BATHO KE BA MOSWANANOŠI KA DITSELA TŠE DINTŠI—RE KGONA GO NGWALA, GO PENTA, GO HLAMA DILO E BILE RE IPOTŠIŠA DIPOTŠIŠO TŠA BOHLOKWA BOPHELONG, tše bjalo ka tše rego: Ke ka baka la’ng go na le legohle? Go tlile bjang gore re be gona? Ke ka baka la’ng re phela? Bokamoso bo re swaretše eng?

Batho ba bangwe ba tšhaba go botšiša dipotšišo tše ka ge ba nagana gore ga go bonolo go kwešiša dikarabo tša tšona. Ba bangwe ba re dipotšišo tše ga di na mohola ka gobane bophelo bo bile gona ka go itiragalela feela. Moprofesara wa histori le thutaphedi, e lego William Provine o re: “Ga go na medimo le merero.” O okeditše ka gore: “Ga go na moo melao le ditumelo di theilwego gona, bophelo ga bo na morero.”

Lega go le bjalo, batho ba bangwe ba tšea filosofi yeo e le yeo e sa kwagalego. Ba bona legohle leo le bopilwego gabotse ka melao e lebanyago ya thutamahlale. Ba thabela tlholo yeo e kgahlišago, e bile ba bangwe ba leka go e ekišetša ka dilo tšeo ba di hlamago. Letšatši le lengwe le le lengwe ba kgona go bona gore dilo tšeo di raraganego le tšeo di šomago gabotse kudu di na le mohlami yo bohlale.

Tsela yeo ya go nagana e dirile gore boratlhagelelo ba bangwe ba naganišiše lefsa ka seo ba se dumelago. Hlokomela mehlala e mebedi yeo e latelago.

NGAKA YA BJOKO E LEGO ALEXEI MARNOV e re: “Dikolo tšeo ke di tsenego di be di ruta thuto ya boilaModimo le ya tlhagelelo. Motho yo a dumelago go Modimo o be a lebelelwa e le yo a sa hlalefago.” Eupša ka 1990, tsela yeo Alexei a bego a nagana ka yona e ile ya fetoga.

Alexei o hlalosa gore: “Ke dula ke leka go kwešiša gore ke ka baka la’ng dilo di le ka tsela yeo di lego ka yona, go akaretša le bjoko bja motho. Ke tshwanelo gore setho se se makatšago se bitšwe selo se raraganego kudu legohleng. Eupša na bjoko bo diretšwe feela gore motho a be le tsebo le bokgoni bjo itšego gomme a fetše a hwe? Go bonala seo se se na mohola e bile se sa kwagale. Ka gona, ke ile ka thoma go ipotšiša gore: ‘Ke ka baka la’ng re phela?’ Ka morago ga go naganišiša ka mo go tseneletšego, ke ile ka phetha ka gore go swanetše go ba go na le Mmopi.”

Go nyaka go tseba gore re phelela eng go dirile gore Alexei a ithute Beibele. Ka morago, mosadi wa gagwe yo le yena e bego e le ngaka e bile e le moilaModimo, o ile a thoma go ithuta Beibele, morero wa gagwe e le go bontšha monna wa gagwe gore o fošitše. Ga bjale bobedi bja bona ba dumela go Modimo, e bile ba kwešiša morero wa Modimo ka batho ka ge o hlaloswa ka Mangwalong.

DR. HUABI YIN, E LEGO RAMAHLALE YO A ITHUTILEGO KA PLASMA. Huabi Yin o ithutetše physics gomme ka mengwaga e mentši, a dira nyakišišo mabapi le letšatši leo le re bonegelago. Huabi o re: “Ka mehla ge rena boramahlale re ithuta ka selo se itšego sa tlhago, re dula re hwetša se dutše gabotse ka tsela e makatšago, ka baka la melao e nepagetšego. Ke ile ka ipotšiša gore: ‘Melao ye e tšwa kae? Ka ge re tseba gore re swanetše go laola gabotse mollo o sa rego selo wa go apea, gona ke mang yo a laolago letšatši?’ Ge nako e dutše e eya, ke ile ka phetha ka gore mantšu a mathomo a ka Beibeleng a kwagala. Mantšu ao a re: ‘Mathomong Modimo o hlodile magodimo le lefase.’”—Genesi 1:1.

Go na le moo thutamahlale e thušago gona tabeng ya dipotšišo tša gore dilo di direga “bjang,” go swana le yeo e rego: Disele tša bjoko di šoma bjang? Go tla bjang gore letšatši le be le phišo le seetša? Eupša Alexei le Huabi ba lemogile gore Beibele e araba dipotšišo tše bohlokwa tša “ke ka baka la’ng,” tše bjalo ka tšeo di rego: Ke ka baka la’ng legohle le le gona? Ke ka baka la’ng le laolwa ke melao? Le gona ke ka baka la’ng re phela?

Ge Beibele e bolela ka lefase e re: ‘Modimo ga se a le bopela lefeela, o le hlametše go dulwa ke batho.’ (Jesaya 45:18) Ke nnete gore Modimo o na le morero ka lefase, gomme ka ge sehlogo se se latelago se tla bontšha, morero woo o sepedišana kudu le kholofelo ya rena ka bokamoso.