1. Ke ka baka la’ng re swanetše go bota Lentšu la Modimo ka mo go feletšego?

GE BAGOLO ba hlahloba morutwana wa Beibele go bona ge e ba a ka swanelegela go ya bodireding bja tšhemo, ba ipotšiša gore: ‘Na dipolelo tša motho yo di bontšha gore o dumela gore Beibele ke Lentšu la Modimo le le buduletšwego?’ * Go motho yo a kganyogago go ba mogoeledi wa Mmušo—ge e le gabotse, go bahlanka ka moka ba Modimo—karabo ya potšišo yeo e swanetše go ba ee e kwagalago. Ka baka la’ng? Tsela yeo re botago Lentšu la Modimo ka yona gotee le bokgoni bja rena bja go le diriša bodireding di tla re thuša gore re thuše ba bangwe gore ba tsebe Jehofa gomme ba tle ba phologe.

2. Ke ka baka la’ng re swanetše go ‘tšwela pele dilong tše re ithutilego tšona’?

² Moapostola Paulo o ile a gatelela bohlokwa bja Lentšu la Modimo ge a be a ngwalela Timotheo gore: “Wena tšwela pele dilong tše o ithutilego tšona gomme wa kgodišwa gore o di dumele.” ‘Dilo’ tšeo Paulo a boletšego ka tšona ke ditherešo tša Beibele tšeo di ilego tša šušumeletša Timotheo gore a be le tumelo ditabeng tše dibotse. Ditherešo tšeo di re kgomile ka tsela e swanago lehono, gomme di tšwela pele di re thuša gore re dule re ‘hlalefetše phologo.’ (2 Tim. 3:14, 15) Gantši re diriša mantšu a latelago a Paulo go bontšha ba bangwe gore Beibele e tšwa go Modimo, eupša a ka re hola ka mo go oketšegilego go etša ge a tšwelela go 2 Timotheo 3:16. (Bala.) Anke re hlahlobeng temana ye ka botlalo. Go dira ga rena seo go tla matlafatša kgodišego ya rena ya gore dithuto tša Jehofa ka moka ke tše “nepagetšego.”—Ps. 119:128.

3-5. (a) Mašaba a ile a arabela bjang polelong ya Petro ka Pentekoste, gona ka baka la’ng? (b) Ke ka baka la’ng ba bantši kua Thesalonika ba ile ba amogela therešo? (c) Ke eng seo se ka kgahlago batho ba bantši lehono ka bodiredi bja rena?

³ Jesu o boditše setšhaba sa Isiraele gore: “Ke le romela  baporofeta le banna ba bohlale le bahlahli ba phatlalatša.” (Mat. 23:34) Jesu o be a bolela ka barutiwa ba gagwe, e lego bao a ba rutilego go diriša Mangwalo bodireding bja bona. Ka Pentekoste ya 33 C.E., yo mongwe wa “bahlahli [bao] ba phatlalatša,” e lego moapostola Petro, o ile a nea lešaba le legolo kua Jerusalema polelo yeo go yona a ilego a tsopola dikarolo tše mmalwa tša Mangwalo a Seheberu. Ka morago ga gore lešaba leo le kwe tsela yeo Petro a bego a diriša mantšu ao a fetšago go a bala, bontši bja bona bo ile bja “hlabega dipelong.” Ba ile ba itsholela dibe tša bona. Ba ka bago ba dikete tše tharo gare ga bona ba ile ba kgopela Modimo gore a ba lebalele gomme ba fetoga Bakriste.—Dit. 2:37-41.

⁴ Mohlahli yo mongwe wa phatlalatša, e lego moapostola Paulo, o ile a bolela ditaba tše dibotse mafelong a kgole le mellwane ya Jerusalema. Ka mohlala, motseng wa kua Matsedonia wa Thesalonika, o ile a bolela le bao ba bego ba rapela sinagogeng. Paulo o ile a fetša Disabatha tše tharo “a ba fa mabaka ka Mangwalo, a hlalosa le go hlatsela ka ditšhupetšo gore go be go swanetše gore Kriste a tlaišege le go tsoga bahung.” Seo se bile le mafelelo afe? “Ba bangwe ba bona [Bajuda] ba fetoga badumedi,” gotee le “lešaba le legolo la Bagerika.”—Dit. 17:1-4.

