Megokgo ka Gare ga Lekuka

LESOGANA le e be e le moleleri. Le nyamile kudu gomme mahlo a lona a tletše megokgo, le ile la kgopela Modimo wa lona, Jehofa, gore a le bontšhe botho le kgaugelo ka go mo lopa gore: “Megokgo ya ka o e tšhele lekukeng la gago.” (Psalme 56:9, PK) Lesogana leo e be e le Dafida, yoo kgaufsinyane a bego a tla ba kgoši ya Isiraele. Eupša lekuka leo a bego a bolela ka lona ke eng, le gona Modimo a ka bea bjang megokgo ya rena ka gare ga lona?

Dafida o be a tlwaetše lekuka. E be e le mokotla wa go tšhela meetse, makhura, beine goba sereledi. Batho ba dulago ba huduga bao ba dulago leganateng la Sahara bao ba bitšwago ma-Tuareg, ba sa dutše ba diriša makuka ao a dirilwego ka letlalo la pudi goba nku. Mekotla e bjalo e ka kgona go tšhela meetse a mantši, go ithekgile ka bogolo bja phoofolo. Mekotla ya letlalo e tsebja ka go dira gore meetse a dule a tonya gaešita le ge letšatši la leganateng le fiša tšhiri-tšhiri. Nakong e fetilego mekotla ye e be e sepetšwa ka dipokolo goba ka dikamela. Lehono o ka e bona e lekeleditšwe ka pele dikoloing tšeo di kgonago go sepela tseleng e tletšego mafsika le mekoti le tseleng ya sekontiri!

Mantšu a Dafida a mabapi le lekuka a ka bolela se sengwe le go rena. Bjang? Beibele e bolela gore Sathane o buša lefase le gore o “galefile kudu” mehleng ya rena. Mafelelo a seo ke gore lefase le na le mathata a šiišago. (Kutollo 12:12) Ka baka la leo, go na le batho ba bantši bao go swana le Dafida ba tlaišegago maikwelong, monaganong goba mmeleng—kudu-kudu bao ba lekago go kgahliša Modimo. Na se ke seo se go diragalelago? Batho ba bjalo ba nago le tumelo gaešita le ge “bà lla,” ga ba tlogele go leka go phela bophelo bja potego ka sebete. (Psalme 126:6) Ba ka kgodišega gore Tatago bona wa legodimong ga a bone feela mathata ao ba lebanago le ona eupša o bona le tsela yeo mathata ao a ba kgomago ka yona. O tloga a kwešiša bohloko bjo bahlanka ba gagwe ba bo kwago gomme ka kwelobohloko o gopola megokgo le ditlaišego tša bona, o di tsenya ka lekukeng ka tsela ya seswantšhetšo.