“Morena, ke ka Baka La’ng o Ile wa fo Homola?”

MANTŠU a a ile a bolelwa ke Mopapa Benedict XVI, yoo a bego a etetše lefelo leo e kilego ya ba kampa ya tshwenyo ya kua Auschwitz, Poland, ka May 28, 2006. Ge a le lefelong leo go lona Manazi a ilego a bolaela Bajuda le batho ba bangwe ba dikete tše makgolo, o okeditše ka gore: “Ruri lefelo le le rotoša dipotšišo tše dintši! Dipotšišo di no tla ka go latelana: Modimo o be a le kae mehleng yeo? Ke ka baka la’ng a be a sa re selo? O be a ka dumelela bjang polao e kaakaa e sa felego, phenyo ye ya bobe? . . . Re swanetše go tšwela pele re llela Modimo ka boikokobetšo eupša ka go phegelela re re: Gata mogato! O se ke wa lebala moloko wa batho, dibopiwa tša gago!”

Polelo ya mopapa e ile ya tsoša dingongorego. Ba bangwe ba ile ba lemoga dilo tše bohlokwa tšeo a bego a se a di bolela, tše bjalo ka go efoga ga gagwe go bolela ka go lwantšha Bajuda mo go bego go tswalana le bošoro bjo bo šiišago bja kua Auschwitz. Ba bangwe ba ile ba bona mantšu a gagwe e le a go leka go nyatša kgopelo ya Mopapa John Paul II bakeng sa tebalelo ya dibe tšeo di dirilwego ke kereke. Raditaba wa Mokhatholika, Filippo Gentiloni, o boletše gore: “Lega go le bjalo, ke mo go kwagalago gore ge bahlalosi ba bantši ba be ba lebeletšane le potšišo e thata ya mabapi le moo Modimo a bego a le gona—e lego potšišo e se nago karabo—ba ile ba tsoma karabo ya potšišo e bonolo: Pius XII o be a le kae?” Bahlalosi ba be ba bolela ka go homola ga Mopapa Pius XII nakong yeo ya polao e sehlogo.

Polao e Sehlogo le ditiro tše dingwe tša polao ya molokwanarite tšeo di dirilwego historing ya batho di hlatsela gore ‘motho o buša yo mongwe gore a mo senye.’ (Mmoledi 8:9) Go oketša moo, Mmopi wa motho ga se a fo dula a homotše dinakong tša sehlogo se sešoro. Ka Beibeleng, o utollotše mabaka a gagwe a go dumelela bokgopo. Modimo gape o re kgonthišeditše gore ga se a lebala moloko wa batho. Ge e le gabotse, nako yeo Modimo a e dumeletšego motho gore a ipuše e tla fihla mafelelong a yona kgaufsinyane. (Jeremia 10:23) Na o ka rata go tseba ka mo go oketšegilego ka morero wa Modimo ka rena? Dihlatse tša Jehofa di tla thabela go go thuša go hwetša karabo ya Beibele ya dipotšišo tšeo di bego di tshwenya Mopapa Benedict XVI.

[Seswantšho go letlakala 32]

Oświęcim Museum