Ke belegetšwe toropong ya Amioûn, Lebanon ka di-19 tša May 1940. Mengwaga e sego kae ka morago ga moo, ka gešo re ile ra thothela toropong ya Tripoli. Ke godišitšwe ke batswadi bao ba bego ba dula ba thabile e bile ba rata Jehofa Modimo. Ka gešo re be re le ba bahlano, re le bašemane ba babedi le banenyana ba bararo gomme nna ke be ke le wa mafelelo. Batswadi ba ka ba be ba se na taba le tšhelete. Selo se bohlokwa kudu ka gešo e be e le go ithuta Beibele, go ba gona dibokeng le go thuša batho ba bangwe gore ba tsebe Modimo.

Go be go na le Bakriste ba mmalwa ba batlotšwa ka phuthegong ya rena. Yo mongwe wa bona e be e le Michel Aboud, yo a bego a re swarela puku ya phuthego. O ithutile ditherešo New York gomme e bile Hlatse ya mathomo Lebanon mathomong a bo-1920. Ke gopola kamoo a bego a hlompha le go thuša bafsa ba babedi bao ba bego ba sa tšwa go aloga sekolong sa Gilead, e lego Anne le Gwen Beavor. E ile ya ba bagwera ba rena. Ka morago ga mengwaga e mentši ke ile ka thaba ge ke be ke kopana le Anne kua United States. Ke moka, ka morago ga nakonyana ke ile ka kopana le Gwen yoo a bego a nyalane le Wilfred Gooch gomme ba hlankela Bethele ya London, England.

Ge ke be ke sa le mofsa, go be go na le Dihlatse tša Jehofa tše sego kae feela kua Lebanon. Eupša re ile ra botša ba bangwe ka mafolofolo ditaba tše dibotse. Re ile ra dira se le ge baruti ba bangwe ba be ba re ganetša. Le gona go na le dilo tšeo nka se tsogego ka di lebala.

Ka letšatši le lengwe nna le sesi wa ka Sana re ile ra yo ruta batho ditaba tše dibotse difoleteng. Ke moka gwa tla moruti lebatong leo re bego re ruta batho ditaba tše dibotse. Go ka direga gore go na le motho yoo a bego a mmiditše. Moruti yoo o ile a thoma go roga sesi wa ka. Ka ge a be a befetšwe o šoro, o ile a kgorometša Sana, a wela fase ke moka a gobala. Motho yo mongwe o ile a founela maphodisa gomme a tla a thuša Sana. Maphodisa ao a ile a iša moruti yoo maphodiseng. Ke moka a hwetša a swere sethunya. Yo mogolo wa maphodisa o ile a mmotšiša gore: “Na ke wena moruti goba ke wena tsotsi?”

Nako e nngwe yeo ke e gopolago gabotse ke ge ka phuthegong re be re hirile pese gore e re iše toropong e nngwe ya kgojana gore re yo bolela ditaba tše dibotse. Re be re šoma gabotse go fihlela moruti wa moo a ekwa seo re se dirago gomme a bitša batho gore ba tle ba re hlasele. Ba ile ba re tšhošetša, ba re foša le ka maswika gomme tate a gobala hlogong. Ke gopola sefahlego sa gagwe se tletše ka madi. O ile a boela peseng a na le mma gomme ka moka ga rena re ile ra ba latela re tšhogile. Nka se tsoge ke lebetše ge mma a be a phumola tate madi ao. O ile a re: “Jehofa, ba lebalele hle. Ga ba tsebe seo ba se dirago.”

Nakong e nngwe re ile ra yo etela batho ba gabo rena toropong yeo re bego re etšwa go yona. Ge re fihla moo re ile ra hwetša mopishopo a etetše rakgolo. Mopishopo yoo o be a tseba gore batswadi ba ka e be e le Dihlatse tša Jehofa. Le ge ke be ke na le mengwaga e tshela feela, o ile a kgetha nna mo gare ga batho ke moka a re: “Ke ka baka la’ng wena o se wa kolobetšwa?” Ke ile ka mmotša gore ke be ke sa le yo monyenyane le gore ke be ke swanetše go ithuta dilo tše dingwe ka Beibeleng, gomme ke be le tumelo e tiilego gore ke tle ke kolobetšwe. O ile a se rate karabo ya ka ke moka a botša rakgolo gore ke na le lenyatšo.

