1. Ke mathata afe ao re lebeletšanago le ona, eupša ke ka baka la’ng Jehofa a ikgantšha ka rena? (Bona diswantšho tše di lego ka mo godimo.)

KA MOKA ga rena re a tseba gore mehleng ye bophelo bo boima kudu. Ba bantši ba lena bana babo rena le dikgaetšedi le babja kudu. Ba bangwe ba lena le ikgoletše kudu eupša le hlokometše batho ba gabo lena bao ba tšofetšego. Ba bangwe ba lena le palelwa le ke go no hlokomela malapa a lena ka dilo tše di nyakegago bophelong. Le gona, re a tseba gore ba bantši ba lena le lebeletšane le mathata a mantši ka nako e tee! Mathata a ka moka a nyaka nako e ntši le matla a mantši—re sa bolele ka tšhelete. Eupša go sa šetšwe mathata a, le kgodišegile gore Modimo o tla le thuša, e bile le na le tumelo ya gore Mmušo wa gagwe ke wona o tlago go le imolla. Ga go pelaelo gore Jehofa o ikgantšha ka lena!

2. Lengwalo la Jesaya 40:29 le re kgothatša bjang, eupša ke phošo efe e kgolo yeo re ka e dirago?

² Na ka dinako tše dingwe o ikwa eka ga o sa kgona go kgotlelela mathata a gago? Ge e ba o ikwa bjalo, tseba gore ga o noši. Beibele e bolela ka bahlanka ba Modimo ba nakong e fetilego bao ba ilego ba ikwa eka ga ba sa kgona. (1 Dikg. 19:4; Jobo 7:7) Eupša go e na le gore ba ineele mathateng a bona ba ile ba ithekga ka Jehofa. Jehofa  ga se a ba lahla ka gobane ke Modimo yo a “[neago] yo a lapilego matla.” (Jes. 40:29) Ka manyami, bahlanka ba bangwe ba Modimo ba bona okare tsela e kaone ya go lebeletšana le mathata a bona ke go tšwa ba khuditšenyana, go le bjalo ka ge e ka go hlankela Modimo ke morwalo. Ka gona, ba tlogela go bala Lentšu la Modimo, go ya dibokeng le go ya tšhemong, e lego seo Sathane a nyakago ba se dira.

3. (a) Re ka dira’ng gore Sathane a se re thibele go hlankela Modimo gabotse? (b) Re tlo bolela ka’ng sehlogong se?

³ Diabolo o tseba gabotse gore ge re dula re dira dilo tša Modimo tumelo ya rena e tlo tia, e bile ga a nyake gore tumelo ya rena e tie. Ka gona, ge o ikwa o nyamile e bile o lapile, o se ke wa tlogela Jehofa. Batamela kgauswi kudu le yena ka gobane “o tla [go] tiiša, o tla [go] matlafatša.” (1 Pet. 5:10; Jak. 4:8) Sehlogong se re tlo bolela ka maemo a mabedi ao a ka re dirago gore re se sa hlankela Modimo gabotse, le gona re tlo ithuta kamoo go diriša melao ya motheo ya Beibele go ka re thušago gore re tšwele pele re hlankela Modimo. Eupša a re thomeng pele ka go ithuta ka taba ya gore Jehofa o na le bokgoni bja go re matlafatša, bjoo go bolelwago ka bjona go Jesaya 40:26-31.