⁵ Tsela yeo bahlanka ba Modimo lehono ba dirišago Beibele ka yona e kgahla batho ba bantši. Ka morago ga gore motho yo mongwe kua Switzerland a theetše ge yo mongwe wa dikgaetšedi tša rena a bala lengwalo, o ile a mmotšiša gore: “O wa bodumedi bofe?” Kgaetšedi o ile a mo araba ka gore: “Nna le mogwera wa ka re Dihlatse tša Jehofa.” Motho yoo o ile a re: “Nkabe ke tsebile seo le go tloga mathomong. Ruri ka ntle le Dihlatse tša Jehofa ke bomang bao ba bego ba ka tla legaeng la ka go tlo mpalela Beibele?”

6, 7. (a) Bao ba rutago phuthego ba ka diriša bjang Beibele ka tsela e atlegago? (b) Ke ka baka la’ng go le bohlokwa kudu gore re diriše Mangwalo ka katlego ge re swere dithuto tša magae tša Beibele?

⁶ Re ka diriša bjang Beibele ka tsela e atlegago kudu ge re ruta ba bangwe? Ge e ba o na le tokelo ya go ruta phuthego o eme sethaleng, diriša mangwalo a Beibele ka go lebanya. Go e na le go bolelela mangwalo a motheo goba go bala mangwalo ao o a gatišitšego letlakaleng goba go a bala go tšwa sedirišweng se itšego sa elektroniki, bula Beibele gomme o e bale ka go lebanya, ke moka o kgothaletše batheetši go dira se se swanago. Le gona, fetša nako e itšego o bontšha kamoo ditemana di thušago batheetši go batamela kgauswi kudu le Jehofa. Go e na le go diriša dipapišo tše di raraganego le diphihlelo tšeo morero wa tšona e lego go fo segiša batheetši, diriša nako yeo o hlalosa seo Lentšu la Modimo le se bolelago.

⁷ Ke eng seo re swanetšego go dula re se gopola ge re swere dithuto tša magae tša Beibele? Ge re bala le motho re diriša e nngwe ya dikgatišo tša rena tša Bokriste, re swanetše go ba šedi gore re se taboge mangwalo a Beibele ao a bontšhitšwego. Re swanetše go kgothaletša morutwana go bala mangwalo a bontšhitšwego gomme re mo thuše gore a kwešiše seo a se bolelago. Re ka dira seo bjang? Ka go kgothaletša morutwana gore a bolele kamoo yena a a kwešišago ka gona, e sego ka go mo hlalosetša ditaba ka moka gomme ra feleletša re mo rerela. Go e na le go mmotša seo a swanetšego go se dumela le kamoo a swanetšego go itshwara ka gona, re swanetše go mmotšiša dipotšišo tšeo re di naganišišitšego ka kelohloko tšeo di tlago go mo thuša gore a fihlelele phetho ya maleba. *

8. Paulo o ile a lwa ntwa efe ka gare ga gagwe?

⁸ Gantši re tšea gore taba ya “go kgala” ke mošomo wa bagolo ba Bakriste. Go ba gona, ke therešo gore balebeledi ba na le boikarabelo bja go ‘sola bao ba tlwaetšego go dira sebe.’ (1 Tim. 5:20; Tito 1:13) Eupša ke gabohlokwa gore le rena re ikgale. Paulo e be e le Mokriste yo a beago mohlala yo a bego a na le letswalo  le le hlwekilego. (2 Tim. 1:3) Lega go le bjalo, o ngwadile gore: “Mmeleng wa ka ke bona molao o mongwe woo o lwantšhanago le molao wa monagano wa ka gomme o ntira lethopša la molao wa sebe.” Ka go ithuta taba yeo e dikologilego mantšu ao, re tla kwešiša gakaone gore Paulo o be a elwa ntwa ya mohuta ofe gore a laole sebe sa gagwe sa leabela.—Bala Baroma 7:21-25.

9, 10. (a) Ke mafokodi afe ao go ka diregago gore Paulo o ile a a lwantšha? (b) Ke eng seo Paulo a ka bago a ile a se dira gore a lwantšhe sebe?

