Beibele e ka Thuša Malapa le go Tiiša Segwera
Batho ba bantši ba thatafalelwa ke go ba le segwera se sebotse le ba malapa a gabo bona le bagwera. Ekwa kamoo dikeletšo tša Beibele di ka go thušago go kaonefatša segwera sa gago le batho ba bangwe.
O SE KE WA INAGANELA O NNOŠI
KELETŠO YA BEIBELE: “Le se ke la kgahlegela ditaba tša lena feela, eupša le kgahlegele le tša ba bangwe.”—Bafilipi 2:4.
SEO KELETŠO YE E SE BOLELAGO: Selo seo se ka dirago gore re be le segwera se sebotse le batho ba bangwe ke ge re rata go nea go e na le go rata go amogela. Eupša ge motho a inaganela a nnoši, seo se ka senya ditswalano tša gagwe le batho ba bangwe. Ka mohlala, molekane yo a inaganelago a nnoši a ka feleletša a sa tshepagale gomme a ba le thobalano le motho yo mongwe. Go oketša moo, ga go na motho yo a nyakago go gwerana le motho yoo a dulago a ikgantšha ka tsebo ya gagwe goba ka dilo tšeo a nago le tšona. Puku e nngwe ya sebjalebjale e re: “Batho bao ba dulago ba inaganela ba nnoši ba tla ba le mathata a mantši.”
SEO O KA SE DIRAGO:
-
Thuša ba bangwe. Bagwera ba kgonthe ba a tshepana e bile ba dula ba ikemišeditše go thušana. Dinyakišišo tše dingwe di bontšha gore batho bao ba thušago ba bangwe ga se gantši ba e ba le kgateletšego ya monagano e bile seo se dira gore ba ikwe ba na le mohola.
-
Eba le kwelobohloko. Kwelobohloko e hlaloswa e le go kwa bohloko bjoo motho yo mongwe a bo kwago. Ge e ba re kwela batho ba bangwe bohloko, re tla phema go bolela mantšu ao a ba kwešago bohloko goba go dira metlae ya go ba kweša bohloko.
Ge o na le kwelobohloko o kgona go naganela batho ba bangwe. Ka gona, kwelobohloko e ka go thuša gore o se ke wa ba le kgethollo. E ka go thuša le go gwerana le batho ba go tšwa ditšong tša go se swane le bao ba sa godišwago go swana le wena.
-
Fetša nako o na le batho ba bangwe. Ge o fetša nako o na le batho ba bangwe, o tlo ba tseba gakaone. Ge o nyaka gore batho ba gwerane le wena, bolela le bona ka dilo tšeo di ba amago. Ba theetše gabotse ge ba bolela. Bontšha gore o na le taba le bona. Nyakišišo e nngwe e bontšhitše gore “go bolela le batho ka dilo tšeo di ba amago go ka dira gore ba thabe.”
KGETHA BAGWERA KA BOHLALE
KELETŠO YA BEIBELE: “Ditlwaelano tše mpe di senya mekgwa e holago.”—1 Bakorinthe 15:33.
SEO KELETŠO YE E SE BOLELAGO: Batho bao o fetšago nako le bona ba ka go hlohleletša go dira dilo tše dibotse goba tše mpe. Ditsebi tše dingwe di re motho a ka feleletša a phela go swana le bagwera ba gagwe. Ka mohlala, ge e ba o fetša nako le batho ba go kgoga goba ba go nyaka go hlala, le wena o ka feleletša o kgoga goba o nyaka go hlala.
SEO O KA SE DIRAGO: Gwerana le batho bao ba nago le mekgwa yeo o e ratago goba yeo o nyakago go e ekiša. Ka mohlala, gwerana le batho bao ba naganago pele ba bolela e le gore ba se ke ba kgopiša ba bangwe, ba ba nago le tlhompho, ba go rata go fa le ba go rata go amogela baeng.
DIKELETŠO TŠE DINGWE TŠA BEIBELE
Bogela dibidio tšeo di bolelago ka Beibele tša go thuša banyalani, bafsa e bana gore ba dule ba thabile ka gae
PHEMA GO BOLELA DILO TŠEO DI KA KWEŠAGO BA BANGWE BOHLOKO.
“Go na le yo a bolelago a sa naganišiše bjalo ka ge ekao hlaba ka tšhoša.”—DIEMA 12:18.
RATA GO FA.
“Moya o fago kudu o tla nontšhwa.”—DIEMA 11:25.
SWARA BA BANGWE KA TSELA YEO O KA NYAKAGO BA GO SWARA KA YONA.
“Dilo tšohle tše le nyakago batho ba le dira tšona, le lena le ba dire tšona.”—MATEO 7:12.
You May Also Like
PHAFOGA!
Mogwera wa Kgonthe ke wa Mohuta Mang?
Batho ba bantši ba nagana gore go bohlokwa gore motho a be le bagwera ba kgonthe. O ka ba mogwera wa kgonthe bjang go ba bangwe? Sehlogo se se ahlaahla melao ya motheo e mene yeo e hwetšagalago ka Beibeleng.
