Go tshwenyega kudu ka mathata ao a lego mo lefaseng go ka gobatša batho mmeleng le maikwelong. Ba bantši bao ba welwago ke mathata a, ba bona go se na tsela ya go tšwa. Ba dira’ng ge ba welwa ke mathata?

• Ba bangwe ga ba nyake le go nagana ka bokamoso.

• Ba bangwe ba nwa bjala goba ba diriša dihlaretagi gore ba se ke ba nagana ka mathata a bona.

• Ba sego kae ba ikwa ba se sa nyaka go phela. Ba ipotšiša gore “Ke sa phelela’ng?”

• A mangwe a mathata ao a go welago a ka kaonafala o sa letela.

• Le ge maemo a gago a ka se fetoge, go na le dilo tšeo o ka di dirago gore o kgone go kgotlelela.

• Beibele e tshepiša gore mathata a batho a tlo fela.

Beibele e re: “Le ka mohla le se ke la belaela ka letšatši le le latelago, gobane letšatši le le latelago le tla ba le dipelaelo tša lona. Letšatši le lengwe le le lengwe le lekanwe ke bošula bja lona.”—Mateo 6:34.

Tshwenyega ka tša lehono fela. Go tshwenyega kudu ka bokamoso go ka go palediša go dira dilo tšeo o di kgonago.

Go tshwenyega kudu ka mathata ao a ka diregago go ka go okeletša stress gwa ba gwa dira gore o lahlele toulo.

Mopsalme yo mongwe o ile a rapela Modimo ka gore: “Lentšu la gago ke lebone dinaong tša ka, e bile ke seetša tseleng ya ka.” (Psalme 119:105) Bona kamoo Beibele e lego lebone le seetša ka gona.

Bošego, lebone le re thuša gore re bone moo re gatago. Ka mo go swanago, Beibele e ka re fa bohlale bja gore re kgone go dira diphetho tše dibotse.

Seetša se kgona go bonega mo re sepelago gona, sa ba sa re bontšha moo re yago gona. Ka mo go swanago, Beibele e ka kgona go re bontšha gore bokamoso bo re swaretše eng.