⁹ Ke mafokodi afe ao Paulo a ilego a lwela go a fenya? Le ge a ile a se a bolele ka go lebanya, o ile a ngwalela Timotheo gore yena e be e le “motho wa mereba.” (1 Tim. 1:13) Pele ga ge e ka ba modumedi, Paulo o be a galefetše Bakriste o šoro. Ge a be a bolela kamoo a bego a ikwa ka gona ka balatedi ba Kriste, o ile a ipobola ka gore: “Ke be ke ba galefetše o šoro.” (Dit. 26:11) Paulo o ile a ithuta go laola kgalefo ya gagwe, eupša go molaleng gore ka dinako tše dingwe o ile a thatafalelwa ke go laola maikwelo a gagwe le mantšu a gagwe. (Dit. 15:36-39) O thušitšwe ke eng gore a atlege?

¹⁰ Ge a be a ngwalela Bakriste ba kua Korinthe, Paulo o ile a bolela gore o dirišitše tsela efe go ikgala. (Bala 1 Bakorinthe 9:26, 27.) O ile a gata megato e matla gore a lwantšhe mafokodi a gagwe. Go bonagala a ile a nyaka keletšo e tšwago ka Mangwalong, a lopa Jehofa gore a mo thuše go e diriša gomme a katana ka matla gore a kaonefatše semelo sa gagwe. * Re ka holwa ke mohlala wa gagwe ka gobane le rena re lwa ntwa e swanago le ya gagwe go lwantšha mafokodi a rena a go se phethagale.

11. Re ka ‘dula bjang re itekola’ go bona ge e ba re sa sepela tseleng ya therešo?

¹¹ Ga se ra swanela go fo iketla borapeding bja rena. Go e na le moo, re swanetše ‘go dula re itekola’ gore re kgonthišetše gore re tloga re sepela tseleng ya therešo. (2 Bakor. 13:5) Ge re bala mangwalo a bjalo ka Bakolose 3:5-10, re ka ipotšiša gore: ‘Na ke dira sohle seo se lego matleng a ka go bolaya dikganyogo tša sebe goba na ke šetše ke thoma go fokola boitshwarong? Ge e ba go tšwelela selo se se gobogilego ge ke diriša Inthanete, na ke tšwa go sona goba na ke nyaka Diwepesaete tše di sa swanelago?’ Go diriša ga rena keletšo ya Lentšu la Modimo ka tsela e bjalo maphelong a rena go tla re thuša “[go dula] re phafogile gomme re dule re hlaphogetšwe monaganong.”—1 Bathes. 5:6-8.

12, 13. (a) Pakane ya rena e swanetše go ba efe ge re “phošolla” motho, gomme re ka latela bjang mohlala wa Jesu ge re dira seo? (b) Ke mantšu a mohuta ofe ao a sa nyakegego ge re “phošolla” batho ba bangwe?

¹² Lentšu la Segerika leo le fetoletšwego e le “go phošolla” le bolela “go dira botse, go lokiša, go bušetša sekeng le boemong bjo bo swanetšego.” Ka dinako tše dingwe, re swanetše go gata mogato wa go phošolla batho ba bangwe bao ba re kwešišetšago thoko goba seo re se dirago. Ka mohlala, baetapele ba bodumedi ba Bajuda ba ile ba sola Jesu ka gore o kwela “balekgetho le badiradibe” bohloko. Jesu o ile a arabela ka gore: “Batho ba ba phetšego gabotse ga ba nyake ngaka, eupša ba babjago ba a e nyaka. Ka gona, eyang le ithute se se bolelwago ke se: ‘Ke nyaka kgaugelo e sego sehlabelo.’” (Mat. 9:11-13) O ile a hlalosetša batho ka moka mantšu a Modimo ka go se ba felele pelo le ka botho. Ka baka leo, ba ikokobeditšego ba ile ba tseba gore Jehofa ke “Modimo yo a gaugelago le yo a šokelago, yo a diegago go galefa, yo a tletšego botho le therešo.” (Ek. 34:6) Ka go arabela maitekong a Morwa wa Modimo a “go phošolla” dilo, ba bantši ba ile ba thoma go ba le tumelo ditabeng tše dibotse.

