Na Dihlatse tša Jehofa di Thuba Manyalo?

“GE E BA molekane yo mongwe a fetoša bodumedi bja gagwe, lenyalo le tla thubega.” Batho ba bantši ba realo. Ka dinako tše dingwe, temošo ye e newa molekane yoo a kgethago go ba yo mongwe wa Dihlatse tša Jehofa. Eupša na ka mehla go bjalo?

Go a kwešišega gore ge motho yo a lego lenyalong a thoma go kgahlegela bodumedi goba a fetoša ditumelo tšeo e lego kgale a e-na le tšona, seo se ka makatša molekane wa gagwe. Se ka dira gore a be le dipelaelo, a nyame gaešita le go ikwa a se sa thabela molekane wa gagwe.

Gantši mosadi ke yena a ikwago pele gore o nyaka go fetoša bodumedi bja gagwe. Ge e ba mosadi wa gago a ithuta Beibele le Dihlatse tša Jehofa, seo se ka kgoma lenyalo la lena bjang? Ge e ba o le mosadi yo a kopanelago le Dihlatse tša Jehofa, o ka dira’ng go fokotša dipelaelo tšeo molekane wa gago a ka bago a e-na le tšona?

Pono ya Monna

Mark, yo a dulago kua Australia, o be a e-na le nywaga e 12 a le lenyalong ge mosadi wa gagwe a thoma go ithuta Beibele le Dihlatse tša Jehofa. Mark o re: “Ke be ke thabile lenyalong la-ka gomme ke e-na le mošomo o kgotsofatšago. Bophelo bo be bo le bose. Ke moka, mosadi wa-ka o ile a dira phetho ya go ithuta Beibele le Dihlatse tša Jehofa. Go sa letelwa, ke ile ka ikwa eka tsela ya-ka ya bophelo e a hlaselwa. Mathomong, ke be ke sa thabišwe ke kgahlego yeo mosadi wa-ka a sa tšwago go ba le yona Beibeleng, eupša ge a be a mpotša gore o dirile phetho ya go kolobetšwa e le yo mongwe wa Dihlatse tša Jehofa, ke ile ka thoma go tshwenyega kudu.”

Mark o ile a thoma go ipotšiša ge e ba lenyalo la gagwe le tla thubega ka baka la bodumedi bjo bofsa bja mosadi wa gagwe. O ile a nagana ka go mo thibela go ithuta Beibele le go mo thibela go kopana le Dihlatse ka tsela le ge e le efe. Lega go le bjalo, go e na le go laolwa ke maikwelo, Mark o ile a dumelela nako gore e fete. Go ile gwa direga’ng ka lenyalo la gagwe?

Mark o re: “Seo se thabišago ke gore lenyalo la rena le matlafetše kudu gona bjale go feta pele. Le tšwetše pele go kaonefala ga e sa le mosadi wa-ka a kolobetšwa e le yo mongwe wa Dihlatse tša Jehofa nywageng e 15 e fetilego.” Ke’ng seo se thušitšego gore lenyalo la bona le atlege? Mark o re: “Ge ke lebelela morago, go bile bjalo kudu-kudu  ka gobane mosadi wa-ka o dirišitše keletšo e botse yeo e hwetšwago ka Beibeleng. Ka mehla o be a leka go ntshwara ka tlhompho.”

Keletšo e Tšwago go Basadi ba Atlegilego

Ge e ba o le mosadi yo a kopanelago le Dihlatse tša Jehofa, ke’ng seo o ka se dirago le go se bolela go thuša go fokotša dipelaelo tšeo molekane wa gago a ka bago le tšona? Ela hloko seo se bolelwago ke basadi ba latelago go tšwa dikarolong tše fapa-fapanego tša lefase.

