‘Merero Ya Gago e tla Phethega’

MOPSALME DAFIDA o rapetše kopelong yeo a e hlamilego gore: “Modimo, mpopêlê pelo e sekilexo. Buša O nneêlê môya wa xo tía ka teng xa-ka. A nke O bušetšê xo nna lethabô la mophološwa wa xaxo; O ntiišê ka môya wa mafolofolo.” (Psalme 51:10, 12) Ka morago ga sebe sa gagwe le Batseba, Dafida yo a itsholago mo ditemaneng tše o kgopela Jehofa Modimo gore a hlwekiše pelo ya gagwe le gore a tsenye moya goba tshekamelo ya go dira seo se nepagetšego ka go yena.

Na ruri Jehofa o re bopela pelo e mpsha, gaešita le go tsenya moya o mofsa le wa mafolofolo ka go rena? Goba na pelo e sekilego ke selo seo re swanetšego go katanela go ba le sona le go se diša? “Mo-leka-pelo ké Morêna,” eupša o hlahloba seo se diregago ka dipelong tša rena go fihla bokgoleng bofe? (Diema 17:3; Jeremia 17:10) O tutuetša bophelo bja rena, maikemišetšo le ditiro tša rena gakaaka’ng?

Ka go diriša leina la Modimo ka makga a seswai, ditemana tše senyane tša mathomo tša Diema kgaolo 16 di re bontšha kamoo re ka dumelelago Modimo go laola bophelo bja rena e le gore ‘merero ya rena e tle e phethege.’ (Diema 16:3) Ditemana 10 go ya go 15 di lebiša tlhokomelo boikarabelong bja kgoši goba mmuši.

“Diakanyo tša Pelo”—Ke tša Mang?

Diema 16:1a (PK) e re:“Diakanyo tša pelo ke tša motho.” Go molaleng gore “diakanyo tša pelo” ke boikarabelo bja rena. Jehofa ga a lokišetše dipelo tša rena ka mohlolo goba go re fa moya wa mafolofolo. Re swanetše go dira boiteko bja go hwetša tsebo e nepagetšego ya Lentšu la gagwe e lego Beibele, re naganišiše ka seo re ithutago sona gomme re dumelelanye dikgopolo tša rena le tša gagwe.—Diema 2:10, 11.

Lega go le bjalo, kgopelo ya Dafida ya “pelo e sekilego” le ‘moya o mofsa’ e bontšha gore o be a lemoga tshekamelo ya gagwe ya sebe le gore o be a tsoma gore Modimo a mo thuše go hlwekiša pelo ya gagwe. Ka ge re se ra phethagala, re ka lekega go dira “mediro ya nama.” (Bagalatia 5:19-21) Re tsoma thušo ya Jehofa gore re “bolaye ditho tša rena tša mmele tše di lego lefaseng mabapi le bootswa, go se hlweke, kganyogo ya botona le botshadi, kganyogo e gobatšago le go duma tša ba bangwe.” (Bakolose 3:5) Ruri go bohlokwa go rapelela thušo ya gagwe gore re pheme go ineela dikgoketšong le gore re ntšhe ditshekamelo tša sebe dipelong tša rena!

Na re ka thuša ba bangwe ka “diakanyo” tša dipelo tša bona? Beibele e re: “Xo na le babolabodi ba ma-hlaba-wa-lerumô; xe e le leleme la mohlale ké moreku.” (Diema 12:18) Leleme la rena le ba moreku neng? Ke ge feela “phetolô ya leleme e tšwa xo Morêna,” ke gore, ge re bolela mantšu a nepagetšego a therešo ya moya.—Diema 16:1b.

Beibele e re: “Pelo ké yôna mmata-mâno-mabe, ké yôna lešaedi; e hlathwa ke mang?” (Jeremia 17:9) Pelo ya rena ya seswantšhetšo e na le tshekamelo ya go itokafatša le go iphora. Ge Kgoši Salomo wa Isiraele ya bogologolo a lemoša ka kotsi ye o re: “Ditsela tša motho ka moka di lokile mahlong a gagwe;  eupša Jehofa o lekanya meoya.”—Diema 16:2, PK.

Go ithata go ka dira gore re lokafatše diphošo tša rena, re ute mekgwa e sa kgahlišego le go hlokomologa bobe bjoo rena re bo dirago. Lega go le bjalo, Jehofa a ka se forwe. O lekanya meoya. Moya wa motho ke tshekamelo ya gagwe e kgolo ya monagano gomme o kgokagane le pelo. Go fihla bokgoleng bjo itšego, go matlafala ga wona go ithekgile ka mediro ya pelo ya seswantšhetšo, yeo e akaretšago dilo tše bjalo ka dikgopolo tša rena, maikwelo le maikemišetšo. Moya ke selo seo “Mo-leka-pelo” a se lekanyago, gomme dikahlolo tša gagwe ga di na go beba sefahlego goba go kgetholla. Go šetša moya wa rena ke gabohlale.

