SEO BATHO BA SE BOLELAGO

Batho ba bangwe ba dumela gore batho ba ka diriša diphoofolo kamoo bona ba ratago ka gona. Ba bangwe ba nagana gore diphoofolo di swanetše go swarwa bjalo ka batho.

• Motho yo mongwe yo a lwelago ditshwanelo tša diphoofolo yo a tumilego o ile a hlalosa gore diphoofolo di swanetše go ba le “ditshwanelo tša motheo gomme di se swarwe bjalo ka didirišwa tša kgwebo.” O oketša ka gore: “Re swanetše go tlogela go swara diphoofolo bjalo ka dithoto tša rena.”

• Radibilione Leona Helmsley o ile a dira selo seo ba bangwe ba se bonago e le go fetelela ka go šiela mpša ya gagwe R129600 000 gomme a ngwala gore setoto sa mpša yeo se bolokwe kgauswi le yena ge e hwile.

Seo go ka naganwago ka sona: O nagana gore diphoofolo di swanetše go swarwa bjang?

SEO BEIBELE E SE BOLELAGO

Mmopi wa bophelo, e lego Jehofa Modimo, o boditše batho gore ba “buše dihlapi tša lewatle le dinonyana tše di fofago magodimong le sephedi se sengwe le se sengwe se se gagabago lefaseng.” (Genesi 1:28) Ka gona go a kwagala go phetha ka gore Modimo o tšea batho ba phagametše diphoofolo.

Phetho ye e gatelelwa ke mantšu a bohlokwa ao a boletšwego pele ga lengwalo leo le tsopotšwego pejana. Beibele e re: “Modimo a bopa motho ka seswantšho sa gagwe, a mmopa ka go swantšha ka yena Modimo; a bopa yo motona le yo motshadi.”—Genesi 1:27.

Ka ge re bopilwe ka ‘seswantšho sa Modimo,’ re dibopiwa tša moswananoši tšeo di nago le dika tša Modimo tše bjalo ka bohlale, toka le lerato. Le gona batho ba belegwa ba na le bokgoni bja go ba le boitshwaro le kganyogo ya go rapela Modimo. Diphoofolo ga di na dika tše bjalo tša batho ka ge di se tša bopša ka ‘seswantšho sa Modimo.’ Ke dibopiwa tša tlasana gomme ga se tša bopelwa gore di swarwe bjalo ka batho.

Na se se ra gore batho ba swanetše go swara diphoofolo gampe? Aowa.

• Molaong woo Modimo a o neilego Baisiraele, o ile a kgonthišetša gore diphoofolo di newa nako ya go khutša, dijo, di thušwe ge di fokola gomme di šireletšwe gore di se gobale.—Ekisodo 23:4, 5; Doiteronomio 22:10; 25:4.

“O šome mošomo wa gago ka matšatši a tshelelago; eupša ka letšatši la bošupa o se ke wa swara mošomo, e le gore poo ya gago le pokolo ya gago di khutše.” —Ekisodo 23:12.

SEO BATHO BA SE BOLELAGO

Batsomi ba bangwe le barei ba dihlapi ba bolaya diphoofolo feela bakeng sa papadi le go ithabiša. Ba bangwe ba ka dumelelana le mongwadi wa Morussia Leo Tolstoy, yo a ngwadilego gore go bolaya le go ja diphoofolo ke “kgobogo.”

SEO BEIBELE E SE BOLELAGO

Modimo o dumelela batho go bolaya diphoofolo bakeng sa go itšhireletša goba go dira diaparo. (Ekisodo 21:28; Mareka 1:6) Le gona Beibele e re batho ba ka bolaya diphoofolo bakeng sa dijo. Genesi 9:3 e re: “Le ka ja phoofolo e nngwe le e nngwe e phelago.” Gaešita le Jesu o ile a thuša barutiwa ba gagwe go swara dihlapi tšeo ba ilego ba di ja ka morago.—Johane 21:4-13.

Lega go le bjalo, Beibele e re Modimo “o hloile le ge e le mang yo a ratago bošoro.” (Psalme 11:5) Seo se bolela gore Modimo ga a nyake gore re gobatše goba re bolaye diphoofolo feela bakeng sa go ithabiša goba papadi.

Beibele e bontšha gore Modimo o tšeela godimo bophelo bja diphoofolo.

• Beibele e bolela ka nakong ya tlholo gore: “Modimo a dira diphoofolo tša naga go ya ka mehuta ya tšona le diruiwa go ya ka mehuta ya tšona le segagabi se sengwe le se sengwe go ya ka mohuta wa sona. Modimo a bona e le mo gobotse.”—Genesi 1:25.

• Beibele e bolela ka Jehofa gore: “O nea diphoofolo dijo tša tšona.” (Psalme 147:9) Modimo o hlotše tikologo yeo e neago diphoofolo dijo tše dintši le lefelo la go dula.

• Kgoši Dafida wa Isiraele o ile a bolela thapelong gore: “Wena Jehofa, o phološa motho le phoofolo.” (Psalme 36:6) Ka mohlala, nakong ya Meetsefula a lefase ka moka, Jehofa o ile a phološa batho ba seswai le mehuta ka moka ya diphoofolo pele a fediša batho ba babe.—Genesi 6:19.

Go molaleng gore Jehofa o rata diphoofolo tšeo a di bopilego, gomme o letetše gore batho ba di sware ka lerato.

“Moloki o hlokomela bophelo bja seruiwa sa gagwe.”—Diema 12:10.