Tsela 3—Dula o Ena le Seo o se Dirago

“Ge nkabe go itšhidulla e be e le philisi, e be e tla ba philisi yeo batho ba bantši ba swanetšego go e newa lefaseng ka bophara.”—Emory University School of Medicine. Gare ga dilo ka moka tšeo re ka di dirago bakeng sa boemo bja rena bja tša maphelo, ke tše sego kae feela tšeo ka kakaretšo di nago le mohola go feta go itšhidulla.

◯ Iteke ka matla. Go dula re ena le seo re se dirago go ka re thuša gore re ikwe re thabile kudu, re nagana gabotse, re na le matla a oketšegilego, re le bao ba tšweletšago, le gona ka go ja dijo tše di swanetšego, go ka laola boima bja rena bja mmele. Ga go nyakege gore go itšhidulla go be bohloko goba go fetelele gore go be le mohola. Go itšhidulla go ka ba le mohola ge e ba re go dira ka mehla ka makga a mmalwa mo bekeng.

Go kitima, go sepediša, go ragela paesekele le go tšea karolo dipapading—mo go lekanego go dira gore pelo ya gago e bethe ka lebelo le go dira gore o fufulelwe—go ka kaonefatša kgotlelelo ya gago le go go thuša go thibela go ema ga pelo le go hwa lehlakore. Go kopanya boitšhidullo bjo bjalo bja go fofafofa le go itlwaetša ka go kuka ditšhipi mo go lekanetšego gotee le go fo itšhidulla go thuša go tiiša marapo a gago, digoba tša ka gare gotee le maoto a gago le matsogo. Mediro ye e thuša mmele gore o dule o matlafetše, e lego seo se thušago go laola boima bja gago bja mmele.

◯ Sepela. Go itšhidulla go hola batho ba nywaga ka moka gomme ga go nyakege gore motho e be setho sa lefelo la boitšhidullo e le gore a kgone go itšhidulla. Ke mo gobotse gore o diriše dinao tša gago go e na le go diriša koloi, pese goba lifithi. Ke ka baka la’ng o swanetše go emela senamelwa mola e le gore o ka itshepelela go ya moo o yago, mohlomongwe wa ba wa fihla gona ka pela? Batswadi, kgothaletšang bana ba lena go tšea karolo dipapading, ba bapalele ka ntle ge e ba go kgonega. Dipapadi tše bjalo di tiiša mebele ya bona le go ba thuša gore ba kgone go diriša mebele ya bona ka tsela yeo dipapadi tšeo di bapalwago go dutšwe, tše bjalo ka tša bidio, di ka se kgonego go dira bjalo.

Go sa šetšwe gore o thoma o le yo mogolo gakaakang, o ka holwa ke boitšhidullo bjo bo lekanetšego. Ge e ba o le yo mogolo kudu goba o ena le mathata a tša maphelo gomme o be o sa itšhidulle, ke gabohlale go bona ngaka mabapi le kamoo o ka thomago ka gona. Eupša thoma go itšhidulla! Boitšhidullo bjo bo thongwago ganyenyane-ganyenyane le bjo bo sa dirwego go feta tekano bo ka thuša gaešita le batho ba bagolo go ba le digoba tše di tiilego le marapo a tiilego. Go ka thuša le batšofadi go phema go wa.

Go itšhidulla ke gona go thušitšego Rustam, yo go boletšwego ka yena sehlogong sa mathomo sa tlhatlamano ye ya dihlogo. Nywageng e šupago e fetilego, yena le mosadi wa gagwe ba ile ba thoma go kitima ganyenyane mesong e mengwe le e mengwe, matšatši a mahlano ka beke. O anega ka gore: “Mathomong, re be re ipeela mabaka a go se ye. Eupša go ba le modirišani go re thušitše ka gobane re be re tutuetšana. Ga bjale go fetogile mokgwa o mobotse le wo o thabišago.”

[Seswantšho go letlakala 6]

Go itšhidulla e ka ba mo go thabišago