Eupša dilo tše re sa tšwago go bolela ka tšona e be e se selo. Batho ba bantši ba kua Lebanon ba rata batho e bile ba rata go amogela baeng. Ka gona re ile ra ipshina ka go ba botša ditaba tše dibotse le go ba le dithuto tše dintši tša Beibele.

Ge ke be ke sa le sekolong, ngwanabo rena yo mongwe wa mofsa yo a bego a etšwa Venezuela o ile a etela Lebanon. O ile a kopanela phuthegong ya rena gomme a thoma go ratana le sesi wa ka Wafa. Ge nako e dutše e eya ba ile ba nyalana gomme ba ya ba dula Venezuela. Mangwalong ao Wafa a bego a re ngwalela ona, o be a dula a kgopela tate gore re thothele Venezuela. O ile a dira bjalo ka gobane o be a re gopola kudu. Mafelelong re ile ra mo theetša gomme ra thothela Venezuela.

Re fihlile Venezuela ka 1953 gomme ra dula toropong ya Caracas kgauswi le moo go bego go dula mopresidente. Ka ge ke be ke le mofsa, ke  be ke kgahlwa ke ge ke fela ke bona mopresidente a feta ka dikoloi tša mabaibai. Eupša go be go se bonolo gore batswadi ba ka ba tlwaele go dula nageng e nngwe, ba tlwaele leleme la moo, setšo, dijo le boemo bja leratadima. Ge e le gabotse e be e le gona ba thoma go tlwaela ge re be re tlo diragalela ke selo se sengwe se bohloko kudu.

Tate o ile a thoma go babja. Seo se ile sa re tšhoša ka ge re be re tlwaetše tate e le motho yo a phetšego gabotse. Re be re se ra ka ra mmona a babja. O be a swerwe ke kankere gomme a feleletša a dirile ophareišene. Sa go nyamiša ke gore o ile a hlokofala ka morago ga beke.

Ga ke kgone go hlalosa tsela yeo re bego re kwele bohloko ka yona. Ke be ke na le mengwaga e 13 feela. Le gona re be re sa nagane gore tate a ka hlokofala. Re ile ra ikwa eka re ka se tsoge re thabile. Go ile gwa tšea nako gore mma a amogele gore tate o hlokofetše. Re ile ra bona gore bophelo bo swanetše go tšwela pele gomme Jehofa o ile a re thuša. Ge ke be ke na le mengwaga e 16 ke ile ka fetša sekolo sa sekontari kua Caracas gomme ke be ke nyaka go tlo hlokomela lapa la gešo.

Sesi wa ka Sana o ile a nyalana le Rubén Araujo, yoo a bego a etšwa sekolong sa Gilead gomme a boetše gape Venezuela. Ba ile ba kgetha go yo dula New York. Ka gae ba ile ba re ke ye yunibesithi. Ke ile ka ya yunibesithi ya New York gomme ka dula le sesi ge ke dutše ke tsena sekolo. Sesi le monna wa gagwe ba ile ba nthuša kudu gore ke tiiše segwera sa ka le Jehofa. Le gona go be go na le bana babo rena ba bangwe ba bantši bao ba bego ba bea mohlala o mobotse phuthegong yeo re bego re le go yona ya Sepaniši kua Brooklyn. Ba babedi ba bona bao ba bego ba le Bethele ya Brooklyn, bao nkilego ka ba tseba gabotse le go ba rata, e be e le Milton Henschel le Frederick Franz.

