Ke dithuto dife tšeo o ithutilego tšona ge o sa le mofsa?

Sekolong go be go rutwa thuto ya tlhagelelo, eupša ga go na motho yo a kilego a hlalosa kamoo bophelo bo thomilego ka gona. Ge batswadi ba ka e eba Matao, ke be ke theetša baruti ba bodumedi bja bona le go ba botšiša dipotšišo tše dintši. Eupša dikarabo tša bona tše dintši di be di sa nkgotsofatše.

Ke ka baka la’ng o ile wa ba setsebi sa dipalo?

Ke ile ka kgahlwa ke dipalo ge ke sa le sekolong sa tlase. Kgahlego yeo e ile ya tšwela pele go fihlela yunibesithing, moo ke ilego ka thabela kudu dithuto tša dipalo. Ke hwetša go hlakantšha dipalo e le selo se se kgahlišago.

Go tlile bjang gore o kgahlegele Beibele?

Ka 1978, mosadi wa ka Jinghuei o ile a thoma go ithuta Beibele le Dihlatse tša Jehofa gomme ke be ke fela ke tšea karolo dipoledišanong tša bona. Ka nako yeo, re be re dula United States. Jinghuei o be a sa tšwa go hwetša lengwalo la gagwe le le phagamego la tša thutamahlale gomme nna ke be ke ithutela dipalo Yunibesithing ya Purdue kua Indiana.

O be o nagana eng ka Beibele?

Ke ile ka kgahlwa ke pego ya yona ya kamoo lefase le ilego la bopša ka gona bakeng sa gore motho a phele go lona. Ge e le gabotse, matšatši a tshela a tlholo ao go bolelwago ka ona go Genesi, go bonala a hlalositšwe gabotse go feta dinonwane tša  bogologolo. * Lega go le bjalo, ke be ke sa dumele go Mmopi ka nywaga e mentši.

Ke ka baka la’ng o be o thatafalelwa ke seo?

Seo se be se kgoma maikwelo a ka. Go dumela go Mmopi go be go bolela go tlogela bodumedi bjo ke bilego go bjona go tloga bjaneng, ka gobane Botao bja setlogo ga bo rute gore go na le Modimo goba Mmopi.

Eupša ka morago pono ya gago e ile ya fetoga. Go tlile bjang?

Ge ke be ke dutše ke nagana ka gore bophelo bo thomile bjang, ke mo ke ilego ka kgodišega gore sephedi sa mathomo se swanetše go ba se be se raragane kudu. Ka mohlala, se be se swanetše go kgona go tswala, e lego selo seo se nyakago boitsebišo bja leabela le tsela ya go fetišetša boitsebišo bjoo ka mo go nepagetšego. Le gona, gaešita le sele e nyenyane e nyaka dimolekule bakeng sa go bopa dikarolo ka moka tša sele e mpsha gotee le mokgwa wa go laola le go sepetša matla. Tshepedišo e bjalo e raraganego e ka itiragalela bjang selong seo se sa phelego? Bjalo ka setsebi sa dipalo, ke be nka se fo dumela kgopolo yeo. Ga go kgonege gore megato e bjalo e fo itiragalela.

O tutueditšwe ke eng gore o hlahlobišiše dithuto tša Dihlatse tša Jehofa?

Ke be ke fela ke ithuta le Dihlatse. Ke moka, ka 1995 ge ke be ke etetše Taiwan, ke ile ka babja gomme ke be ke nyaka thušo. Mosadi wa ka o ile a ikgokaganya le Dihlatse tša Jehofa tša Taiwan a le United States. Di ile tša nkhwetša ke lapile ka ntle ga sepetlele ka ge mepete e be e hlaela. Yo mongwe wa Dihlatse o ile a nkiša hoteleng gore ke yo khutša. O be a etla a ntlhola gomme ka morago a nkiša kliniking gore ke hwetše kalafo.

Ke ile ka kgongwa kudu ke tsela yeo Dihlatse tša Jehofa di ilego tša tshwenyega ka nna gomme ka nagana ka makga ao di ilego tša bontšha lapa la ka botho. Tumelo ya Dihlatse e be e dira gore e be batho ba fapanego. Ka gona ke ile ka tsošološa go ithuta ga ka Beibele le tšona gomme ka kolobetšwa ngwageng o latelago.

Na tumelo ya gago e thulana le dithuto tša gago?

Le gatee! Nywageng e sa tšwago go feta ke ile ka thuša borathutamahlale bao ba ithutago ka mošomo wa dikarolwana tša leabela. Thuto ya dikarolwana tša leabela e nea tsebo mabapi le tshepedišo ya bophelo, e lego tsebo yeo e dirago gore ke hlomphe bohlale bja Mmopi.

Nea mohlala wa bohlale bjoo.

Nagana ka go ikatiša ga diphedi. Diphedi tše dingwe, tše bjalo ka di-amoeba, ga di na tše ditona le tše ditshadi. Diphedi tše tše dinyenyane tšeo di nago le sele e tee di dira kopi ya boitsebišo bja tšona bja leabela ke moka tša ikarola, e lego go ikatiša ga diphedi ntle le go kopana ga tše ditona le tše ditshadi. Lega go le bjalo, diphoofolo tše dintši le dimela di ikatiša ka go kopana ga tše ditona le tše ditshadi, ka go kopanya boitsebišo bja tšona bja leabela go tšwa go e tona le e tshadi. Ke ka baka la’ng go ikatiša ka go kopana ga tše ditona le tše ditshadi go makatša?

Ke ka baka la’ng tshepedišo ya go ikatiša yeo go yona sephedi se tee se ikarolago go ba diphedi tše pedi, e bile seo se diregile ka katlego ka nako e telele, e ka fetogago tshepedišo yeo dilo tše pedi di kopanago go bopa selo setee? Tshepedišo yeo e nyakegago bakeng sa gore go kopanywe karolo ya leabela ya sephedi se setona le karolo ya leabela ya sephedi se setshadi ke e raraganego kudu mo e lego gore e thatafalela borathutaphedi bao ba dumelago tlhagelelong. Go ya ka pono ya ka, go ikatiša ga diphedi ka tsela ya go kopana ga tše ditona le tše ditshadi go bontšha ka mo go tiilego bohlale bja Modimo.