“Xafêla Morêna Medirô ya Xaxo ka Moka”

Go rulaganya go nyaka go nagana—modiro wa pelo ya rena. Mediro gantši e latela thulaganyo. Na re tla atlega maitekong a rena? Salomo o re: “Xafêla Morêna medirô ya xaxo ka moka; ké mo merêrô y’axo e tl’o xo phêthêxa.” (Diema 16:3) Go gafela Jehofa mediro ya rena go bolela gore re mmote, re ithekge ka yena le go ineela go yena—go tloša morwalo magetleng a rena ka tsela ya seswantšhetšo gomme ra o lahlela go a gagwe. Mopsalme o opetše ka gore: “Xafêla Morêna ditsela tša xaxo, O mmôtê; Yêna ó tlo dira.”—Psalme 37:5.

Lega go le bjalo, gore merero ya rena e phethege, e swanetše go dumelelana le Lentšu la Modimo gomme e swanetše go tšwa maikemišetšong a mabotse. Se sengwe gape, re swanetše go rapelela thušo le thekgo ya Jehofa gomme re dire seo re ka se kgonago go latela keletšo ya Beibele ka kelohloko. Go bohlokwa kudu gore re ‘gafele morwalo wa rena go Jehofa’ ge re lebeletšane le diteko goba ditlhohlo, gobane o tla ‘re babalela.’ Ee, “a ka se kê a bá a lesa moloki xe a ka šuthišwa.”—Psalme 55:22.

“Dilô Tšohle di n’e se Morêna a di Bopetšexo Sôna”

Ke’ng gape seo se tlago go tlišwa ke go gafela mediro ya rena go Jehofa? Kgoši e bohlale e re: “Dilô tšohle di n’e se Morêna a di bopetšexo sôna.” (Diema 16:4a) Mmopi wa legohle ke Modimo wa morero. Ge re gafela mediro ya rena go yena, bophelo bja rena bo tlala ka mediro e nago le mohola, e sego ya lefela. Le gona morero wa Jehofa ka lefase le batho ba lego go lona ke wa neng le neng. (Baefeso 3:11) O bopile lefase gomme a le direla gore le ‘dulwe ke batho.’ (Jesaya 45:18) Go oketša moo, morero wa gagwe wa mathomong ka batho ba lego lefaseng o tla phethega e le ruri. (Genesi 1:28) Bophelo bja boineelo go Modimo bo ka se fele e bile bo tla ba le morero wa ka mo go sa felego.

Jehofa “le yo mobe ó mmopetše ’tšatši la dikotsi.” (Diema 16:4b) Ga se a ka a bopa batho ba kgopo, ka gobane “’tsela tsa’xwe tšohle di lokile.” (Doiteronomio 32:4) Lega go le bjalo, o ba dumeletše go ba gona le gore ba tšwele pele ba phela go fihlela a bona e le mo go swanetšego gore a phethe kahlolo ya gagwe e šoro.  Ka mohlala, Jehofa o ile a botša Farao wa Egipita gore: “Fêla ke sa na se ke sa Xo lesitšexo ka ’baka la sôna. Ke sa Xo lesitše xore ke Xo bonthšê matla a-ka, xore leina la-ka le bolêlwê lefaseng ka moka.” (Ekisodo 9:16) Dikotlo tše Lesome le phedišo ya Farao le madira a gagwe Lewatleng le Lehwibidu ruri e be e le ponagatšo e gopolegago ya matla a Modimo a sa bapišwego.

Jehofa gape a ka fetoša maemo ka tsela yeo bakgopo ba ka phethago morero wa gagwe ba sa tsebe. Mopsalme o itše: “Batho xe ba hutlêxa, e ba xo retiša Wene; e a tl’o xo šala mahutla à ile, ke Wene [Jehofa] Ò ithlamile.” (Psalme 76:10) Jehofa a ka dumelela manaba a gagwe go galefela bahlanka ba gagwe—eupša go fihla bokgoleng bjo bo nyakegago bakeng sa go laya batho ba gagwe gomme ka go rialo a ba nea tlwaetšo. Seo se fetago se, Modimo o ithweša sona.

