Tumelo Yeo Batho ba Bantši ba Nago le Yona

“Ke be ke e-ba le ditoro tše boifišago kudu tšeo go tšona ke bego ke tšhungwa diheleng! Ke be ke lora ke lahlelwa lefelong leo le tukago mollo gomme ke be ke tla tsoga ke goeletša. Go molaleng gore ke be ke leka ka matla gore ke se ke ka dira dibe.”—Arline.

NA O dumela gore dihele ke lefelo la tlhokofatšo leo le boloketšwego badiradibe? Batho ba bantši ba dumela bjalo. Ka mohlala, ka 2005, seithuti Yunibesithing ya St. Andrews kua Scotland se hweditše gore tee-tharong ya baruti ba Scottland e dumela gore bao ba ikarotšego go Modimo ba tla “tlaišwa monaganong ka mo go sa felego diheleng.” Tee-hlanong ya bona e dumela gore bao ba lego diheleng ba tla tlaišwa mmeleng.

Dinageng tše dintši, batho ba bantši ba dumela diheleng. Ka mohlala, kua United States nyakišišo ya Gallup yeo e dirilwego ka 2007 e utolletše gore mo e ka bago 70 lekgolong ya batho bao go boledišanwego le bona e dumela diheleng. Gaešita le dinageng tšeo batho ba bantši ba sego ba sekamela bodumeding, batho ba sa dutše ba dumela diheleng. Ka 2004, nyakišišo ya Gallup e utollotše gore kua Canada, 42 lekgolong ya batho e dumela diheleng. Le gona, kua Great Britain, 32 lekgolong e kgodišegile gore dihele di gona.

Seo Baruti ba se Rutago

Baruti ba bantši ba kgaoditše go ruta gore dihele ke lefelo la kgonthe leo batho ba hlokofatšwago go lona ka go tšhungwa ka mollo. Go e na le moo, ba thekga tlhaloso e swanago le yeo e lego ka go Catechism of the Catholic Church yeo e gatišitšwego ka 1994. Puku yeo e re: “Kotlo e kgolo ya dihele ke gore motho a aroganywe le Modimo ka mo go sa felego.”

Lega go le bjalo, batho ba bantši ba sa dutše ba dumela gore dihele ke lefelo la tlaišo ya monagano goba ya mmele. Bao ba rutago thuto ye ba bolela gore e theilwe Beibeleng. Mopresidente wa Southern Baptist Theological Seminary e lego R. Albert Mohler o re: “Ke taba ya kgonthe ya Mangwalo.”

Ke ka Baka La’ng go le Bohlokwa Gore o Dumela Eng?

Ge e ba dihele e le lefelo la kgonthe la tlhokofatšo, gona o swanetše go le boifa. Lega go le bjalo, ge e ba thuto ye e se therešo, gona baetapele ba bodumedi bao ba e rutago ba gakantšha batho gomme ba dira gore bao ba e dumelago ba tlaišege monaganong go sa nyakege. Le gona ba senya Modimo leina.

Ke’ng seo Lentšu la Modimo, Beibele, le se bolelago ka taba ye? Dihlogo tše latelago di tla diriša Beibele go araba dipotšišo tše tše tharo: (1) Ge e le gabotse go direga’ng ge motho a e-hwa? (2) Ke’ng seo Jesu a se rutilego mabapi le dihele? (3) Go ithuta therešo mabapi le dihele go ka go kgoma bjang?