4. Re ka ithuta’ng lengwalong la Jesaya 40:26?

⁴ Bala Jesaya 40:26. Ga go na motho yo a kilego a kgona go bala dinaledi ka moka tšeo di lego legodimong. Borasaense ba re go ka ba go na le dinaledi tše 400 bilione sehlopheng sa dinaledi seo se bitšwago Milky Way. Lega go le bjalo, Jehofa o neile naledi e nngwe le e nngwe leina. Re ithuta’ng tabeng ye? Ge e ba Jehofa a tseba selo seo se sa phelego ka leina, ipotšiše gore o ikwa bjang ka wena yoo o mo hlankelago ka go rata e sego ka gobane o gapeletšega! (Ps. 19:1, 3, 14) Tatago rena yo lerato o tseba selo se sengwe le se sengwe ka wena. Beibele e re Jehofa o ‘badile meriri ya dihlogo tša rena ka moka.’ (Mat. 10:30) Le gona mopsalme o re kgonthišetša gore: “Jehofa o tseba matšatši a bao ba se nago bosodi.” (Ps. 37:18) Ruri Jehofa o tseba mathata ao re nago le ona e bile o re nea matla a gore re kgone go a kgotlelela.

5. Ke’ng seo se re kgodišago gore Jehofa a ka re nea matla a go lebeletšana le mathata?

⁵ Bala Jesaya 40:28. Matla ka moka a tšwa go Jehofa. Ka mohlala, nagana ka matla ao a a neago letšatši. Mongwadi wa dipuku tša saense e lego David Bodanis o itše: “Motsotswana o mongwe le o mongwe letšatši le ntšha matla ao a ka lekanago le mothuthupo wa dipomo [tše dibilione tša athomo].” Ka morago ga gore Monyakišiši yo mongwe a dire dipalopalo o ile a bontšha gore mahlasedi ao letšatši le a ntšhago ka motsotswana o tee feela, a ka dira gore go be le bophelo mo lefaseng ka mengwaga e 200 000! Na go na le motho yo a ka ganetšago gore Modimo yo a neago letšatši matla a ka palelwa ke go re nea matla a go lebeletšana le bothata le ge e le bofe?

6. Ke ka tsela efe joko ya Jesu e lego botho, gona go tseba seo go dira gore re ikwe bjang?

⁶ Bala Jesaya 40:29. Go hlankela Jehofa go thabiša kudu. Jesu o ile a botša barutiwa ba gagwe gore: “Rwalang joko ya ka.” Le gona o okeditše ka gore: “Le tla hweletša meoya ya lena tapologo. Gobane joko ya ka e botho, morwalo wa ka o bohwefo.” (Mat. 11:28-30) Ruri mantšu a ke a nnete! Ka dinako tše dingwe re ka ikwa re lapile ge re swanetše go ya dibokeng goba tšhemong. Eupša re ikwa bjang ge re boa? Re ikwa re lapologile kudu moo re ikwago re ka kgona go lebeletšana le mathata a bophelo. Ruri joko ya Jesu e botho!

7. Anega mohlala woo o bontšhago go nepagala ga lengwalo la Mateo 11:28-30.

⁷ Kgaetšedi yo mongwe o be a na le bolwetši bjo bo dirago gore motho a dule a lapile  (chronic fatigue syndrome), e bile a na le kgateletšego ya monagano le go opša ke hlogo e sa folego (migraine). Ka gona ka dinako tše dingwe o be a palelwa ke go ya dibokeng. Eupša ka letšatši le lengwe o ile a no ikgoga gomme a ya dibokeng. Ka morago ga gore a be gona dibokeng tšeo o ile a ngwala gore: “Polelo ya phatlalatša e be e bolela ka go nyama. Ngwanabo rena o ile a e nea ka tsela ya go naganela le yeo e kwelago bohloko. Polelo yeo e ile ya nkgoma kudu moo ke ilego ka rothiša megokgo. E ile ya nkgopotša gore ga go na lefelo le lengwe leo nka hwetšago khomotšo ntle le go ya dibokeng.” Ruri kgaetšedi yoo o ile a iteboga gore o ile a ya dibokeng letšatšing leo!

8, 9. Moapostola Paulo o be a e ra go re’ng ge a be a re: “Ge ke fokola, ke gona ke lego matla”?