Ge Jehofa a dutše a thekga bahlanka ba gagwe ba ikokobeditšego, go thwe’ng ka baikgodiši le bao ba nago le makoko? Kgoši ya Isiraele e re: “Motho ofe le ofe e a ikgogomošago, ke makgapa go Jehofa; go ka swaranwa ka diatla, ruri, a ka se ke a ba a dirwa e a se nago molato.” (Diema 16:5, PK) Bao ba “ikgogomošago” ba ka tlemagana ka go thekgana, eupša ba ka se phonyokge kotlo. Ka gona, re dira gabotse ge re hlagolela moya wa boikokobetšo go sa šetšwe gore re na le tsebo e kaakang goba re ka ba re e-na le bokgoni bjo bokaakang goba gore re ka ba re e-na le boikarabelo bofe bja tirelo.

“Ka xo Boifa Morêna”

Ka ge re belegwe re e-na le sebe, re dira diphošo gabonolo. (Baroma 3:23; 5:12) Ke’ng seo se kago re thuša go phema go ba le merero yeo e tlago go re lebiša tseleng e mpe? Diema 16:6 e re: “Molato ó fedišwa ka botho le therešô; dibe motho ó di lahla ka xo boifa Morêna.” Gaešita le ge Jehofa a fediša dibe tša rena ka botho bja gagwe bjo lerato le therešo, go boifa Jehofa ke gona go re phemišago go dira dibe. Ruri go bohlokwa gore ge re dutše re rata Modimo le go leboga botho bja gagwe bjo lerato, re hlagolele poifo ya go dira seo se sa mo kgahlišego!

Go boifa Modimo go tsena ka dipelong tša rena ge re hlompha matla a makatšago a Modimo. Anke o fo nagana ka matla a gagwe ao a bonagalago tlholong! Ge mopatriareka Jobo a be a gopotšwa ka matla a Modimo ao a bonagalago dilong tšeo a di hlotšego, o ile a thušwa go lokiša kgopolo ya gagwe. (Jobo 42:1-6) Na ga re kgomege ge re bala le go gopola dipego tša ditirišano tša Jehofa le batho ba gagwe tšeo di lego ka Beibeleng? Mopsalme o opetše ka gore: “Tlang Le bônê ’tirô tša Modimo; ó a šiiša ka tše a di diraxo xo bana ba batho.” (Psalme 66:5) Botho bja Jehofa bjo lerato ga se bja swanela go tšeelwa fase. Ge Baisiraele ba be ‘ba nganga gomme ba nyamiša moya wa Modimo o mokgethwa, Jehofa o ile a ba fetogela lenaba a lwa nabo.’ (Jesaya 63:10) Ka lehlakoreng le lengwe, “xe ’tsela tša monna dì kxahla Morêna, ó tlo bá a mmoelanya le manaba ’axwe.” (Diema 16:7) Ruri go boifa Jehofa ke tšhireletšo!

Kgoši e bohlale e re: “Leruônyana la xo ntlêla ka xo loka, le phala le lexolo la xo tla ka tselakxôpô.” (Diema 16:8) Diema 15:16 e re: “Lehumô le lexolo le hlokišaxo khutšô, le phalwa ke thšexo e naxo le xo boifa Morêna.” Go boifa Modimo ka tlhompho go bohlokwa kudu ge re nyaka go dula re le tseleng e lokilego.

“Pelo ya Motho e Akanya Tsela ya Gagwe”

Motho o bopilwe a e-na le tokologo ya boikgethelo, a kgona go ikgethela magareng ga se se nepagetšego le se se fošagetšego. (Doiteronomio 30:19, 20) Pelo ya rena ya seswantšhetšo e na le bokgoni bja go ela hloko dikgetho tše di fapa-fapanego gomme ya lebiša tlhokomelo go e tee goba tše dintši tša tšona. Ge a bontšha gore go dira dikgetho ke boikarabelo bja rena, Salomo o re: “Pelo ya motho e akanya tsela ya gagwe.” Ge se se se na go direga, “Jehofa o lokiša dikgato tša gagwe.” (Diema  16:9, PK) Ka ge Jehofa a ka hlahla dikgato tša rena, re dira gabohlale ge e ba re tsoma thušo ya gagwe ge re ‘dira gore merero ya rena e phethege.’

Bjalo ka ge re šetše re bone, pelo ke mmata-maano-mabe e bile e kgona go bea mabaka a go iphora. Ka mohlala, motho a ka dira sebe, gomme pelo ya gagwe ya tsoma go itokafatša. Go e na le go lahla tsela ya gagwe ya sebe, motho yoo a ka bea mabaka ka gore Modimo o na le lerato, ke yo botho, o na le kgaugelo le gore ke yo a lebalelago. Motho yo bjalo o boletše pelong ya gagwe gore: “Modimo ó lebetše; ó širilwe sefahloxô; xa a ke a bôna selô.” (Psalme 10:11) Lega go le bjalo, ga se gwa swanela e bile go kotsi go nagana gore Modimo o tla fo re gaugela.

