Beibele ga e rute gore motho yo mongwe le yo mongwe o na le morongwa yo a mo šireletšago. Ke therešo gore Jesu o ile a re: “Bonang gore le se ke la nyatša yo mongwe wa ba banyenyane ba [barutiwa ba Kriste], gobane ke le botša gore legodimong barongwa bao ba ba hlokomelago ka mehla ba bona sefahlego sa Tate yo a lego legodimong.” (Mateo 18:10) Lega go le bjalo, Jesu o be a sa re gore motho yo mongwe le yo mongwe o na le morongwa yo a mo šireletšago. Eupša o be a no bolela gore barongwa ba kgahlegela morutiwa yo mongwe le yo mongwe wa gagwe. Ka gona, barapedi ba therešo ga ba no ipea kotsing e le ge ba ipotša gore barongwa ba Modimo ba tla ba šireletša.

Na seo se ra gore barongwa ga ba thuše batho? Aowa. (Psalme 91:11) Batho ba bangwe ba tloga ba nagana gore Modimo o ile a ba šireletša le go ba hlahla a diriša morongwa. Kenneth yo go boletšwego ka yena sehlogong sa mathomo, le yena o nagana bjalo. A ka no ba a nepile, le ge re ka se nape re gatelela gore seo ke nnete. Dihlatse tša Jehofa di fela di bona gore barongwa ba a di thuša ge di dutše di ruta batho ka Beibele. Ka ge barongwa ba sa bonagale, re ka se nape re kgodišega gore Modimo o ba diriša gakaakang go thuša batho maemong a sa swanego. Ka gona, ga se phošo go leboga Modimo ka thušo le ge e le efe yeo a ka bago a re neile yona.​—Bakolose 3:15; Jakobo 1:17, 18.