¹³ Mohlala wa Jesu o re ruta kamoo re swanetšego go thuša ba bangwe ka gona. Ditaelo tšeo di lego go 2 Timotheo 3:16 ga di re gore re hlabe ba bangwe ka mantšu ge re ba phošolla. Mangwalo ga a re fe matla a gore re bolele le batho ba bangwe ntle le go naganela maikwelo  a bona. Ge e ba re phošolla motho ka go mo hlaba ka mantšu, gona go tla ba “bjalo ka ge eka [re mo] hlaba ka tšhoša.” Re tlo mmakela bohloko e bile re tla ba re sa mo thuše ka selo.—Die. 12:18.

14-16. (a) Bagolo ba ka “phošolla” bjang ba bangwe ka tsela yeo e ba thušago gore ba lokiše mathata a bona? (b) Ke ka baka la’ng go “phošolla” ditaba ka tsela ya Mangwalo e le gabohlokwa kudu ge motho a godiša bana?

¹⁴ Ka gona, re ka ba bjang ba sa felego pelo le ba botho ge re “phošolla” ba bangwe? A re re banyalani ba kgopetše mogolo wa Mokriste gore a ba thuše go fediša dingangišano tša bona tšeo di sa felego. Ke eng seo mogolo a tlago go se dira? Ntle le gore a tšee lehlakore, a ka boledišana le banyalani bao a diriša melao ya motheo ya Beibele, mohlomongwe a diriša yeo e hwetšwago go kgaolo 3 ya puku ya Sephiri sa Lethabo la Lapa. Ge mogolo a dutše a boledišana le bona, monna le mosadi ba ka thoma go lemoga keletšo yeo o mongwe le yo mongwe wa bona a swanetšego go e diriša ka botlalo. Ka moragonyana, go ka nyakega gore mogolo yoo a tle a kwe kamoo dilo di sepelago ka gona ka lapeng gomme a ba nee thušo e oketšegilego ge e ba go nyakega.

 ¹⁵ Batswadi ba ka “phošolla” bjang bana ba bona ka tsela yeo e dirago gore ba tie moyeng? Anke re re o nyaka go thuša morwedi wa gago yo a lego mahlalagading gore a pheme segwera seo se belaetšago. Sa pele, o swanetše go kwešiša boemo ka botlalo. Ke moka ge e ba o lemoga gore go na le bothata, o ka boledišana le yena, mohlomongwe o diriša dintlha tšeo di lego ka pukung ya Dipotšišo tša Bafsa le Dikarabo tše Šomago, Bolumo 2. Matšatšing a latelago seo, o ka fetša nako e oketšegilego o na le yena. O ka šetša le boemo bja gagwe bja kgopolo ge a le tirelong ya tšhemo goba ge le itapološa le le lapa. Ge e ba o sa mo felele pelo e bile o le botho, gona morwedi wa gago o tla lemoga gore o a mo rata. Go ka direga gore a šušumeletšege go latela keletšo ya gago gomme a pheme ditlamorago tše bohloko bophelong bja gagwe.

 ¹⁶ Re ka diriša botho le go se fele pelo mo go bjalo go kgothatša bao ba tshwenyegilego ka baka la maemo a bona a tša maphelo, bao ba nyamišitšwego ke go lahlegelwa ke mošomo goba bao ba gakantšhwago ke thuto e itšego ya Mangwalo. Go diriša Lentšu la Modimo “go phošolla” ba bangwe go tlišetša batho ba Jehofa mehola e megolo.

17. Ke ka baka la’ng re swanetše go tšeela tayo godimo?

¹⁷ “Ga go na tayo yeo mo nakong ye e bonagalago e thabiša, eupša e bohloko.” Lega go le bjalo, “ka morago ga moo e tšweletša seenywa sa khutšo sa toko go bao ba tlwaeditšwego ka yona.” (Baheb. 12:11) Bakriste ba bantši bao e šetšego e le batho ba bagolo ba dumela gore tayo yeo ba kilego ba e newa ke batswadi ba bona ba dumelago e ba thušitše. Le gona go amogela tayo yeo Jehofa a re neago yona a diriša bagolo ba Bakriste, go re thuša go dula tseleng e išago bophelong.—Die. 4:13.

