4. Eba Šedi ge o Eja Mabenkeleng a go Jela

Jeff, e lego monna yo a phetšego gabotse le yo mafolofolo wa nywaga e 38 o ile a iša lapa la gagwe go yo ja lebenkeleng kgauswi le Pittsburgh, Pennsylvania, U.S.A. Ka morago ga kgwedi, Jeff o ile a hwa a bolawa ke bolwetši bjo šoro bja sebete. Ge e le gabotse o bolailwe ke’ng? Go be go na le dieie tše nanana ka dijong tša gagwe—tšeo di bego di na le ditwatši tše di bakago bolwetši bjo šoro bja sebete.

MO E ka bago seripagare sa tšhelete yeo go rekwago dijo ka yona nageng e nngwe ya ka Bodikela e dirišetšwa mabenkeleng a go jela. Lega go le bjalo, yona nageng yeo, go begwa gore dijo tša mabenkeleng a go jela di baka seripagare sa malwetši a dijo tše di sa šireletšegago.

Ke therešo gore ge o kgetha go ja mabenkeleng ao, motho yo mongwe o reka ditlabakelo, a hlwekiša khitšhi a ba a go apeela. Eupša o ka ikgethela gore o ja kae, o ja eng le gore o phuthela bjang dijo tšeo o yago le tšona gae.

● Lebelela gohle.

Daiane yo a dulago Brazil o re: “Ge re tsena ka lebenkeleng la go jela ka lekga la pele, re lebelela gohle go bona ge e ba ditafola, mašela a ditafola, didirišwa le batho bao ba re neago dijo ba hlwekile e bile tšohle di dutše ka bothakga. Ge e ba go se bjalo, re a tloga ra yo nyaka lebenkele le lengwe la go jela.” Dinageng tše dingwe, bahlankedi ba maphelo ba dula ba hlahloba bohlweki bja mafelo a go jela ke moka ba ngwala seo ba se hweditšego gore batho bohle ba se bale.

● Eba šedi ge o tšea dijo tšeo di šetšego.

Mokgatlo wa United States Food and Drug Administration o eletša ka gore: “Ge e ba o ka se fihle gae pele ga diiri tše pedi ka morago ga ge o jele [goba kapejana ge e ba boemo bja leratadima bo le ka godimo ga 32°C], o se ke wa tšea dijo tšeo o di šadišitšego.” Ge e ba go na le dijo tšeo o di šadišitšego, eya gae le tšona gateetee gomme o di bee ka setšidifatšing.

Ge e ba o ka latela megato e mene yeo e boletšwego dihlogong tše, o ka dira gore dijo tša gago di šireletšege.

[Lepokisi/Seswantšho go letlakala 17]

TLWAETŠA BANA BA GAGO: “Re ruta bana ba rena go phema dijo tšeo go ka bago kotsi go di ja.”—Noemi, Philippines