Ge ke be ke le kgauswi le go fetša ngwaga wa ka wa mathomo ke le yunibesithi, ke ile ka thoma go ipotšiša ge e ba ke tšere phetho e botse. Ke ile ka bala le go naganišiša ka dihlogo tšeo di lego ka makasineng wa Morokami tšeo di bolelago ka Bakriste bao ba nyakago go oketša nako yeo ba e fetšago ba hlankela Jehofa. Phuthegong ya rena ke ile ka bona gore bana babo rena ba babulamadibogo le bao ba šomago Bethele ba thabile kudu, gomme ke be ke nyaka go swana le bona. Eupša ke be ke se ka tšwa ke kolobetšwa. Le gona ke be ke tseba gore go bohlokwa gore ke ineele go Jehofa. Ke ile ka dira bjalo, gomme ka morago ka kolobetšwa ka di-30 tša March 1957.

Ka morago ga gore ke kolobetšwe, ke ile ka nagana ka go dira phetho e nngwe e bohlokwa, e lego ya go thoma go bula madibogo. Ke be ke tloga ke nyaka go ba mmulamadibogo. Eupša ke be ke bona gore go tlo ba thata. Ke be ke tlo kgona bjang go tsena yunibesithi le go ba mmulamadibogo ka nako e tee? Ka morago ga moo nna le ba gešo re ile ra ngwalelana mangwalo a mantši ge ke be ke ba hlalosetša gore ke nyaka go tlogela yunibesithi ke boele Venezuela gore ke thome go ba mmulamadibogo.

Ke ile ka boela toropong ya Caracas ka June 1957. Eupša ke ile ka bona gore ka gae ba be ba  hloka thušo. Go be go nyakega motho yo mongwe yo a bego a tla ba thuša. Ke be nka ba thuša bjang? Ke ile ka hwetša mošomo pankeng eupša ke be ke tloga ke nyaka go bula madibogo. Ge e le gabotse e be e le lona lebaka leo le dirilego gore ke boele gae. Ke be ke ikemišeditše go di dira ka bobedi. Ke ile ka fetša mengwaga e mmalwa ke šoma pankeng e bile ke le mmulamadibogo. Ke be ke dula ke swaregile e bile ke thabile kudu!

Ke ile ka thaba gape ge ke be ke nyalana le Sylvia, e lego kgaetšedi wa Mojeremane yo mobotsana yoo a ratago Jehofa kudu. O be a thothetše Venezuela le batswadi ba gagwe. Re ile ra ba le bana ba babedi, wa mošemane le wa ngwaneyana, e lego Michel (Mike) le Samira. Ke ile ka thoma le go hlokomela mma. O ile a tla a dula le rena. Ke ile ka tlogela go ba mmulamadibogo gore ke kgone go hlokomela lapa la ka. Eupša ke ile ka tšwela pele ke le mafolofolo tšhemong. Nna le Sylvia re be re fela re tšea bobulamadibogo bja go thuša dinakong tša maikhutšo.

Bana ba rena ba be ba sa le sekolong ge go be go direga seo ke boletšego ka sona mathomong a sehlogo se. Ke a tseba gore ke be ke phela gabotse e bile batho bao ba bego ba šoma dipankeng tše dingwe ba be ba ntlhompha. Eupša ke be ke nyaka go tsebja kudu ke le mohlanka wa Jehofa. Go tloga letšatšing leo ke ile ka dulela go nagana ka seo ke swanetšego go se dira gore batho ba mpone ke le mohlanka wa Jehofa. Nna le mosadi wa ka re ile ra dula fase gomme ra boledišana ka maemo a rena a tša ditšhelete. Ge ke be nka tlogela mošomo wa ka pankeng ke be ke tlo hwetša tšhelete e ntši. Ka gona, ka ge re be re se na dikoloto, re ile ra bona gore ge re ka nolofatša bophelo bja rena re be re tlo ba le tšhelete e lekanego yeo re bego re ka phela ka yona nako e teletšana.

Go be go se bonolo gore ke tlogele mošomo. Eupša mosadi wa ka le mma ba ile ba nthekga. Ka baka leo, ke be ke tlo kgona go boela ke be mmulamadibogo. Ke be ke thabile kudu. Go be go bonagala Jehofa a re šegofatša. Eupša go se go ye kae re ile ra kwa ditaba tšeo di ilego tša re makatša ka moka ga rena.

