Tirišano e Kgothaletša Tšwelopele ya Moya

MOYA wa tirišano o bohlokwa bakeng sa bao ba nyakago go godiša lapa leo le ratago dilo tša moya. Ge Jehofa a bopa batho ba babedi ba pele, o ile a gatelela bohlokwa bja tirišano. Efa o be a swanetše go šoma le Adama, e le “mothuši” wa gagwe. (Gen. 2:18, NW) Lenyalong go swanetše go ba le tirišano, monna le mosadi ba thekgane. (Mmo. 4:9-12) Le gona, batswadi le bana ba swanetše go dirišana e le gore ba phethe boikarabelo bjoo Jehofa a ba neilego bjona.

Borapedi bja Lapa

Barry le Heidi ba na le bana ba bahlano. Ba lemogile gore go dirišana ge ba swara thuto ya Beibele ya lapa go ba thuša go dira tšwelopele. Barry o hlalosa gore: “Nako le nako ke nea bana dikabelo tše kopana bakeng sa thuto ya lapa. Ka dinako tše dingwe ke ba kgopela gore ba lokišetše dikarabo tše kopana tšeo di theilwego dihlogong tša Phafoga! Le gona, re itlwaetša seo re tlago go se bolela tirelong ya tšhemo e le gore ngwana yo mongwe le yo mongwe a ka kgona go thoma thero.” Heidi o oketša ka gore: “Ka moka ga rena re na le lelokelelo la dipakane tša moya tšeo re nyakago go di fihlelela gomme re di hlahloba nako le nako ge re swere thuto ya lapa go bona ge e ba re dira tšwelopele.” Banyalani ba ba lemogile gape gore go ba le mašego a itšego mo bekeng ba sa bogele thelebišene go nea lapa ka moka sebaka sa go bala ka setu.

Diboka tša Phuthego

Mike le Denise ba godišitše bana ba bane. Go dirišana go hotše lapa la bona bjang? Mike o re: “Ka dinako tše dingwe gaešita le dithulaganyo tšeo di dirilwego ka kelohloko di be di sa šome, eupša re ile ra hwetša gore go dirišana go re thuša go fihla dibokeng ka nako.” Denise o hlalosa gore: “Ge bana ba be ba gola, yo mongwe le yo mongwe o be e-na le mošomo wa ka gae woo a bego a swanetše go o dira. Kim, morwedi wa rena, o be a thuša ka go apea le go bea dibjana tafoleng ge go lewa.” Morwa wa bona Michael o sa gopola gore: “Seboka sa phuthego se be se swarelwa ka gae bošegong bja Labobedi. Ka gona re be re hlwekiša phapoši, re hlwekiša lebato gomme re bea ditulo mo go swanetšego.” Matthew, morwa wa bona yo mongwe, o tlaleletša ka gore: “Tate o be a kgonthišetša gore o boa gae ka pela bošegong bja diboka go re thuša go itokišeletša diboka.” Mafelelo e bile afe?

Go Nyakega Boiteko Bjohle

Mike o bega gore: “Ka 1987, nna le Denise re ile ra thoma go hlankela re le babulamadibogo. Ka nako yeo, bana ba rena ba bararo ba be ba sa dula le rena. Ba babedi ba bona e ile ya ba babulamadibogo gomme ba bangwe ba ile ba šoma medirong ya kago ya Bethele. Seo se tlaleletšago lethabong la lapa la rena ke gore re kgonne go thuša batho ba 40 gore ba ineele le go kolobetšwa. Le gona, re bile le tokelo ya go šoma re le lapa medirong ya go aga gaešita le dinageng tše dingwe.”

Ka kgonthe, go dirišana bjalo ka lapa go swanelwa ke maiteko ohle. Na le ka tsoma ditsela tše dingwe tše oketšegilego tša go dirišana ka lapeng? Le ka kgodišega gore go ba le moya wa tirišano go tla thuša lapa la lena go tšwela pele moyeng.

[Seswantšho go letlakala 28]

Dinako tša go itlwaetša di dira gore go be le tšwelopele bodireding bja tšhemo