Sephiri 7: Motheo o Tiilego

Se se ra gore’ng? Malapa a tiilego ga a dule a tiile ka mohlolo, go swana le ngwako woo o dulago o tiile ka nywaga-some e mentši. Moago o tiilego o nyaka motheo o tiilego, le gona go ka bolelwa se se swanago ka lapa le tiilego. Malapa ao a atlegago a agilwe mothopong wa tlhahlo e šomago.

Bohlokwa bja sona. Go na le dipuku tše dintši, dimakasine le mananeo a thelebišene ao a huperego keletšo e ntši mabapi le bophelo bja lapa. Baeletši ba ba bangwe ba manyalo ba kgothaletša banyalani ba nago le mathata gore ba dule gotee, mola baeletši ba bangwe ba ka kgothaletša banyalani bao go arogana goba go hlalana. Ditsebi di fetoša gaešita le dikgopolo tša bona ka noši ditabeng tše bjalo. Ka mohlala, ka 1994 setsebi se se tumilego seo se šomago feela ka bana ba lego mahlalagading se ile sa ngwala gore pejana mošomong wa sona, se be se nagana gore “go kaone kudu gore bana ba dule le batswadi ba thabilego ba sego lenyalong go e na le go dula le batswadi ba lego lenyalong bao ba sego ba thaba. Ke be ke nagana gore tlhalo e be e le kgetho e kaone go e na le go dula lenyalong leo le se nago lethabo.” Lega go le bjalo, ka morago ga nywaga-some e mebedi ge a šetše a e-na le phihlelo, o ile a fetoša pono ya gagwe. O boletše gore: “Tlhalo e šarakanya bana ba bantši.”

Dipono tša batho ka taba e itšego di ka fetoga, eupša keletšo e kaone-kaone yeo e ka hwetšwago e tla dula e bontšha melao ya motheo yeo e lego ka Lentšung la Modimo, Beibele, ka tsela e itšego. Ge o dutše o bala lelokelelo le la dihlogo, o ka no ba o ile wa lemoga gore go na le molao wa motheo wa Beibele wo o lego godimo go matlakala 3-8. Melao e bjalo ya motheo e thušitše malapa a mantši go hwetša katlego ya kgonthe. Go swana le malapa a mangwe ka moka, malapa ao le ona a lebeletšana le mathata. Phapano ke gore Beibele e a neile motheo o tiilego bakeng sa lenyalo le bophelo bja lapa. Re ka letela gore seo e be therešo ka Beibele, ka ge Mongwadi wa yona, Jehofa Modimo, e le Mothomi wa lapa.—2 Timotheo 3:16, 17.

Leka boitlwaetšo bjo. Ngwalang lelokelelo la mangwalo a tsopotšwego godimo matlakaleng 3 go fihla go 8. Oketšang ka ditemana tša Beibele le ge e le dife tše dingwe tšeo di le thušitšego. Bolokang lelokelelo la ona gomme le dule le a bala.

Dira phetho. Ikemišetše go diriša Beibele bophelong bja gago bja lapa.

 [Seswantšho go letlakala 8, 9]

Ge go e-na le motheo o tiilego wa Mangwalo, lapa la gago le ka kgona go emeletšana le madimo ao a le hlaselago