela mebele ya lena ge e le ka seo le tlago go se apara . . . Tatago lena wa legodimong o a tseba gore dilo tše ka moka le a di nyaka.”—Mateo 6:25, 32.

Go letlakala 23, Issachar, wa kua United States, o laodiša kamoo yena le lapa la gagwe ba ilego ba lebeletšana le mathata a tša ditšhelete ka morago ga ge legae la bona le sentšwe ke Ledimo la Katrina.

Ge bolwetši bo tlaiša setho sa lapa. Mo e ka bago batho ka moka ba a babja. Gantši boemo bjo e ba bja nakwana gomme ba fola ka pela. Eupša go thwe’ng ge e ba setho sa lapa se swerwe ke bolwetši bo bo sa alafegego? Beibele e bolela gore Jehofa a ka thekga bao ba babjago ba le dilaong. (Psalme 41:1-3) Ke bjang lapa e ka bago tsela yeo Jehofa a neago tlhokomelo e bjalo?

Go letlakala 24, Hajime, monna yo a lego lenyalong wa kua Japane, o laodiša kamoo yena le barwedi ba gagwe ba ilego ba ba ngata e tee go thuša mosadi wa gagwe, Noriko, ka morago ga go hwetša gore o na le bolwetši bjo bo šiišago.

Ge ngwana a e-hwa. Go hwa ga ngwana ke a mangwe a masetlapelo a magolo ao lapa le ka lebanago le ona. Jehofa o holofetša go phumola megokgo ya manyami yeo tahlegelo e bjalo e ka e bakago. (Kutollo 21:1-4) Gaešita le gona bjale, o nea bao ba hwetšwego khomotšo.—Psalme 147:3.

Go letlakala 25, Fernando le Dilma, ba kua United States, ba laodiša kamoo Beibele e ilego ya ba fa matla a go lebeletšana le go hwa ga leseana la bona la ngwanenyana.

Beibele ke tlhahlo e ka botwago bakeng sa malapa ao a lebanego le mathata ka ge dipego tše di lego matlakaleng a latelago di bontšha.

[Mongwalo wa tlase]

 [Box/​Pictures on page 23]

Go Lebeletšana le Mathata a tša Ditšhelete

Ka ge go anega Issachar Nichols, United States

“Ledimo la Katrina le ile la senya legae la rena, gwa šala feela lebato le le ritetšwego ka khonkhoriti. Sekolo seo ke bego ke šoma go sona se ile sa ba ka gare ga meetse lebakeng la kgwedi le seripa.”

SELEMONG sa 2005, nna le mosadi wa-ka, Michelle, gotee le morwedi wa rena wa nywaga e mebedi, e lego Sydney, re be re dula Bay St. Louis, Mississippi, U.S.A. Ka ge re le Dihlatse tša Jehofa, nna le Michelle re be re e-na le pakane ya go tšea karolo ka botlalo ka mo go ka kgonegago bodireding bja Bokriste. Ke be ke le morutiši wa go tlwaeletša batho mošomo gomme sekolo seo ke bego ke ruta go sona se be se le kgaufsi le New Orleans, Louisiana. Lenaneo la-ka le be le ntumelela go šoma matšatši a mararo ka beke gotee le go fetša bogolo bja nako yeo e šetšego ke ruta ba bangwe ka Beibele. Re be re iketlile ka mediro ya rena ya ka mehla. Ke moka go ile gwa kwala ditaba tša gore Ledimo la Katrina le be le le kgaufsi le go hlasela. Re ile ra rulaganya go huduga le semeetseng.

Ge ledimo le šetše le fetile, ngwako wa rena kua Bay St. Louis o be o senyegile gomme le sekolo seo ke bego ke ruta go sona kua New Orleans se be se senyegile. Ka tšhelete ya inšuranse le thušo ya mmušo ya tša ditšhelete re ile ra kgona go hwetša ntlo, eupša ke ile ka thatafalelwa ke go hwetša mošomo o tsepamego. Go oketša moo, mosadi wa-ka o ile a swarwa ke bolwetši bjoo bo bakwago ke meetse a šilafetšego. Tshepedišo ya gagwe ya go lwantšha malwetši e ile ya fokola gomme ka morago ga moo, o ile a fetelwa ke twatši ya ka Nile Bodikela yeo e bakwago go longwa ke menang. Go sa dutše go le bjalo, ditshenyagalelo tša inšuranse le tša boiphedišo di ile tša oketšega kudu.

Go itumelelanya le maemo a rena a mafsa, re ile ra ithuta go seketša kutšwanyana gaešita le dilong tšeo di nyakegago. Ke ile ka tlogela go kgetha-kgetha mohuta wa mošomo woo ke tla o amogelago.

Ke dumela gore go lahlegelwa ke dithoto tša rena go be go se bonolo. Eupša re leboga gore re be re phela. Le gona, phihlelo ye e gatelela therešo ya gore dilo tše di bonagalago ga di na mohola gakaalo. Ge e le gabotse, re ile ra gopotšwa mantšu a Jesu a rego: “Gaešita le ge motho a atetšwe ke dilo, fela bophelo bja gagwe ga bo tlišwe ke dilo tše a nago le tšona.”—Luka 12:15.

