Batamela Kgaufsi le Modimo

“E-bang Baekiši ba Modimo”

Baefeso 4:32–5:2

BOTHO. Kwelobohloko. Tebalelo. Lerato. Ka mo go nyamišago, lehono ga se gwa tlwaelega go bona batho ba bontšhago dika tše bjalo. Go thwe’ng ka wena? Na o ile wa ikwa eka maiteko a gago a go bonagatša dika tše dibotse a dula a folotša? Pelo yeo e inyatšago e ka phegelela gore mapheko a itšego, a swanago le mekgwa e mebe yeo e tsemilego medu goba dilo tše bohloko tšeo di diregilego nakong e fetilego di dira gore go se kgonege gore o hlagolele dika tše di kgahlišago. Lega go le bjalo, Beibele e ruta therešo ye e kgothatšago—Mmopi wa rena o a tseba gore re na le bokgoni bja go hlagolela dika tše dibotse.

Lentšu la Modimo le eletša Bakriste ba therešo ka gore: “Ka gona, e-bang baekiši ba Modimo, le le bana ba ratwago.” (Baefeso 5:1) Mantšu ao ke pontšho e kgahlišago ya go bota ga Modimo barapedi ba gagwe. Ka tsela efe? Jehofa Modimo o bopile motho ka seswantšho sa Gagwe, ka go swana le Yena. (Genesi 1:26, 27) Ka go realo, Modimo o bopile batho ba e-na le dika tšeo di swanago le tša gagwe. * Ka gona, ge Beibele e kgothaletša Bakriste go ba “baekiši ba Modimo,” go swana le ge eka Jehofa ka boyena o re go bona: ‘Ke a tseba gore le ka kgona. Ke a tseba gore go sa šetšwe go se phethagale, le ka kgona go nkekiša go fihla bokgoleng bjo itšego.’

Ke dika dife tše dingwe tša Modimo tšeo re ka di ekišago? Ditemana tše di dikologilego di re nea karabo. Ela hloko gore pele Paulo a nea keletšo ya gore re ekiše Modimo o thomile ka mantšu “ka gona.” Mantšu a a kgokaganya temana ye le e fetilego yeo e bolelago ka botho, lešoko le nago le bonolo le tebalelo. (Baefeso 4:32; 5:1) Ke moka, temaneng e latelago keletšo ya gore re ekiše Modimo, Paulo o botša Bakriste gore ba phegelele tsela ya bophelo yeo e bontšhago gore ba na le lerato le se nago boithati. (Baefeso 5:2) Ka kgonthe, ge go tliwa tabeng ya go bontšha botho, go bontšha kwelobohloko e tšwago pelong, go lebalela ba bangwe ka bolokologi le go bontšha lerato, re na le mohlala o mogolo kudu woo re ka o ekišago—Jehofa Modimo.

Ke ka baka la’ng re swanetše go nyaka go swana le Modimo? Ela hloko kgothatšo e matla yeo e lego mantšung a Paulo e rego: “E-bang baekiši ba Modimo, le le bana ba ratwago.” Na yeo ga se kgopolo e kgomago pelo? Jehofa o lebelela barapedi ba gagwe bjalo ka bana bao a tlogago a ba rata. Go swana le ge mošemanyana ka leka go swana le tatagwe, ka mo go swanago le Bakriste ba therešo ba swanetše go dira sohle seo ba ka se kgonago go ekiša Tatago bona wa legodimong.

Jehofa ga a gapeletše batho gore ba mo ekiše. Go fapana le moo, o re bontšhitše tlhompho ka go re nea tokologo ya boikgethelo. Ka gona, ke kgetho ya gago gore o tla ekiša Modimo goba aowa. (Doiteronomio 30:19, 20) Lega go le bjalo, o se ke wa lebala gore o na le bokgoni bja go bontšha dika tše swanago le tša Modimo. Ke therešo gore e le gore o ekiše Modimo, sa pele o swanetše go tseba gore ke motho wa mohuta mang. Beibele e ka go thuša go ithuta ka dika le ditsela tša Modimo yoo semelo sa gagwe seo se sa bapišegego se tutueleditšego ba bantši go ba baekiši ba gagwe.

[Mongwalo wa tlase]