⁸ Bala Jesaya 40:30. Le ge re ka ba re kgona go dira dilo tše dintši, eupša go na le moo matla a rena a felelago gona. Ka moka ga rena re swanetše go tseba seo. Le ge moapostola Paulo a be a kgona go dira dilo tše dintši, eupša o be a sa kgone go dira dilo ka moka tšeo a bego a nyaka go di dira. O ile a botša Modimo ka tsela yeo a ikwago ka yona gomme Modimo a re go yena: “Matla a ka a phethagatšwa bofokoding.” Na Paulo o ile a kwešiša seo? Ee. O ile a phetha ka gore: “Gobane ge ke fokola, ke gona ke lego matla.” (2 Bakor. 12:7-10) Paulo o be a e ra gore’ng?

⁹ Paulo o ile a lemoga gore go na le moo matla a gagwe a bego a felela gona. O be a hloka thušo ya Modimo, yoo matla ka moka a tšwago go yena. Moya o mokgethwa wa Modimo o be o ka nea Paulo matla ao a bego a a hloka. Moya wa Modimo o be o ka thuša Paulo gore a kgone go dira mešomo yeo a bego a ka se kgone go e dira ka matla a gagwe. Le rena moya o mokgethwa o ka re thuša. Ge Jehofa a re nea moya wa gagwe o mokgethwa, re tla matlafala le go feta.

10. Jehofa o ile a thuša Dafida bjang gore a lebeletšane le mathata a gagwe?

¹⁰ Mopsalme Dafida o ile a bona moya o mokgethwa wa Modimo o mo thuša ka makga a mantši. O opetše ka gore: “Ka thušo ya gago ke tla kitimiša bahlasedi; ka thušo ya Modimo wa ka nka kgona go namela morako.” (Ps. 18:29) Go no swana le maboto a magolo ao go sa kgonegego gore motho a a namele, ka dinako tše dingwe mathata a rena ke a magolo kudu moo re ka se kgonego go itharollela wona. Re hloka thušo ya Jehofa.

11. Moya o mokgethwa o re thuša bjang go lebeletšana le mathata?

¹¹ Bala Jesaya 40:31. Ntšhu e kgona go hlatloga le go akalala moyeng e sa diriše matla a yona. E thušwa ke moya o borutho gore e hlatlogele godimo gomme seo sa dira gore e seketše matla a yona. Ka gona ge o lebane le mathata, nagana ka ntšhu. Kgopela Jehofa gore a go nee matla a diriša “mothuši, e lego moya o mokgethwa.” (Joh. 14:26) Se se thabišago ke gore re ka kgopela moya o mokgethwa nako le ge e le efe ge re o hloka. Le gona re ka hloka moya woo kudukudu ge re na le diphapano le yo mongwe wa bana babo rena ka phuthegong. Eupša ke ka baka la’ng diphapano tše di eba gona?

12, 13. (a) Ke ka baka la’ng go fela go eba le diphapano magareng ga Bakriste? (b) Pego ya Josefa e re ruta’ng ka Jehofa?

¹² Ka ge re se ra phethagala, re fela re eba le diphapano le bana babo rena. Go tlo ba le dinako tšeo re felago re tenwa ke dilo tšeo bana babo rena ba di bolelago goba tšeo ba di dirago, goba rena ra tena bona. Se se ka leka tumelo ya rena. Go no swana le diteko tše dingwe, se se re nea sebaka sa gore re botegele Jehofa ka go ithuta go dirišana gabotse le bana babo rena le dikgaetšedi bao Jehofa a ba ratago go sa šetšwe mafokodi a bona.

¹³ Pego ya Josefa e re bontšha gore Jehofa ga a thibele batho ba gagwe go welwa ke mathata.  Ge Josefa e be e sa le lesogana, bana babo bao ba nago le mona ba ile ba mo rekiša gore e yo ba lekgoba kua Egipita. (Gen. 37:28) Ga go pelaelo gore ge Jehofa a be a bona mogwera wa gagwe yo a botegago e lego Josefa a swarwa gampe o ile a kwa bohloko kudu. Lega go le bjalo, ga se a ka a tsena ditaba gare. Ka morago, ge Josefa a be a latofatšwa ka gore o be a leka go kata mosadi wa Potifara, le gona moo Jehofa ga se a ka a tsena ditaba gare. Eupša na Modimo o ile a lahla Josefa? Aowa, Beibele e re: “Jehofa o be a mo atlegiša go tšeo a bego a di dira.”​—Gen. 39:21-23.

