Seo re Ithutago Sona go Jesu

Mabapi le Kholofelo ka Bahu

Jesu o tsošitše bonyenyane batho ba bararo, ka go realo a bontšha gore go na le kholofelo ka bahu. (Luka 7:11-17; 8:49-56; Johane 11:1-45) E le gore re kwešiše gore go na le kholofelo efe ka bahu, sa pele re swanetše go kwešiša seo e lego sebaki sa lehu le mathomo a lona.

Ke ka Baka La’ng re Babja le go hwa?

Ge Jesu a be a lebalela batho dibe tša bona, ba be ba fodišwa. Ka mohlala, ge monna yo a rephilego ditho a be a tlišwa go yena, Jesu o itše: “‘Se bonolo ke sefe, na ke go re, O lebaletšwe dibe tša gago, goba go re, Tsoga o sepele? Lega go le bjalo, e le gore le tsebe gore Morwa wa motho o na le matla lefaseng a go lebalela dibe—’ ke moka a re go morephaditho: ‘Tsoga, tšea malao a gago, o ye gae.’” (Mateo 9:2-6) Ka gona, sebe ke sebaki sa bolwetši le lehu. Boemo bja rena bja go dira dibe bja leabela bo tšwa go motho wa pele, Adama.—Luka 3:38; Baroma 5:12.

Ke ka Baka La’ng Jesu a ile a hwa?

Jesu ga se a ka a dira sebe. Ka gona, o be a sa swanelwe ke go hwa. Ka go re hwela, Jesu o ile a lefelela dibe tša rena. O itše madi a gagwe a be a tla “tšhollelwa ba bantši bakeng sa tebalelo ya dibe.”—Mateo 26:28.

Jesu o boletše gape gore: ‘Morwa wa motho ga se a tlela go direlwa, eupša o tletše go direla le go nea moya wa gagwe gore e be topollo bakeng sa ba bantši.’ (Mateo 20:28) Jesu o ile a bitša theko yeo a e lefilego gore ke “topollo” ka gobane e lokolotše ba bantši lehung. Jesu o boletše gape gore: ‘Ke tletše gore ba be le bophelo le gore ba be le bjona ka boati.’ (Johane 10:10) E le gore re kwešiše kholofelo ya bahu ka mo go feletšego, re swanetše go tseba gape le ka boemo bjoo ba lego go bjona gona bjale.

 Go Direga’ng ge Motho a E-hwa?

Ge mogwera wa Jesu e lego Latsaro a e-hwa, Jesu o hlalositše seo se diregago ge motho a e-hwa. O itše go barutiwa ba gagwe: “‘Latsaro mogwera wa rena o ile go khutša, eupša ke ya moo [Bethania] go yo mo tsoša borokong.’ . . . Ba be ba nagana gore o be a bolela ka go khutša borokong. Ka gona, ka nako yeo Jesu a re go bona ka go lebanya: ‘Latsaro o hwile.’” Ka go realo, Jesu o hlalositše gabotse gore bahu ba robetše, ga ba tsebe selo e bile ga ba bone selo.—Johane 11:1-14.

Ge Jesu a be a tsoša mogwera wa gagwe Latsaro, e be e šetše e le matšatši a mane Latsaro a hwile. Lega go le bjalo, Beibele ga e bolele gore Latsaro o ile a bolela ka seo se mo diragaletšego ka nako yeo. Ge a be a hwile, Latsaro o be a sa lemoge seo se diregago gomme a sa tsebe selo.—Mmoledi 9:5, 10; Johane 11:17-44.

Go na le Kholofelo Efe ka Bahu?

Bahu ba tla tsošwa ba e-na le tebelelo ya go phela ka mo go sa felego. Jesu o itše: “Nako e a tla yeo ka yona bohle bao ba lego mabitleng a kgopotšo ba tlago go kwa lentšu la gagwe [Jesu] gomme ba tšwa.”—Johane 5:28, 29.

Kholofelo ye ke pontšho ya lerato la Modimo. Jesu o itše: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Johane 3:16; Kutollo 21:4, 5.

Bakeng sa tsebišo e oketšegilego, bona kgaolo 6 ya puku ya Ke Eng Seo ge e le Gabotse Beibele e se Rutago? *

[Mongwalo wa ka tlase]