Na o a Gopola?

Na o thabetše go bala ditokollo tša morago bjale tša Morokami? Ge e ba go le bjalo, bona ge e ba o ka kgona go araba dipotšišo tše di latelago:

• Ke’ng se se bontšhago gore Jesu o be a e-na le bana babo le dikgaetšedi?

Beibele e bolela bjalo go Mateo 13:55, 56 le go Mareka 6:3. Lentšu la Segerika (adelphos) le le hwetšwago moo le dirišwa go hlaola “mohuta o itšego wa tswalano ya madi goba tswalano e lego molaong [gape] le bolela feela ka ngwanabo motho ka mo go feletšego goba ngwanabo motho ka motswadi o tee.” (The Catholic Biblical Quarterly, January 1992)—12/15, letlakala 3.

• Ke sebopego sefe sa ntwa se se fetogilego seo se bego se dutše se bonwa gabotse, gomme ke’ng tšeo gantši e bilego dibaki tše kgolo tša se?

Nywageng ya morago bjale, dintwa tše di tlaišago batho e bile tša selegae—dintwa magareng ga dihlopha tšeo di lwantšhanago tša baagi ba naga e tee. Dibaki tše dikgolo ke lehloyo la merafo le la meloko, diphapano tša tša bodumedi, go hloka toka le khuduego ya tša dipolitiki. Sebaki se sengwe e bile megabaru ya go nyaka matla le ya go nyaka tšhelete.—1/1, matlakala 3-4.

• Re tseba bjang gore Jesu o be a sa bolele gore Bakriste ba swanetše go boeletša thapelo ya mohlala lentšu ka lentšu?

Jesu o neile mohlala wo wa thapelo Thutong ya gagwe ya Thabeng. Dikgwedi tše ka bago tše 18 ka morago, o ile a boeletša dintlha tša bohlokwa tša thuto ya gagwe ya pejana ya mabapi le thapelo. (Mateo 6:9-13; Luka 11:1-4) Seo se lemogegago ke ntlha ya gore ga se a ka a e boeletša lentšu ka lentšu, e lego seo se bontšhago gore o be a sa nee thapelo ya borapedi bjo bo rulagantšwego yeo e bego e swanetše go tsebja ka hlogo.—2/1, letlakala 8.

• Ka morago ga Meetse-fula, leeba le ile la hwetša kae letlakala la mohlware leo le ilego la boa le lona ka arekeng?

Ga re tsebe ka go ba ga meetse-fula le letswai goba thempheretšha ya wona. Eupša go tsebja gore dihlare tša mohlware ge di ka rengwa di a hloga. Ka gona dihlare tše dingwe di ka ba di ile tša phologa meetse-fula gomme tša hloga gape ka morago.—2/15, letlakala 31.

• Nakong ya ntwa ya selegae kua Nigeria, go dutše go e-na le lepheko la Biafra, Dihlatse tša Jehofa tša lefelong leo di hweditše dijo tša moya bjang?

Mohlankedi wa setšhaba o ile a abelwa go yo šoma kua Yuropa gomme yo mongwe o ile a abelwa go yo šoma lebaleng la difofane kua Biafra. Bobedi bja bona e be e le Dihlatse. Ba ile ba amogela mošomo o kotsi wa go tsenya dijo tša moya ka nageng ya Biafra, ka go rialo ba hola bana babo rena go fihla ntwa e fela ka 1970.—3/1 letlakala 27.

• Go phethagaditšwe’ng ka Khutšo ya Westphalia le gona bodumedi bo ile bja tsenya bjang letsogo?

Mpshafatšo e ile ya arola Mmušo o Mokgethwa wa Roma ka madumedi a mararo—bja Katholika, bja Luthere le bja Calvin. Boemo bjo bo ile bja baka go thongwa ga Botee bja Maprotestanta le Kgwerano ya Makatholika mathomong a lekgolo la ngwaga la bo-17. Ke moka ntwa ya bodumedi e ile ya thoma kua Bohemia gomme ya gola go ba ntwa ya ditšhaba-tšhaba ya go lwela go buša. Babuši ba Makatholika le ba Maprotestanta ba ile ba lwela matla a bopolitiki le mehola ya tša boiphedišo. Ke moka dipoledišano tša khutšo di ile tša swarwa kua profenseng ya Jeremane ya Westphalia. Ka morago ga mo e ka bago nywaga e mehlano Kwano ya Westphalia e ile ya saenwa ka 1648, ya fediša Ntwa ya Nywaga e Masome-tharo gomme ya swaya go thoma ga Yuropa ya mehleng yeno e le kontinente ya dinaga tšeo di ikemetšego.—3/15, matlakala 20-3.

• Ke’ng se se bolelwago ke leswao goba leina la “sebata”—palo 666?

Leswao leo le bolelwa go Kutollo 13:16-18. Sebata se šupa go pušo ya batho, gomme go ba ga sebata le “palô ya motho” go bontšha gore mebušo e bonagatša boemo bja batho bja sebe. Ka gona palo 6 hlakanya le 60 hlakanya le 600 e bontšha go se felele ka mo go feletšego mahlong a Modimo. Bao ba nago le leswao le ba nea tlhompho ya borapedi go Mmušo wa bopolitiki goba ba lebelela go ona bakeng sa phološo.—4/1, matlakala 4-7.