14. Re holega bjang ge re “lesa go galefa”?

¹⁴ Re na le mohlala o mongwe wa Dafida. Ba bantši ba rena ga sa nka ra swarwa gampe go swana le Dafida. Le ge mogwera yoo wa Jehofa a ile a swarwa gampe, ga se a ka a dumelela seo se senya tswalano ya gagwe le Jehofa. Go e na le moo o ngwadile gore: “Lesa go galefa gomme o tlogele go befelwa; o se tlale pelo, gobane seo se lebiša bobeng.” (Ps. 37:8) Lebaka le legolo la gore re ‘lese’ go galefa ke ka gobane re nyaka go ekiša Jehofa, yoo ‘a sa re swarego go ya ka dibe tša rena.’ (Ps. 103:10) Eupša go na le mehola e mengwe yeo e tlišwago ke go “lesa go galefa.” Go galefa go ka re bakela malwetši a go swana le madi a magolo le mathata a go hema. E bile go ka re bakela bolwetši bja sebete le bja pancreas, yeo e thušago go fetoša dijo gore di ye diseleng tša mebele ya rena, le gona go ka dira gore dijo di se šilege gabotse. Gantši ge re galefile, ga re kgone go nagana gabotse. Ge re galefile re ka tšea nako e telele re gateletšegile monaganong. Ka lehlakoreng le lengwe, Beibele e re, “pelo e thabilego e phediša mmele.” (Die. 14:30) Eupša re swanetše go dira’ng ge bana babo rena ba re kwešitše bohloko? Le gona re ka dira khutšo bjang le bona? Re ka dira seo ka go diriša keletšo ya Beibele maphelong a rena.

15, 16. Re ka bolela bjang le ngwanabo rena yo a re kgopišitšego?

¹⁵ Bala Baefeso 4:26. Gantši ge batho ba lefase ba re swara gampe ga re makale. Eupša ge Mokristegotee le rena goba wa leloko a re swara gampe, re ka galefa. A re re ga o kgone go lebala seo a go dirilego sona. Na o tla dula o galefile mengwaga-ngwaga? Goba na o tla latela keletšo ya Beibele gomme wa lokiša ditaba kapejana? Ge o ka se rarolle bothata bjoo le semeetseng go tla ba boima gore o dire khutšo le ngwaneno.

¹⁶ A re re ngwaneno o go kgopišitše gomme ga o kgone go lebala seo a go dirilego sona. Ke dilo dife tšeo o ka di dirago gore o dire khutšo le ngwaneno? Sa mathomo, rapela Jehofa go tšwa pelong. Mo kgopele gore a go thuše go boledišana le ngwaneno gabotse. Gopola gore le yena ke mogwera wa Jehofa. (Ps. 25:14) Jehofa o a  mo rata, le gona o swara bagwera ba gagwe ka botho e bile o letetše gore le rena re ba sware ka botho. (Die. 15:23; Mat. 7:12; Bakol. 4:6) Sa bobedi, naganišiša ka seo o tlago go se bolela. O se ke wa no phetha ka gore ngwaneno o go kgopišitše ka boomo; e tšee gore mohlomongwe o na lebaka. Le gona, amogela gore go ka ba go na le seo o se dirilego gore go be le go se kwešišane magareng ga lena. O ka thoma poledišano ka go bolela gore: “Mohlomongwe ke no ba ke kgopišwa ke lefeela, eupša maabane ge o be o bolela le nna, ke ile ka ikwa . . . ” Ge e ba ditaba di sa loke go ya ka mokgwa woo o bego o letetše ka gona, nyaka sebaka se sengwe sa go dira khutšo. Ge o sa letetše sebaka seo, rapelela ngwaneno gomme o kgopele Jehofa gore a mo šegofatše. Kgopela Jehofa gore a go thuše gore o šetše feela dika tše dibotse go ngwaneno. Go sa šetšwe gore ngwaneno o arabela bjang, o ka kgodišega gore Jehofa o thabišwa ke maiteko ao o a dirago gore o dire khutšo le ngwaneno, yoo le yena e lego mogwera wa Modimo.

