Sephiri 4: Tlhompho

“A . . . mašata le polelo e gobošago di tlošwe go lena.”—Baefeso 4:31.

Se se ra gore’ng? Malapa ao a nago le mathata le malapa ao a atlegago ka bobedi a ba le diphapano. Eupša malapa ao a atlegago a boledišana ka mathata go e na le go kodutlana, go rogana goba go diriša mekgwa e mengwe e gobošago ya polelo. Ditho tša lapa di swarana ka tsela yeo di nyakago gore le tšona di swarwe ka yona.—Mateo 7:12.

Bohlokwa bja sona. Seo re se botšago batho se ka ba gobatša go etša sebetša sa kgonthe. Seema sa Beibele se re: “Xo dula lešokeng xo phala xo dula le mosadi wa swele le manganga.” (Diema 21:19) Ke therešo gore se se swanago se ka bolelwa ka monna yoo a nago le leleme le le hlabago. Le gona, ge go tliwa tabeng ya go godiša bana, Beibele e re: “Lena bo-tate, le se ke la befediša bana ba lena, e le gore ba se nyame.” (Bakolose 3:21) Bana bao ba dulago ba solwa ba ka ikwa eka ba ka se kgone go kgahliša batswadi ba bona. Ba ka palelwa le ke go fo leka.

Leka boitlwaetšo bjo. Diriša dipotšišo tše di latelago e le tlhahlo bakeng sa go hlahloba tekanyo ya tlhompho ka lapeng la gago.

▪ Ka lapeng la-ka, na diphapano gantši di feleletša ka gore motho yo mongwe a tšwe ka phaphošing a galefile?

▪ Ge ke bolela le molekane wa-ka goba bana, na ke diriša mantšu a gobatšago, a bjalo ka “lešilo,” “setlaela” goba a mangwe a swanago le ao?

▪ Na ke ile ka godišetšwa ka lapeng leo polelo e gobošago e bego e tlwaelegile?

Dira phetho. Nagana ka pakane e tee goba tše pedi tšeo o bego o ka ipeela tšona mabapi le go bontšha tlhompho tseleng yeo o bolelago ka yona. (Tšhišinyo: Ikemišetše go diriša “nna” go e na le go diriša “wena” dipolelong tša gago. Ka mohlala, “Ke kwa bohloko ge o  . . ,” go e na le gore “O dula o . . . ”)

O re’ng o sa botše molekane wa gago (di)pakane tša gago? Ka morago ga dikgwedi tše tharo, botšiša molekane wa gago gore o bona o dirile tšwelopele e kaakang.

Nagana ka ditsela tšeo di ka go thušago gore o kgaotše go diriša polelo e gobošago ge o boledišana le bana ba gago.

O re’ng o sa kgopele tshwarelo go bana ba gago ge o ka be o boletše le bona ka tsela e bogale goba e kodutlago?

[Seswantšho go letlakala 6]

Go etša ge maphoto a lewatle a ka fetša lefsika le le tiilego ganyenyane- ganyenyane, go diriša polelo e gobošago go ka dira gore lapa le fokole