“A re Opeletša Gore re Tsene”

GO AMOGELA baeng ke selo seo se tlwaelegilego kudu kua dinageng tša ka Bohlabela. Ka mohlala, kua India lapa le ka ba la itima dijo e le gore di lewe ke moeng yo a tlilego go sa letelwa. Bomma ba kua Iran ba dula ba tladitše ditšidifatši ka dijo e le gore ba kgone go amogela baeng bao ba ka fihlago go sa letelwa.

Moya o bjalo wa go nea o be o bonagala bathong ba bantši bao go bolelwago ka bona ka Beibeleng. O mongwe wa mehlala e kgahlišago ke wa Lidia, yoo mohlomongwe e bego e le mosokologi wa Mojuda yo a bego a dula Filipi, e lego toropo e kgolo tikologong ya Matsedonia. Ka letšatši le lengwe la sabatha, moapostola Paulo le basepedi-gotee le yena ba ile ba hwetša Lidia le basadi ba bangwe ba kgobokane ka thoko ga noka, kantlenyana ga Filipi. Jehofa o ile a bula pelo ya gagwe lebakeng la ge a be a theeditše Paulo a bolela. Ka baka leo, o ile a kolobetšwa gotee le ba lapa la gagwe. Ke moka a kgopela basepedi bao gore: “Ge e ba le mpone ke le yo a botegago go Jehofa, tsenang ka ntlong ya-ka.” Mosepedi-gotee le Paulo e lego Luka, o bega gore: “A re opeletša gore re tsene.”—Ditiro 16:11-15.

Go swana le Lidia, Bakriste lehono ba amogela badumedi-gotee le bona, bjalo ka balebeledi ba basepedi le basadi ba bona. Bao ba ba amogelago ba ‘ba opeletša gore ba tsene.’ Ka morago, ba thabela dipoledišano tše di agago le segwera sa Bokriste. Le ge e le gore bontši bja Dihlatse tša Jehofa ga se bja huma, bo ‘latela tsela ya go amogela baeng ka borutho.’ (Baroma 12:13; Baheberu 13:2) Moya wa bona wa go nea o dira gore ba thabe. Jesu o be a rerešitše e le ka kgonthe ge a be a re: “Go na le lethabo le legolo go neeng go feta go amogeleng.”—Ditiro 20:35.