Re ile ra ba ra lemoga gore go sa šetšwe gore re be re e-kwa bohloko ka seo re se lobilego, go na le bao ba ilego ba lahlegelwa ke go gontši—ba bangwe gaešita le ke maphelo a bona. Le ke le lengwe la mabaka ao ka ona, gatee-tee ka morago ga kotsi, ke ilego ka swarega modirong wa tša tlhakodišo, go nea thekgo ya maikwelo go ba bangwe bao ba ilego ba lahlegelwa ke dilo tša bona.

Mathateng ao ka moka, Psalme 102:17 ka mo go kgethegilego e ile ya re homotša. E bolela gore Jehofa Modimo “ó tlo phafoxêla dithapêlô tša dišuana; ’thapêlô tša bôná a ka se di nyatše.” Re le lapa, re ile ra kwa thekgo ya gagwe!

[Lepokisi go letlakala 23]

Ka morago ga gore Gulf Coast ya United States e hlaselwe ke Ledimo la Katrina le Ledimo la Rita ka 2005, Dihlatse tša Jehofa kapejana di ile tša hloma mafelo a 13 a tlhakodišo, mafelo a senyane a bobolokelo gotee le mafelo a go bolokela makhura a dinamelwa. Baithapi ba e nyakilego go ba ba 17 000 ba Dihlatse ba ile ba kgeregela moo go tšwa United States le dinageng tše dingwe tše 13 bakeng sa go tlo thuša ka tša tlhakodišo. Ba lokišitše magae a dikete.

 [Box/​Pictures on page 24]

Ge Bolwetši bo Tlaiša Setho sa Lapa

Ka ge go anega Hajime Ito, Japane

“Re be re thabela go apea re le gotee—go fihlela Noriko a babja. Ga bjale ga a kgone go ja goba go nwa ka molomo wa gagwe goba gaešita le go bolela. O dula a le setulong sa digole gomme o hema ka sedirišwa sa go thuša go hema.”

KA MAY 2006, mosadi wa-ka, Noriko, o ile a thoma go thatafalelwa ke go bolela. Selemong seo o ile a thoma go ba le mathata a go ja le go nwa. Ka September go ile gwa hwetšwa gore o na le bolwetši bjo šoro bja tshepedišo ya megalatšhika [amyotrophic lateral sclerosis (ALS)]—bolwetši bjo bo tšwelago pele bjo bo šarakanyago disele tša megalatšhika bjokong le mokokotlong. Ka dikgwedi tše nne feela, bophelo bja rena bo ile bja fetoga ka mo go feletšego. Le gona, mathata a gagwe a be a sa thoma.

Ge nako e dutše e e-ya, leleme la Noriko le ile la golofala gomme gwa ba bjalo le ka letsogo la gagwe le letona. Tshepedišo e bitšwago gastrostomy (e lego go buiwa bakeng sa go bula lešoba leo le yago mogodung ka go lebanya, moo go tsenywago phaephe ya go mo thuša go ja) e ile ya mo kgontšha go ja ka phaephe gomme tshepedišo e bitšwago tracheostomy—lešoba la go buiwa molaleng leo le dumelelago moya go tsena—e ile ya dira gore a se sa kgona go bolela. Ke nagana gore se se ile sa kweša Noriko bohloko kudu ka ge e be e le motho wa matšato. Re Dihlatse tša Jehofa gomme Noriko gotee le barwedi ba-ka ba be ba fetša nako ya bona ba le bodireding bja nako e tletšego bja Bokriste. Ga bjale Noriko o ithekga ka sedirišwa sa go mo thuša go hema gomme o dula a le malaong.

Lega go le bjalo, se ga se dire gore Noriko a kgaotše! Ka mohlala, o ya dibokeng tša Bokriste ka setulo sa digole seo se kgomagantšwego le sedirišwa sa go mo thuša go hema. Ga a sa kgona go kwa gabotse, ka gona morwedi wa-ka o mo ngwalela dintlha ka mongwalo o mokoto ge diboka di tšwela pele e le gore a ka holwa ke lenaneo. Le gona, gaešita le ge Noriko a ile a swanelwa ke go kgaotša bodiredi bja nako e tletšego, o sa dutše a ngwalela batho mangwalo, a ba ruta ka molaetša wa kholofelo o tšwago Beibeleng ka go diriša sedirišwa se se kgethegilego seo se hlometšwego khomphutheng ya rena.—2 Petro 3:13; Kutollo 21:1-4.

Re ile ra dirišana bjalo ka lapa go thuša Noriko. Barwedi ba-ka ka bobedi ba ile ba nyaka mešomo e mefsa e le gore ba ka hwetšagala bakeng sa go thuša ka gae ka mo go oketšegilego. Boraro bja rena re hlokomela mediro e mentši ya letšatši le letšatši yeo Noriko a bego a tlwaetše go e dira.