17. Ge re dirile sebe Jehofa a ka diriša’ng go re thuša, gona ke ka baka la’ng re swanetše go amogela thušo yeo?

¹⁷ Ba bangwe ba ikwa ba sa swanelwe ke go hlankela Jehofa ka baka la sebe se segolo seo ba se dirilego. Go ikwa re le molato go ka re tšeela lethabo. Kgoši Dafida, yo a ilego a tshwenywa ke diphošo tša gagwe, o re: “Ge ke be ke homotše marapo a ka a be a onatšwa ke ge ke tsetsela letšatši ka moka. Gobane seatla sa gago se be se nkimela mosegare le bošego.” Sa go kgahliša ke gore Dafida o ile a swaragana le mathata a gagwe gabotse—bjalo ka monna wa moya. O ngwadile gore: “Mafelelong ka ipobola sebe sa ka . . . Ke moka wena wa ntshwarela molato wa dibe tša ka.” (Ps. 32:3-5) Ge e ba o dirile sebe se segolo, Jehofa o dula a loketše go go thuša gore o boele o be le tswalano e botse le yena. Eupša o swanetše go amogela thušo yeo a go neago yona a diriša phuthego. (Die. 24:16; Jak. 5:13-15) O se ke wa dikadika go amogela thušo ya gagwe ka gobane seo se ka dira gore o hwetše bophelo bjo bo sa felego goba o se bo hwetše! Eupša o swanetše go dira’ng ge e ba o sa dutše o tshwenywa ke dibe tšeo Modimo a go lebaletšego tšona?

18. Mohlala wa Paulo o ka thuša bjang bao ba tshwenywago ke diphošo tša nakong e fetilego?

¹⁸ Ka dinako tše dingwe, moapostola Paulo o be a tshwenywa ke diphošo tšeo a di dirilego nakong e fetilego. O boletše gore: “Gobane ke yo monyenyane go baapostola ka moka gomme ga ke swanelwe ke go bitšwa moapostola, gobane ke ile ka hlomara phuthego ya Modimo.” Lega go le bjalo, Paulo o okeditše ka gore: “Eupša ke seo ke lego sona ka botho bjo bogolo bja Modimo.” (1 Bakor. 15:9, 10) Jehofa o ile a amogela Paulo ka tsela yeo a lego ka yona, le gona O ile a letela Paulo gore a itebelele ka tsela yeo. Ge e ba o tloga o itsholela dibe tšeo o di dirilego nakong e fetilego e bile o ipobotše, o ka kgodišega gore Jehofa o tla go gaugela. Dumela gore Jehofa o go lebaletše, gomme o amogele seo!​—Jes. 55:6, 7.

19. Temana ya ngwaga ya 2018 e re’ng, gona ke ka baka la’ng e le nakong?

¹⁹ Ka ge lefase le le kgauswi le go fedišwa, re ka letela gore mathata a bophelo a oketšege. Lega go le bjalo, kgodišega gore Jehofa o tla go nea selo le ge e le sefe gore o kgotlelele mathata, ka gobane “o nea yo a lapilego matla [gomme] yo a se nago matla a magolo o mo nea matla ka boati.” (Jes. 40:29; Ps. 55:22; 68:19) Ngwageng wo wa 2018, nako le nako ge re eba gona dibokeng Holong ya Mmušo, re tlo gopotšwa therešo ye e bohlokwahlokwa, yeo e rego: “Bao ba botago Jehofa ba tla boelwa ke matla.” Mantšu a, ke temana ya ngwaga ya 2018.​—Jes. 40:31.