18, 19. (a) Ke ka baka la’ng keletšo yeo e hwetšwago go Diema 18:13 e le bohlokwa kudu tabeng ya “go laya ka toko”? (b) Ge bagolo ba le boleta e bile ba bontšha lerato ge ba swaragana le badirabobe, gantši go ba le mafelelo afe?

¹⁸ Go nyakega gore motho a be le bokgoni gore a nee tayo e holago. Jehofa o boditše Bakriste gore ba e nee “ka toko.” (2 Tim. 3:16) Ka gona, re swanetše go diriša melao ya metheo ya Beibele go re hlahla. Molao o mongwe wa motheo woo re ka o dirišago o hwetšwa go Diema 18:13 e rego: “Ge motho a fetola taba pele a ka ekwa, o bontšha bošilo gomme o a inyatšiša.” Ka go re’alo, ge bagolo ba nyaka go bolela le motho yo a latofatšwago ka sebe se segolo, ba swanetše go thoma ka go nyakišiša taba yeo ka mo go tseneletšego gore ba hwetše dintlha ka botlalo. (Doit. 13:14) Ka morago ga moo, ba tla kgona go laya “ka toko.”

¹⁹ Go oketša moo, Lentšu la Modimo le laela bagolo ba Bakriste gore ba phošolle ba bangwe “ka boleta.” (Bala 2 Timotheo 2:24-26.) Ke therešo gore motho a ka goboša Jehofa gotee le go gobatša batho bao ba se nago molato. Eupša mogolo yoo a galefago nakong ya ge a nea motho yo bjalo keletšo a ka se mo thuše. Lega go le bjalo, ge bagolo ba ekiša “Modimo ka botho bja gagwe,” ba ka šušumeletša motho yo a dirilego sebe gore a itshole.—Baroma 2:4.

20. Ke melao efe ya motheo yeo batswadi ba swanetšego go e diriša ge ba laya bana ba bona?

²⁰ Batswadi ba swanetše go diriša melao ya motheo ya Beibele ge ba godiša bana ba bona “ka tayo le temošo ya Jehofa.” (Baef. 6:4) Tate o swanetše go phema go otla morwa wa gagwe ka morago ga go kwa lehlakore letee la taba ka boitshwaro bja morwa wa gagwe. Le gona bošoro ga bo nyakege ka lapeng la Bakriste. “Jehofa o na le lerato le legolo e bile ke yo a gaugelago,” gomme bao ba nago le boikarabelo bja go laya bana ba swanetše go katanela go bontšha dika tše bjalo tša lerato.—Jak. 5:11.

21, 22. Ke mantšu afe a lego go Psalme 119:97-104 ao a hlalosago gabotse kamoo o ikwago ka gona ka Lentšu la Jehofa?

²¹ Monna yo mongwe yo a boifago Modimo o kile a bolela lebaka leo a ratago molao wa Jehofa. (Bala Psalme 119:97-104.) Ka go ithuta molao woo, o ile a ba le bohlale, temogo le kwešišo. Go latela ga gagwe keletšo ya wona go mo thušitše go phema ditsela tša maaka tšeo di bego di tlišetša ba bangwe manyami. Go ithuta ga gagwe Mangwalo go be go mo thabiša e bile go mo kgotsofatša. O be a ikemišeditše go kwa Modimo yoo ditaelo tša gagwe di bego di dirile gore a holege dilong tše dintši bophelong.

²² Na wena o tšeela Beibele godimo? E go thuša go ba le tumelo ya gore Modimo o tla phethagatša morero wa gagwe. Keletšo ya yona e buduletšwego e go šireletša ditlamoragong tše kotsi tša go dira sebe. Le gona ge e ba re e hlalosetša ba bangwe ka bokgoni, re ka ba thuša gore ba tsene tseleng ya bophelo gomme ba dule ba le go yona. Eka re ka diriša Beibele ka botlalo ge re dutše re hlankela Modimo wa rena yo lerato, Jehofa.