Ka dinako tše dingwe mesong ge ke lebelela Noriko, o bonagala a lapile. Ke ipotša gore, ‘Ke duma go mmotša gore a iketle lehono.’ Eupša Noriko o nyaka go abelana molaetša wa Beibele le ba bangwe. Ge ke thoma go mo lokišeletša khomphutha, mahlo a gagwe a a phadima! Ge a ngwala, boemo bja gagwe bo a kaonefala. Ke lemogile bohlokwa bja gore motho a dule a “e-na le go gontši mo [a] go dirago modirong wa Morena.”—1 Bakorinthe 15:58.

Phihlelo ya Jason Stuart yoo a swerwego ke bolwetši bja ALS yeo e laodišitšwego tokollong ya Phafoga! (ya Seisemane) ya January 2006, e ile ya thuša Noriko go phema go dula a nyamile. Ge e le gabotse, ge bašomi ba sepetlele ba makatšwa ke go bona a e-na le pono e bjalo e nepagetšego, Noriko o ile a ba botša ka sehlogo seo e bile re ile ra phatlalatša dikopi tša makasine woo go bašomi bao. Mosadi wa-ka o ile a thekgwa kudu ke go ruta ba bangwe ka tumelo ya gagwe.

Nna le Noriko re šetše re nyetše nywaga e ka bago e 30, eupša nywageng e meraro e fetilego, go na le dilo tšeo ke ilego ka thoma go di tšeela godimo ka yena tšeo pele ke bego ke di tšeela tlase. Ruri ke thabela gore ke ile ka nyalana le yena!

 [Box/​Pictures on page 25]

Ge Ngwana a E-hwa

Ka ge go anega Fernando le Dilma Freitas, United States

“Kgateletšego e tseneletšego ya maikwelo ya go hwelwa ke ngwana ke selo seo se sa hlalosegego. Ga go na bohloko bjoo bo swanago le bjoo.”

MORWEDI wa rena yo re ilego ra mo rea Precious, o ile a hwa ka April 16, 2006. O be a e-na le matšatši a lesome feela. Mo e ka bago dikgwedi tše tharo nakong ya boimana, go ile gwa lemogwa gore leseana la rena leo le sa imilwego le na le bothata bjo bogolo bja pelo. Ge nako ya go belega e dutše e batamela, go ile gwa ba molaleng gore le be le tla hwa gatee-tee ka morago ga go belegwa—ge e ba le be le ka phela. Bjo e be le boemo bjo thata kudu go rena go ka bo amogela. Re be re e-na le bana ba bararo ba phetšego gabotse. Re be re sa kgolwe gore leseana la rena le be le tla hwa.

Ka morago ga ge Precious a belegwe, setsebi se se nago le phihlelo mabapi le tšharakano ya dikarolwana tša disele tša leabela (chromosomal disorders) se ile sa hwetša gore o na le boemo bjo bo sa tlwaelegago bjoo bo bitšwago Trisomy 18, yeo e kgomago feela leseana le tee go a 5 000. Go be go le molaleng gore o be a ka se phele nako e telele. Re ile ra ikwa re felelwa ke matla ka gobane go be go se na seo re ka se dirago. Selo seo re bego re ka se dira e be e le go ba le yena nakong e nyenyane ya bophelo bja gagwe. Ka gona, re ile ra dira sona seo.

Re leboga nako yeo ya matšatši a lesome yeo re e feditšego re e-na le Precious. Nakong yeo, rena le barwedi ba rena ba bararo re ile ra tlemagana le yena. Re ile ra mo kuka, ra bolela le yena, ra mo gokarela, ra mo atla e bile ra tšea diswantšho tše dintši le yena ka mo go ka kgonegago. Re ile ra bolela le gore ke mang yoo a swanago le yena kudu ka lapeng. Setsebi seo se ilego sa lemoga boemo bja Precious se be se re etela letšatši le lengwe le le lengwe sepetlele. Se be se lla le rena gomme se re botša kamoo se bego se nyamile ka gona. Se ile sa ba sa thala seswantšho sa Precious ge se dutše se bolela le rena gore se mo gopole ka sona. Se ile sa re nea kopi ya seswantšho seo.

Ka ge re le Dihlatse tša Jehofa, re dumela ka botlalo seo Beibele e se rutago ge e re Modimo o tla dira gore lefase la rena le be paradeise gape le gore o hlologelwa go tsošetša bahu lefaseng—go akaretša le masea a bjalo ka Precious. (Jobo 14:14, 15; Johane 5:28, 29) Re lebeletše pele letšatšing leo la ge re tla mo kuka le go mo gokarela gape. Nako le nako ge re e-kwa lentšu “paradeise,” kholofelo yeo e ruthetša dipelo tša rena! Lega go le bjalo, re homotšwa ke taba ya gore Precious o mogopolong wa Modimo gomme ga a sa tlaišega.—Mmoledi 9:5, 10.