Sakiko, kua Japane: “Ke na le nywaga e 31 ke le lenyalong gomme ke na le bana ba bararo. Ke na le nywaga e 22 ke le yo mongwe wa Dihlatse tša Jehofa. Ka dinako tše dingwe go thata go dula le monna yo e sego Hlatse. Eupša ke šoma ka thata gore ke diriše keletšo ya Beibele ya gore ke be “yo a akgofago mabapi le go kwa, yo a diegago mabapi le go bolela, yo a diegago mabapi le go galefa.” (Jakobo 1:19) Ke leka go ba botho go monna wa-ka le go phethagatša dikganyogo tša gagwe ge e ba di sa thulane le melao ya motheo ya Beibele. Se se thušitše gore lenyalo la rena le atlege.”

Nadezhda, kua Russia: “Ke na le nywaga e 28 ke le lenyalong gomme ke na le nywaga e 16 ke le Hlatse e kolobeditšwego. Pele ke ithuta Beibele, ke be ke sa nagane gore monna wa-ka o swanetše go ba hlogo ya lapa. Ke be ke rata go dira diphetho tše dintši ke nnoši. Lega go le bjalo, ganyenyane-ganyenyane ke ile ka hwetša gore go diriša melao ya motheo ya Beibele go tlaleleditše khutšong le lethabong la lapa la rena. (1 Bakorinthe 11:3) Ganyenyane-ganyenyane go ile gwa ba bonolo gore ke ikokobeletše yena, gomme monna wa-ka o ile a lemoga diphetogo tše ke di dirago.”

Marli, kua Brazil: “Ke na le bana ba babedi gomme ke na le nywaga e 21 ke le lenyalong. Nywageng e 16 e fetilego, ke ile ka kolobetšwa bjalo ka Hlatse. Ke ithutile gore Jehofa Modimo o nyaka gore balekane ba lenyalo ba dule gotee, e sego gore ba kgaogane. Ka gona, ke leka go ba mosadi yo botse, gaešita le go leka go bolela le go dira dilo ka tsela yeo e thabišago Jehofa le monna wa-ka.”

Larisa, kua Russia: “Ge ke be ke e-ba yo mongwe wa Dihlatse tša Jehofa mo e ka bago nywageng e 19 e fetilego, ke ile ka lemoga gore selo sa bohlokwa kudu go nna ke gore ke dire diphetogo bophelong bja-ka. Monna wa-ka o kgona go bona kamoo Beibele e mphetotšego ka gona gore ke be yo mokaone—gore e nthušitše go mo leboga kudu. Mathomong re be re sa dumelelane ka tsela ya go godiša bana, eupša re rarollotše mathata ao. Monna wa-ka o dumelela bana ba rena go ya le nna dibokeng tša bodumedi tšeo ke yago go tšona ka gobane o lemoga gore seo ba se rutwago se a ba hola.”

Valquíria, kua Brazil: “Ke na le ngwana o tee gomme ke na le nywaga e 19 ke le lenyalong. Nywageng e 13 e fetilego ke ile ka ba yo mongwe wa Dihlatse tša Jehofa. Mathomong, monna wa-ka o be a sa nyake gore ke bolele le batho phatlalatša ka Beibele. Eupša ke ile ka ithuta go arabela dipelaelong tša gagwe ka moya o bonolo gomme ka mo thuša go bona gore Beibele e nthuša go fetoša semelo sa-ka. Mafelelong, monna wa-ka o ile a kwešiša kamoo go lego bohlokwa ka gona gore ke tšee karolo modirong wa go bolela le batho ka Beibele. Lehono, o nthekga ka mo go feletšego medirong yeo e sepedišanago le tumelo ya-ka. Ge ke ithuta Beibele le batho mafelong a magaeng, o nkiša ka koloi ya gagwe gomme o nkemela ka go se fele pelo go fihlela ke fetša.”

Tutuetšo e Botse

Ge e ba molekane wa gago a kopanela le Dihlatse tša Jehofa, o se ke wa boifa gore lenyalo la gago le tla thubega. Go etša ge banna le basadi ba bantši lefaseng ka bophara ba bone, Beibele e na le tutuetšo e botse lenyalong.