Ka letšatši le lengwe ngaka e ile ya re botša gore Sylvia o imile. Ka moka ga rena re ile ra makala kudu! Ke be ke thabile kudu eupša ke ile ka nagana ka phetho yeo ke e dirilego ya gore ke tle ke be mmulamadibogo. Ke moka ka ipotšiša ge e ba go tla kgonega gore ke tšwele pele ke e ba mmulamadibogo. Re ile ra thoma go itokiša  megopolo ke moka ra amogela gore re tlo ba le ngwana. Eupša ke be ke sa no ipotšiša ge e ba go tlo kgonega gore ke tle ke be mmulamadibogo.

Ka morago ga gore re boledišane, re ile ra se fetoše phetho yeo re bego re e dirile ya gore ke tle ke be mmulamadibogo. Re ile ra ba le ngwana wa mošemane ka April 1985 gomme ra mo reela leina la Gabriel. Eupša ke ile ka tlogela go šoma pankeng ke moka ka June 1985 ka thoma go ba mmulamadibogo wa ka mehla gape. Ka moragonyana ke ile ka ba yo mongwe wa bana babo rena bao ba šomago Komiting ya Lekala. Eupša ka ge Bethele e be e se Caracas, seo se be se bolela gore ke be ke swanetše go sepela dikhilomithara tše e ka bago tše 80 gabedi goba gararo ka beke.

Ofisi ya lekala e be e le toropong ya La Victoria. Ka baka leo re ile ra dira phetho ya go thothela moo e le gore re be kgauswi le Bethele. Bophelo bja rena bo ile bja fetoga kudu. Ga ke na mantšu a go leboga tsela yeo lapa la ka le ba gešo ba ilego ba nthekga ka gona. Go ba le tirišano ga bona go ile gwa nthuša kudu. Sesi wa ka Baha o ile a thoma go hlokomela mma. Mike o be a nyetše eupša Samira le Gabriel ba be ba sa dula le mma. Seo se bolela gore ge re be re thothela La Victoria ba ile ba swanelwa ke go tlogela bagwera ba bona ba kua Caracas. Le gona mosadi wa ka o ile a swanelwa ke go tlwaela bophelo bja toropong e nyenyane. E bile ka moka ga rena re ile ra swanela ke go tlwaela go dula ka ntlong e nyenyane. Go ile gwa se be bonolo gore re thothele La Victoria.

Eupša dilo di ile tša fetoga gape. Gabriel o ile a nyala gomme Samira a se sa dula le rena. Ka gona nna le Sylvia re ile ra bitšwa gore re tlo šoma Bethele ka 2007 gomme le lehono re sa šoma gona. Morwa wa rena yo mogolo Mike ke mogolo e bile yena le mosadi wa gagwe Monica ke babulamadibogo. Gabriel le yena ke mogolo gomme yena le mosadi wa gagwe Ambra ba dula Italy. Samira yena ke mmulamadibogo e bile o dira mošomo wa Bethele a le gae.

Ke a dumela gore ke ile ka swanelwa ke go tšea diphetho tše dikgolo bophelong bja ka eupša ga ke itshole. Ge ke be nka thoma bophelo bja ka lefsa ke be ke tlo no dira diphetho tšeo di swanago. Ke leboga dikabelo le ditokelo tše dintši tšeo ke di hweditšego ge ke hlankela Jehofa. Ge ke lebelela morago ke a bona gore go bohlokwa kudu gore motho a dule a na le segwera se sebotse le Jehofa. Go sa šetšwe gore diphetho tšeo re di tšeago ke tše dikgolo goba ke tše dinyenyane, Jehofa o tlo re fa khutšo yeo e “fetago kwešišo yohle ya batho.” (Bafil. 4:6, 7) Nna le Sylvia re thabela mošomo wo re o dirago Bethele e bile re a bona gore Jehofa o re šegofaditše ka gore re ile ra mo etiša pele maphelong a rena.