“Dielo le Ditekanyo tše di Lokilego ke tša Jehofa”

Ge a tloša tlhokomelo ya gagwe go pelo le ditiro tša motho a e lebiša go kgoši, Salomo o re: “Lentšu la kxoši e ke ké la Modimo, xore a se fošê kahlolong.” (Diema 16:10) Se ruri e tla ba therešo ka Kgoši Jesu Kriste yo a beilwego sedulong sa bogoši. Pušo ya gagwe ya lefaseng e tla sepedišana le thato ya Modimo.

Ge kgoši e bohlale e bolela ka mothopo wa toka le toko e re: “Dielo le ditekanyo tše di lokilego ke tša Jehofa; gomme mafsikana a go lekanya, a lego mokotleng, ke modiro wa gagwe.” (Diema 16:11, PK) Dielo le ditekanyo tše di lokilego di tšwa go Jehofa. Ditekanyetšo tše bjalo e be e se tšeo kgoši e bego e ithomela tšona go ya ka thato ya yona. Ge Jesu a be a le lefaseng o boletše gore: “Nka se dire selo le se tee ka la-ka; ke ahlola kamoo ke kwago ka gona; gomme kahlolo yeo ke e neago ke ya go loka, gobane ga ke nyake gore go dirwe thato ya-ka, eupša ke nyaka gore go dirwe thato ya yo a nthomilego.” Re ka lebelela toka ya kgonthe go Morwa yoo Tate a mo ‘gafetšego kahlolo ka moka.’—Johane 5:22, 30.

Ke’ng se sengwe gape seo se ka lebelelwago go kgoši yeo e emelago Jehofa? Kgoši ya Isiraele e re: “Dikxoši di nyênya ditirô tše kxôpô; bo-dula-kxoši bo thêkxwa ke tokô.” (Diema 16:12) Mmušo wa Mesia o laolwa ke melao ya motheo ya Modimo ya go loka. Ga o lakane le “terone ya bošoro.”—Psalme 94:20, PK; Johane 18:36; 1 Johane 5:19.

Go Hwetša Botho bja Kgoši

Balata ba kgoši e hlomphegago ba swanetše go itshwara bjang? Salomo o re: “Melomo e boló e kxahla dikxoši; di rata mmoledi wa tša xo loka. Kxalefô ya kxoši ké ma-sêba-lehu; monna yo bohlale ó a e phohliša.” (Diema 16:13, 14) Barapedi ba Jehofa ba kwa mantšu a gomme ba tšea karolo ka mafolofolo modirong wa go bolela ka Mmušo le wa go dira barutiwa. (Mateo 24:14; 28:19, 20) Ba tseba gore go diriša melomo ya bona ka tsela ye go thabiša Kgoši Mesia e lego Jesu Kriste. Go phema go se thabiše kgoši e matla ya motho le go tsoma go amogelwa ke yona go be go le bohlale e le ruri. Ruri go tsoma go amogelwa ke Kgoši Mesia go bohlale le go feta!

Salomo o tšwela pele ka gore: “Mahlô-mašweu a kxoši a a phediša; botho bya yôna bo ka leru la thseola.” (Diema 16:15) “Mahlô-mašweu a kxoši” ke kamogelo ya yona, go fo swana le ge ‘seetša sa sefahlego sa Jehofa’ e le go amogelwa ke Modimo. (Psalme 44:3; 89:15) Go swana le ge maru a pula e le kgonthišetšo ya meetse ao a tlago go thuša go godiša dibjalo, botho bja kgoši ke bohlatse bja dilo tše dibotse tšeo di sa tlago. Bophelo ka tlase ga pušo ya Kgoši Mesia bo tla tlala ka ditšhegofatšo le katlego, go fo swana le pušo ya Kgoši Salomo yeo e bego e le bjalo ka tekanyo e nyenyane.—Psalme 72:1-17.

Ge re dutše re letetše gore Mmušo wa Modimo o tle o laole dilo ka moka tšeo di lego ka tlase ga letšatši, anke re tsomeng thušo ya gagwe gore re sekiše dipelo tša rena. Gape anke re boteng Jehofa le go hlagolela go boifa Modimo. Ka go rialo re ka kgodišega ka mo go feletšego gore ‘merero ya rena e tla phethega.’—Diema 16:3.

[Seswantšho go letlakala 18]

Ke ka kgopolo efe Jehofa ‘a bopetšego yo mobe letšatši la dikotsi’?