Monna yo mongwe yo e sego yo mongwe wa Dihlatse tša Jehofa o boletše ka potego gore: “Mathomong ke be ke e-na le dipelaelo ge mosadi wa-ka a amogela tumelo ya Dihlatse tša Jehofa, eupša ga bjale ga ke itshole ka baka la mehola yeo re e hweditšego.” Monna yo mongwe yena o boletše se ka mosadi wa gagwe: “Go botega ga mosadi wa-ka le boikemišetšo bja gagwe di dirile gore ke hlomphe Dihlatse tša Jehofa kudu. Ditumelo tša gagwe di hotše lenyalo la rena kudu. Re dumelelana go dira dilo tše itšego gomme re swara lenyalo la rena e le tswalano ya bophelo ka moka.”

 [Box/​Picture on page 13]

Dihlatse tša Jehofa di Lebelela Lenyalo Bjang?

Dihlatse tša Jehofa di lebelela Beibele e le Lentšu la Modimo le buduletšwego. Ka gona, di tšeela godimo kudu seo le se bolelago ka lenyalo. Ela hloko seo Beibele e se bolelago ge e araba dipotšišo tše latelago:

▪ Na Dihlatse tša Jehofa di kgothaletša ditho tša tšona go kgaogana le balekane ba tšona bao e sego Dihlatse? Aowa. Moapostola Paulo o ngwadile gore: “Ge e ba ngwanabo rena a e-na le mosadi yo a sa dumelego, gomme mosadi a dumela go dula le yena, a se ke a mo tlogela; le mosadi yo a nago le monna yo a sa dumelego, gomme a dumela go dula le yena, a se ke a tlogela monna wa gagwe.” (1 Bakorinthe 7:12, 13) Dihlatse tša Jehofa di latela taelo ye.

▪ Na mosadi yo e lego yo mongwe wa Dihlatse tša Jehofa o kgothaletšwa go hlokomologa dikganyogo tša monna wa gagwe yo e sego Hlatse? Aowa. Moapostola Petro o ngwadile gore: “Lena basadi ikokobeletšeng banna ba lena, e le gore, ge e ba go e-na le bao ba sa kwego lentšu, ba tle ba ruiwe ka ntle le lentšu ka boitshwaro bja basadi ba bona, ka baka la ge ba bile dihlatse tše di bonego ka mahlo tša boitshwaro bja lena bjo bo sekilego gotee le tlhompho e tseneletšego.”—1 Petro 3:1, 2.

▪ Na Dihlatse tša Jehofa di ruta gore monna o na le matla a feletšego a taolo? Aowa. Moapostola Paulo o ngwadile gore: “Ke nyaka ge le tseba gore hlogo ya monna yo mongwe le yo mongwe ke Kriste; hlogo ya mosadi yona ke monna; hlogo ya Kriste yona ke Modimo.” (1 Bakorinthe 11:3) Mosadi wa Mokriste o tla hlompha monna wa gagwe bjalo ka hlogo ya lapa. Lega go le bjalo, monna ga a na matla a feletšego a taolo. O ikarabela go Modimo le Kriste. Ka baka leo, ge e ba monna a laela mosadi wa gagwe gore a itshware ka tsela yeo e robago molao wa Modimo, mosadi wa Mokriste o tla “kwa Modimo e le mmuši go e-na le batho.”—Ditiro 5:29.

▪ Na Dihlatse tša Jehofa di ruta gore tlhalo ga e dumelelwe? Aowa. Jesu Kriste o itše: “Ke re go lena mang le mang yo a hlalago mosadi wa gagwe ge e se ka lebaka la bootswa [boitshwaro bjo bo gobogilego bja tša thobalano], a nyala yo mongwe, o a hlotlola.” (Mateo 19:9) Ka baka leo, Dihlatse tša Jehofa di dumela gore pono ya Jesu ka bohlotlolo e nea mabaka a tlhalo. Eupša di dumela ka go tia gore manyalo ga se a swanelwa go fedišwa ka mabaka a sa kwagalego. Di kgothaletša ditho tša tšona go latela mantšu a Jesu a rego: “Monna o tla tlogela tatagwe le mmagwe a kgomarele mosadi wa gagwe, gomme ba babedi ba e tla ba nama e tee . . . Ka baka leo, se Modimo a se tlemagantšego jokong go se be le motho yo a se aroganyago.”—Mateo 19:5, 6.